Na Veitaqomaki e Valenilotu sa iLesilesi Yadudua ni Yalododonu Edaidai

Sa mai vakavoutaka na Lotu i Jisu Karisito ni Yalododonu Edaidai na nona idusidusi me vukei ira na iliuliu kei na lewenilotu mera tiko taqomaki ena gauna era tiko kina ena itikotiko ni Lotu. “Na ituvaki veisau sa yaco tiko e vuravura raraba” sa mai veimuataki me yaco na veisau oqo, e ratou a vola vakaoqo na Matabisopi Vakatulewa ni Lotu vei ira na iliuliu ni Lotu.

“Sa inaki ni idusidusi oqo me vukea na nodra tuberi na iliuliu kei na lewenilotu ena sala me vakatorocaketaki kina na veitaqomaki ena itikotiko kei na itaviqaravi ni Lotu,” e tukuna tiko na ivola ka a sainitaka o Bisopi Vakatulewa Gérald Caussé kei rau na nona daunivakasala, o Bisopi Dean M. Davies kei Bisopi W. Christopher Waddell. “Keitou sa sureti kemuni na iliuliu mo ni veivosakitaka na ka oqo ena matabose ni tabanalevu kei na iteki ka mera vakayagataki mera tuberi kina na lewenilotu, ni sa gadrevi vakakina, me wali kina na nomuni kauwai. Sa dodonu vei ira na iliuliu mera vakayagataka na idusidusi oqo ena kena inaki ka salavata tiko kei na lawa ni matanitu.”

Na idusidusi oqo ena dusimaki ira na Yalododonu Edaidai mera vakararavi ki na kena vaqaqacotaki na lawa ni matanitu ena gauna ni leqa tubukoso ka vakatura tiko e vica na ivakarau mera taurivaka na lewenilotu me vakatorocaketaki kina na veitaqomaki. Oqo era oka kina na qarauna tiko na veika e dui tiko voliti keda, tiko vakacegu, ka dolele yani ena veitokanitaki ka dokai na vulagi yadua, ka kakua na tiko duadua e vale ni Lotu ka muria na veivakauqeti ni Yalo Tabu me baleta na veidusimaki kei na veitaqomaki. Sa veivuke talega na idusidusi oqo mera vukei na iliuliu mera cakacaka vakavinaka cake ena gauna e vakataotaki kina e dua na veiqaravi ni sokalou mai vua e dua na tamata se ilawalawa.

E itinitini ni idusidusi oqo e dua na ivakasala me vakayacori kina na ka me caka vua e dua e vanavana se veivakamatei. Na ivakaro oqo era sa vakavulica tiko na tabana ni lawa kei ira na kenadau ena tabana ni veitaqomaki ni sa isau ni ka dodonu ki na ituvaki vakaoqo. Era sa vakaroti na iliuliu kei na lewenilotu mera cici, vuni se vala lesu, ka me vakatau tiko ki na ituvaki o ya:

Cici. Dro vakatotolo sara ki na dua na vanua taqomaki ke tiko. Toso vakatotolo ki na idrodro taqomaki vinaka mo lako tani mai na valenilotu ki na dua na vanua e taqomaki vinaka. Lako tani vakatotolo, me kakua ni kila o dauveivakamatei. Mera vakadeitaka na qase ni ra sa maroroi na gone taucoko ka mera tiko taucoko. Kakua ni lesu ki na valenilotu se ki na dua na valenivolavola se rumu ni kalasi baleta e dua na iyaya ni tamata. Kakua ni taura tiko e dua na ka e rawa ni kilakasamataki cala ni iyaragi maivei ira na dauveitaqomaki ni lawa.

Vuni. Kevaka o sa sega ni rawa mo dro bula, vunitaki iko maivei koya e veivakamatei tiko. Ke rawa, sogota, lokataka ka vakataotaka na katuba ni rumu ni kalasi, valenivolavola se rumu tale eso o vuni tiko kina. Bokoca na cina, vagaluya na talevoni veikauyaki, ka lolou sobu tiko ka gole tani mai na katuba leka. Kevaka era sa veivanavanai na tabana ni lawa kei koya e veivakamatei tiko, mera tiko ga na tamata kecega ena nodra rumu sa taqomaki tiko me yacova ni ra sa vakasalataki mai na tabana ni lawa.

Vala lesu. Me iotioti ni iwali, ke sa sega na gauna mo cici se vuni kina, drau vala kei koya e veivakamatei tiko. Vakayagataka e dua ga na ka me iyaragi, ka vala kei koya e veivakamatei me tarovi koya. Kera tiko eso tale na tamata, mo ni qai to vata ka taqomaki kemuni.