Te Kauoua n Tua ae Korakora
Kimwareireira ae korakora e roko ngkai ti buokiia tarira ma mwaanera.
Tariu ao mwaaneu aika a tangiraki, kam rabwa ibukin bwaai ni kabane ake kam karaoi ni buoka ikotakiia Iteraera i aonteaba ao i karawa, n kakorakoraia ami utu, ao n kakabwaiaa maiuia nake a kainnano. Kam rabwa ibukin maiumi bwa taan iriira Iesu Kristo ni koaua.1 Kam atai ao n tangiria n ongotaeka nakon Ana tua ake uoua, n tangira te Atua ao n tangiria kaain rarikim.2
Inanon 6 te namwakaina ae nako, Titita Nelson ao Ngai ti kaitibo ma ngaa kaain te aro aika a tia n mwananga nako America Nuuka ma Maiaki, aban nako Tebetebeke, ao kaawa aika kakaokoro i Amerika. Ngke ti mwananga, ara kantaninga bwa ti na karikirakea ami onimaki. Ma n tainako n oki rikakira ao e kakorakoraki ara onimaki irouia membwa ao raao ake ti kaitibo ma ngaai. I kona n tibwauai teniua maitiin bwaai aika tamaroa man mwanangara ae tia tibwa nako iai?
Ni meei, Titita Nelson ao Ngai ti mwananga ma Unimwaane Gerrit W. ao Titita Susan Gong nako Tebetebeke Maiaki. Ni menara i Auckland, Nu Tiran, e reke ara tai ni kaitiboaki ma tan tia kaira te taromauri aika uoman n te umwantabu i Christchurch, Nu Tiran, nuoua te namwakaina n nako, taan taromauri aikai akea aia bure a katiiaki bon te mwakuri n iowaawa ae kananokawaki.
Ti anga ara tangira nakoia tarira aikai n te onimaki ae kaokoro ao ni kamatoa ara motinnano ae ti te arona ibukin inaomataia aaro.
Ti anga baira n ibuobuoki nte mwane n buoka ae bon tau n manga katea aia tabo n taromauri. Ni kaitibora ma taan kairiiri n te Muslim e onrake ara nanoanga nakoia tarira aikai.
N Aokati, n reitaki ma Unimwaane Quentin L. ao Titita Mary Cook, Titita Nelson ao ngai ti kaitibo ma tabeman i Beunos Aires, Argentina—angiina irouia aika tiaki kaain ara aro—are maiuia a tia n buokaki ngke a anganaki aia wheelchair iroun te Latter-day Saint Charities. Ti kukurei ngke a kaota aia karabwarabwa ae onrake ma te kimwareirei ibukin baoia.
Te kateniua ae kakaawaki are riki tabeua te wiki n nako bon ikai i Salt Lake City. E reke man te reta ae onoti are I karekea n au rekenibong mairoun te ataeinnaine ae N na aranna bwa Maria—14 ana ririki.
Mary e korei bwaai aika mwaiti ni baike iai irouna ao irou: “Iai 10 natim. Mwaitira n ara utu bon tegaun. Ko bwaati n taetae n tiaina. Itiman ataei n au utu, n ikotaki ma ngai, ti tabekaki mai Tiaina, ngaia are te taetae n Tiaina bon oin ara taetae. Ngkoe te tia korokoro n te buroo. Tariu e a tia n karaoaki te [korokoro] n buroona uoua te tai. Ko tatangira te taromauri ae uoua awana. Ti tatangira te taromauri ae uoua awana. Ko bwaanaraoi. Mwaaneu e bwaanaraoi naba. E mataki n ai arou.”
I bon rang rootaki n ana taeka Maria, e oti ikai tiaki ti tamneina ae korakora ma ana anganano tamana ma tinana.
Aomata aika Itiaki, n ikotaki ma nake a iriira Iesu Kristo, n tainako a ukori kawai n buokia, tabekia, ao n tangiriia aomata. Nake a tauraoi n aranaki bwa ana aomata te Uea “ao n tauraoi ni katoka i aomi rawawataia raomi, … n tang ma ake a tang; … ao [n] karau nanoia ake a kainnanoa karauan nanoia.”3
A kataia raoi n maiuakina te moan ao te kauoua n tua. Ngkana ti tangira te Atua ma nanora ni koaua, E buokiira bwa ti na taben nanoia aomata n te waaki ae tamaroa man itiaki.
E na aki kona ni warekaki mwaitin aia ibuobuoki Aomata aika Itiaki n kabuta te aonaba n te bong koraki ni katoa te ririki, ma e bon kona ni warekaki tamaroan te Ekaretia ake e karaoi ni kakabwaiaia mwaane ao aine—ataeinimwaane ao ataeinnaine—ake a kainnanoa te bwai n ibuobuoki.
Ana waaki te Ekaretia n anga te buoka e moanaki n 1984. Imwina te Ekaretia ae Tabangaaki e riki rake man buokaia man te aro n karekea te mwane n buokiia nake a rootaki n te mwautakataka ae korakora i Aberika mainiku. Kaain te aro a anga $6.4 mirion te bong are teuana anne.
Imwina Unimwaane M. Russell Ballard ao Te tari Glenn L. Pace a kanakoaki nako Ethiopia n taraia bwa e na kanga ni kamanenaki te mwane ae tabu aio. Te mwakuri aio bon ngaia moan waakin te bwai ae na ataaki imwina bwa Aomata Aika Itiaki ni Bong aika Kaitira iai aia Tangira.
Mai imwin te tai anne, Aomata Aika Itiaki ni Bong aika Kaitira aika Tangira e a tia n anga uoua te birion te taara mwaitina n buokiia nake a kainnano n kabuta te aonaba. Te ibuobuoki aio e reke nakoia nake a kainnanoia n aki taraaki bwa tera reitakia ma te aro, abaia, aia reeti,aroia, mwaane ke aine, ke aia iango n tautaeka.
Tiaki ti anne. N buokiia membwa n ana Ekaretia te Uea ake a maraki, ti tangiria ao ni maiuakina te tua ngkoa ae te aki mamatam.4 Ti naaki amwarake bwa ti aonga ni buokia aomata ake a baki. Teuana te bong n te namwakaina, ti aki amwarake ao ti anga boon te amwarake (ao e mwaiti riki) n buokiia nake a kainnano.
N na bon aki kona ni mwaninga mwanangau ni kawara Aberika Maeao n 1986. A roko kaain te Aro n bootaki n taromauri n te mwaiti ae bati. E ngae ngke e aki bati aia bwai, angina a roko n kunnikaia te mainainana ae bane itiakina.
I titirakina te beretitenti n te titeiki bwa tera arona n tabeakinia membwa ae e aki bati aia bwai. E kaeka bwa ana bitiobi e na kinaia raoi aomata aikane. Ngkana membwa a kona n amwarake uoua te tai n tebongina, a na akea te ibuobuoki ae kainnanoaki. Ma a ti kona n amwarake teuana te tai n tebongina—e ngae ngke a buokaki irouia aia utu—bitiobi are anga te amwarake, te mwane man te angabwai n aki mamatam. Imwina e taekina te koaua ae kamiimi: n angin te tai aia angabwai n aki mamatam e riaon aia kabanemwane. Rakan te angabwai n aki mamatam e kanakoaki nakoia aomata n tabo tabeua are e raka riki kainnanoia nakoia. Aomata aika Itiaki mai Stalwart Aberika a anganai te reirei ae kakaawaki n korakoran tuan ao tamnein te aki mamatam.
Ngkai ngaira membwa n ana Ekaretia, ti namakina te reitaki ma nake a rootaki n anga nako.5 Ngkai ngaira naati mwaane ao aine iroun te Atua, ngaira taari ao mwaane. Ti mwananoa te tua n te O Tetemanti ae: “Ko na boni kaurea baim nakon tarim, ma ake a kai nanoia, ma ake akea aia bai i abam.”6
Ti kataia naba n maiuakina ana reirei te Uea Iesu Kristo are koreaki n Mataio 25:
“Ba I baki, ao kam kaamarakeai: I kanimoi, ao kam kamoai: te iruwa Ngai, ao kam akoai:
“Akea kunnikaiu, ao kam kunnikaiai: I aoraki, ao kam kawarai. …
“… Ngke kam karaoi baikai nakon temanna ae moan te mangori i buakoia tariu aikai, ao kam karaoi naba nako Iu.”7
Kariaia bwa n na taekin tabeua katooto bwa e kanga te Ekaretia n irii ana reirei te Tia Kamaiu aikai.
Ni buokaia te koraki ake a baki, te Ekaretia iai 12 ana autinibwai te bitioti ni kabuta te aonaba. Man baikai, e kaania 400,000 te amwarake are a anganaki aomata ake a kainnano ni katoa ririki. N taabo ake akea iai te autinibwai, bitiobi ao beretitenti n te mwaanga a kabonganai mwanen te angabwai n aki mamatam man te Ekaretia n katauraoa te amwarake ao bwaai nakoia membwa ake a kainnano.
E ngae n anne, te kangaanga ae te baki e rootia aomata aika mwaiti riki nakoia ake n te Ekaretia. E rikirake ni mwaiti n kabuta te aonaba. Te ribooti ae boou man te United Nations e kaota mwaitia aomata aika aki tau kanaia n te aonaba ngkai bwa 820 mirion—ke e kaan teuana n ruaiwa maeka n te aonaba.8
Bon te ware ae kananokawaki! Ti rang karabwarabwa ibukin ami anganano. E rabwa ami akoi ae koaua, mirion n kabuta te aonaba a na karekea te amwarake are rang kainnanoaki, kunnikai, tabo ni katantan ibukin tabeua te tai, taian wheelchair, bwainnaoraki, te ran ae itiaki, ao e bati riki.
E bati te aroaki ae kaoti n kabuta te aonaba man aki itiakin te ran. Ni karokoa te tai aio, ana buoka te Ekaretia e a tia n karekea te ran ae itiaki n bubua kaawa n 76 te aba.
Te waaki aei i Luputa, n te tautaeka n Congo, bon te katooto ae tamaroa. Ma kaain te aba ae aki raka iaon 100,000, n te kaawa ao akea te ran. Kaain te aba a na bon nakonako nakon tabo n ran aika raroa ibukin te ran ae itiaki. Ranin te maunga e kona n reke n te raroa ae 18 maire (29 kiromiita), ma kaain te kaawa a aki kona n karekea te ran anne n katoa tai.
Ngke a nora aei ara mitinare ake a tabe ma te buoka, a uaia ni mwakuri ma taan kairiri i Luputa man katauraoan bwaai ni mwakuri ao te reirei n karokoan te ran nakon te kaawa. Kaain Luputa a kabanea 3 te ririki n kena kawain te ran ae teuana te mita nanona n kanakoa te bwaa ma aroka. Man te uaia n mwakuri, e kaoti te bong ni kakukurei ngke te ran ae itiaki e a tauraoi nakoia ni kabane kaain te kaawa.
Te Ekaretia e buokia naba taan birinako, man mangaongaon te tautaeka, kangaanga man te otabwanin, ke bwanikirinaki ibukin te aro. E raka iaon 70 mirion aomata ake a kakionakoaki man mwengaia.9
N te ririki 2018 n ti ngaia, te Ekaretia e anga te bwaai ake a kainnanoaki nakoia taan birinako n 56 te aba. N reita aei, e mwaiti membwa n te Ekaretia aika a anga aia tai ni buokiia taan birinako n mwengaraoi n tabo aika boou. Ti karabwai ngkami ni kabane ibukin taben nanomi ni buokiia nake a kataia ni katei mwengaia aika boou.
Rinanon te buoka ae akoi nakon ana tabo ni mwakuri Deseret ake i Amerika, mirion mwaitin kunnikai ake a rikoaki man kaokoroaki ni katoa ririki. E ngae ngke bitiobi inanoaa a kabongana te buoka ae bati aio ni buokiia membwa ake a kainnano, bon angiin bwaai aikai a kanakoaki nakon rabwata n anganano ike a kanakoi baikai ni kabuta te aonaba.
Ao tibwa te ririki ae nako, te Ekaretia e anga te buoka ibukin te mata nakoia e raka iaon 300,000 aomata n 35 aaba, buoka nakoia tiina ake a tibwa bung ao ataei n 39 aaba, ao taian kani kain tekateka ibukiaa e raka iaon 50,000 aomata aika a maeka n abaa aika a mwaiti.
E rang kinaaki te Ekaretia bwa ngaia maibuakoia rabwata ake taian moan kaoti ni buoka te kangaanga. Bon imwaina ao eroko te angibuaka, taan kairiiri n te Ekaretia ao taan mwakuri n taabo ake a rootaki a karaoi kainibaire bwa a na kanga n anga te buoka ao n anga te bai n ibuobuoki nakoia nake a rootaki.
N te ririki ae nako n ti ngaia, te Ekaretia e a tia n karaoa e raka iaon 100 karikirake ni buoka te kangaanga n kabuta te aonaba, buokakiia nake a rotaki n angibuaka, urarake, ieka, rurunaantano, ao kangaanga riki ake tabeua. Tabo ake ko mena iai, membwa n ara Ekaretia ake akunnikaia te baboobo ae taekana ae makoro iaona Baai n Ibuobuoki a ibuobuoki n te ware ae mwaiti nakoia nake a rootaki n te kangaanga. Te aekaki n ibuobuoki aio, are kam a tia ni karaoi, are bon bannan te mwakuri n ibuobuoki.
Tariu ao mwaaneu aika tangiraki, mwakuri ake I a tia n kabwarabwarai bon ti mwakoron te buoka ibukin te maiu ao te kainnano n Ana Ekaretia Iesu Kristo Ibukiia aika Itiaki ni Boong aika Kaitira.10 Ao bon ngkami are kakoroa nanon baikai ni kabane. Ibukina bwa maiumi aika tamaroa, nanomi n akoi, ao baimi n ibuobuoki, e aki kamiimi ma e bati kaawa ao taan kairiiri n te tautaeka ake a kamoamoa ami mwakuri.11
Ma te tai are I riki ngai bwa te Beretitenti n te Ekaretia, I rootaki n mwaitia beretitenti, minita, ao ambatita ake a karabwaaira ma nanoia ibukin ara buoka nakoia aia botanaomata. Ao a tia ni kaota aia kakaitau ibukin te korakora are a anga ara membwa aika kakaonimaki nakon abaia bwa kaain te aba aika onimakinaki man bongana.
I miimi naba bwa taan kairiiri n te aonaba a kawara te Moan Beretitenti n kaota nanoia bwa e na kateaki te Ekaretia n abaia. Bukin tera? Ibukina a ataia bwa Aomata aika Itiaki a na bon ibuobuoki ni katei utu ma kaawa aika korakora, n katamaroa riki maiuia tabeman n tabo nako ake a maeka iai.
E ngae ngke e kakaokoro te tabo are ti aranna bwa mwengara, membwa n te Ekaretia e korakora nanoia iroun Tamara are i Karawa ao n te itaritari. Ngaia are, ara kimwareirei ae korakora e roko iroura bwa ti na buokiia tarira ma mwaanera, n tabo nako ake ti maeka iai n te aonaba ae tamaroa aei.
Te ibuobuoki nakoia tabeman—karaoan mwakuri man te nano n taben nanoia tabeman n ae bati ke n ae raka riki nakon tabeakinan arora—bon kukureira. Riki, N na reitia ni kangai, ngkana e angabuaka ao ngkana e kamwawaira man te tabo are ti na mwengaraoi iai. Laiuakinan te kauoua n tua bon te kiing nakon te riki bwa ana reirei ni koaua Iesu Kristo.
Tariu ao mwaaneu aika a tangiraki, bon ngkami katooton uaa ake a roko man irirakin ana reirei Iesu Kristo. I karabwai ngkami! I tangiri ngkami!
I ataia bwa E maiu te Atua. Iesu bon te Kristo. E a tia Ana Ekaretia n kaokaki n boong aika kaitira n kakoroa bukin te kantaninga ae tabu. I kakoaua n aran Iesu Kristo, amen.