Bradley R. Wilcox

Inanon irakin ana maungatabu te roronrikirake i California, te Tari Bradley (Brad) R. e kaitibo ma te ataeinimwaane are e aki tangiria ni kan tiku ikekei. E raona te ataeinimwaane ae tebwitabun ana ririki iaan te aroka ae nuu, ao n te tai ae waekoa ao a maroroakina taekan te bwai are e mamate nanoia iai kairake—te karababa iaon te aba.

Te Tari Wilcox e butiia te ataeinimwaane anne bwa e na kaota nakoina tabeua ana aanga ni buti iaon te karababa. Ni kukureina, e kaoa te kairake bwa e na kabwarabwara bwa e kanga aron te karababa Riki ibukiia te Roronrikirake n tain te tiamwa anne. E rawa te ataeinimwaane anne ma n tokin te tai ao e a kariaia. N tain te EFY, e karekea te taneiai are e bitaki iai maiuna ao ni kunea ana koaua ibukin te euangkerio.

“E ira te EFY ibukin ana karababa, ma ngke e a nako ao e a reke ana koaua ao n tibwaua te euangkerio n aron te mitinare,” e taku te Tari Wilcox.

“I a tia ni kabanea maiu ma ataei ao aika tebwitabun aia ririki,” e taku te Tari Wilcox, “ao I tangiriia kaain te roronrikirake.”

Bradley Ray Wilcox e bungiaki i Provo, Utah, USA, n Ritembwa 25, 1959, nakoia Ray T. Wilcox ao Val C. Wilcox. E ikawairake i Provo ma n angin ana tai n ataei e kabanea tabeua te ririki i Ethiopia.

Imwiin karaoan ana mwakuri ni mitinare ae bwanin taina i Chile Viña del Mar Mition, te Tari Wilcox e mareaki ma Deborah Gunnell i Provo Utah Tembora n Okitobwa 7, 1982. Boni kaaro irouia aman natiia.

Te Tari Wilcox e reke ana baetura tikurii ao ana mwaatia tikurii mai Brigham Young Iuniwetiri ao ana beeba n taokita ibukin te reirei man te Iuniwetiri i Wyoming. Te Tari Wilcox e anganaki te karineaki ma tabeua kanuangana n ana mwakuri ibukin te reirei, e a tia ni kabanea 30 te ririki nako BYU Riki ibukin ana burokuraem te Roronrikirake, e rangi ni kukurei n riki bwa te tia reirei n te Tabo n Reirei n te Wiiki.

Te Tari Wilcox ao ana utu a tia ni maeka i New Zealand ao Spain ngke e kairii burokuraem ni kamatebwai itinaniku ibukin BYU. Iai tabeua ana boki aika e a tia ni korei ao n te tai aei e riki bwa te burobeetia n Tararua ibukin Booki aika Tabu Ake Ngkoa i BYU.

Te Tari Wilcox e a tia beku bwa te beretitenti i Chile Santiago East Mition ao n riki bwa te membwa n te baba ni kabuta ibukin te Reirei n Tabati, te kauntira n te beretitentii n te titeiki, ao te bitiobi ibukiia kairake n ikawai aika tuai ni iein ibukin te uoote. N te tai are e weteaki iai, e beku bwa te kauntira ae rietaata ao te beretitenti n te Bootaki n Ataeinimwaane n te titeiki.