COVID-19: Rongorongo ibukin te Kairiiri, Kamarurungaki, ao te Kantaninga

Ngkai I tekateka ni mweengau n kataia ni kabebetea rawawatan nanou bwa tera ae e a riki n te aonaaba, I kauka au tienoo ngke I a karina naba ni kunei taeka aikai: “E mwaiti te maaku are e roko man te uti ni katoa auan te bong n te aonaaba aei, ma n te onimaki n ana reirei te euangkerio, te rikirake e karaoaki inanon te karaurau ao te teimatoa, teutana imwiin teutana. … E tokanikai te onimaki iaon te maaku.”

I ataia bwa I a tia ni karekea te kaotioti ae onoti ae mwaakaroiroi bwa Tamara are i Karawa e anganai rinanon au rongorongo ake inanon au tienoo tabeua ririki ake mai imwaaina. I kakabwaiaki n te tai ae rau ao te atatai bwa Tamara are i Karawa e mena irarikiu n taai akekei, ao E raonai ikai n te tai aei.

Danette Gray, Utah, USA

I namakina kairau ni moana karaoan te kiraati n te tieminari rinanon kurubu ni marooro n te witeo. Uabong te bong imwaain ae kaokoroaki ara kaawa bwa e na aki butinako te aoraki iai, ara kiraati a tibwa karekea aia moan reirei n te aonraain.

Tabeman kaaro a kaaina naba ara kiraati, n raonaki naba ma naake tiaki kaain te aro. I taua raninmatau ngkai ti kamatebwaia Motiaea mwakoro 2 ngaira n ikotaki. Ti bane n namakina te Tamnei ngkai ti reiakinna bwa te beku ibukiia tabeman ti bon beku naba ibukin te Atua. E mwaiti ae I reiakinna ibukin karekean ao ataakin te kaotioti ae onoti. Te Tamnei ae Raoiroi e na kaota koauan te euangkerio n anga aika a mwaiti. N aki tabe ma te bwai ae riki n te aonaaba, akea te bwai ae kona ni katoka ana mwakuri Tamara are i Karawa ibukin kamaiuaia Natina man rikirakeia.

Marites Pineda, Mindanao, Philippines

E ngae ngke ma bwaai aika riki ma te coronavirus, I kukurei n taekinna bwa akea te bong ae ti kabua n te tieminari! Reireinakiia kaain au kiraati iaon te marooro n te witeo e karekei tabeua kangaanga, ma I kan mamataku irouia kaaro ao kairake ma tariia ao mwaaneia n ongora n ara marooro. I tangira anne e karekea te namakin n teimatoa ao tabera ibukiia ara utu, ao moarara riki I tangira are ti kona n teimatoa ni kaota ara koaua imarenara ibukin Iesu Kristo ao Ana tangira ibukira.

Mandi Crandell, Yigo, Guam

I beku bwa te mitinare te aine ae e a maan i Missouri Independence Mition ngke a katokaki ana bobootaki te Ekaretia ao ti a moanna ni kaokoroira ibon iroura inanon ara auti. Ti kabonganai ara tareboon ao ara kaombiuta n reitaki ma membwa ni karokoira irouia naake ti mwakuri ma ngaiia, ake aki bati n roroko n taromauri.

Ni karekea tabetabeu, I baireia bwa N na karaoa tabeua rongorongon au utu, e ngae ngke inanon te tai ae uarereke e bon kangaanga irou kakaean aara aika boou. Ngke I karinai n te FamilySearch, I kunea taekan rongorongon te rekooti are e nang tauraoi ni kanimwaki. Te rekooti ane teuana anne e kairai bwa n na kakaia 70 aomata man kanoau. Imwiin nimaua te bong, karaoan te ara e a toki. Imwiin te bong anne, ti kunea bwa ti a kamotirawaki bwa ti nang okiri mweengara. I bon nanokawaki, ma I namakina naba te kakabwaiaki bwa I kona ni beku ibukiia au utu n iteran te roki are teuana n tain te kangaanga aei.

Kim Nielson, Oregon, USA

Ngkai mitinare n ara aono a tuangaki bwa a na tiku ni mweengaia, ti kataia ni karaoa tabera, ni kaoa raoraora n reirei taekan te euangkerio. Mitinare a tibwaua aia reirei iaon te tareboon nakoia raoraora. Ti namakina korakoran te Tamnei inanon mweengara ni kakaitau nakon rabakau aika boou ake ti karekea ni boong aikai. E bon kamiimi noorakin ana mwakuri te Uea n teimatoa ni waaki nako e ngae ma kangaanga ni kabane n te aonaaba.

Elaina Reich, Washington, USA

I beku bwa te mitinare n ibuobuoki n te Ekaretia ma te burokuraem ae PathwayConnect i Kyiv Ukraine Titeiki. Taan kairiiri n te burokuraem a baireia bwa a na kataneiaira ngaira ni kabane are e kaira te ikoikotaki bwa ti aonga ni kona ni kairia. N te bong raoi are imwiina, te tautaeka e katanoata te kaokoroaki bwa e na aki butinako te aoraki i Kyiv.

I tangira te tibwanga ae te kaai n ikotaki ibukin te PathwayConnect. Ao I tangira te tibwanga ae te kaai n ikotaki n taromauri ao n ikotaki n anene inanon te mweenga n te Tabati. I kakaitau ibukin te kakoaua bwa ike a bootaki iai uoman ke teniman, E mena naba ikekei. Akea temanna ae e ataia bwa maanra ngaira ni kaokoroaki i Kyiv, ma ti ataia bwa te Tia Kamaiu e ongo ara anene.

Kateryna Serdyuk, Kyiv, Ukraine

Ngke e taekinaki n te rongorongo ni kaineti ma te aoraki ae te COVID-19, I namakinna bwa kanga te iango ae bon karioaki. Ngkanne ngke a waaki nako boong, I a moanna n namakina te aki mweengaraoi ao ni maaku naba ibukin kanoan taai aika a na roko ibukin ara aonaaba. 

Te moaningabong teuana I aki kona ni matu ao I a tekateka n iango bwa tera bukina ngkai e a bon riki aei. Ngkanne e a roko te rau. E reireinai te Tamnei bwa te Uea e a tia n anganai te bwaintituaraoi. “E a boo am tai ni kaokiia am utu,” E taku.

Te maiu e a bon tatabetabe naba. Te aoraki ae butinako aei e angan ara utu te tibwanga ni kabotoi ara iango iaon bwaai aika kakawaki riki: ana euangkerio Iesu Kristo. I kona ni katebenakoi tabeua mai buakon kairoro aika kamamate ao ni kabanea nanou iaon reireinaia natiu bwa a na taraa Kristo. Tamara are i Karawa e tabeaianga ibukira. I namakina anne ngkai nakon are mai imwaina. 

Mary Ostler, Nebraska, USA

Ngke I moan tuangaki ae ana bobootaki te Ekaretia a katokaki, I bon nanokawaki teutana. Ma ngkai I kona n noora aron te Uea ni katauraoira ibukin aei rinanoia Ana burabeti. Kamatebwaian te euangkerio ae boboto n te mweenga e kona ni buokiira rinanon taai ni kataaki. I kakaitau bwa I teimatoa ni kona n anaa te toa n te Tabati ao ni karekei aia taeka burabeti. E karaunano ngkana ko ataia bwa ni karokoa are ti a manga kona ni ikotaki, ti kona n namakina te Tamnei naba anne.

Emma van As, Gauteng, South Africa

Ngkai kainnabau ao Ngai ti ira waakin te otenanti ibukin te toa inanon mweengara n te moantai. I namakina te Tamnei bwa e rangi ni korakora n te aro are e a buretata anenean te kuna n taromauri are ti tia n rineia. Inanon au ka 70-tabun n ririki n iriira te bootaki n taromauri, I aki uringnga ni kakaitau ae moan te bati n taian kakabwai ake ti karekei rinanon kainakin te aro ao iriirakin waaki n Ana Ekareretia Iesu Kristo ibukiia Aika Itiaki ni Boong aika Kaitira.

Ti a kaman tia n reireinaki bwa ti na kanga n taromauri ao antai ae ti na taromauriia. Eng, e a bua bobootakira ma raora Aika Itiaki ao ni kukurei ni manga oki nakon “arona are taneiai te aba iai” n te tai ae waekoa, ma I kakaitau ibukin reirei ake ti reiakina n te tai aei ngkai ti iriira ana reirei te burabeti inanon ara taromauri “ae boboto n te-mweenga, ae boutokaaki n te Ekaretia”.

Susan Preator, Montana, USA

Reken ara bootaki n utu n te tairiki bon te bwai ae ti kakantaningaia Ngai ma natiu ni katoa wiiki. Ti taneiai n iai membwa, raoraora, ao mitinare n roroko n te auti n taainako. Ngkanne a bitaki bwaai n te tai ae tawe ibukin te aoraki ae butinako aei. Ngkai iai ara tai ni bootaki n utu te tairiki ma raoraora iaon te tareboon. Rinanon te tai aei ni kabane ti kona ni karaoi bwaai aika mwaiti are e a uotiira ni kaanira.

I bon rangi ni kakaitau ibukin ara burabeti ae tangiraki, are e kaoira ngaira ni kabane bwa ti na karaoa ara aki mamatam. Angiina mai iroura ti kona n namakina mwaakan te katieuanaaki ao te rau rinanon te taneiai anne. N taai aron aei, te rau are ti kainnanoia e roko mairoun te Tia Kamaiu Iesu Kristo.

Roshene McKenzie, Kingston, Jamaica

I moana au mwakuri ni mitinare tii uoua ma te iterana te namwakaina n nako. I mwiokoaki bwa N na beku i Hermosillo, Mexico. Ni katoa bong I karekea te tibwanga ni kaitibo ma aomata aika kakateke ake a tauraoi ni butimwaea te euangkerio are e a tia ni kaokaki. I namakinna bwa I a tibwa moanna ni kakoroa nanon lbukin rokou ngke te aoraki ae te COVID-19 e uruana au mwakuri ni mitinare.

E bon kamaraki kitanakiia aomata akanne ake I rangi n tangiriia, ma I namakina naba te rau ae korakora ao te rauaki ibukina bwa te Atua e teimatoa n tararua. I kakaitau bwa iai ara burabeti ao Abotoro ake a kairiira n te tai aei. N aroia mitinare aika a mwaiti n te aonaaba, I onimakina bwa te kantaninga aei bon tiaki tokin au mwakuri ni mitinare. N te tai ae waekoa ao I a kona ni karekea te buoka ni waakina nako ana mwakuri te Uea n riki bwa te tia mwakuri inanon baina ni uotiia aomata riki aika a mwaiti nakon te rairannano.

Carolina Roman, Puerto Rico