Ngāue Fakataha pea mo e Mālohi ʻo e Lakanga Fakataulaʻeikí

ʻI he ngaahi taʻu lahi kuo hilí, ne u ofo mo hoku uaifi ko Papulaá heʻema vakai hake ki he langí ʻi he poʻulí. Ne hangē ne ngingila mo fakaʻofoʻofa makehe e ngaahi fetuʻu ʻe lauimilioná. Ne u vakai leva ki he Mataʻitofe Mahuʻingá ʻo lau e meʻa naʻe folofola ʻaki ʻe he ʻEiki ko e ʻOtuá kia Mōsesé: “Pea kuó u fakatupu ʻa e ngaahi māmani taʻefaʻalaua; pea naʻá ku fakatupu ia foki koeʻuhi ko e taumuʻa pē ʻaʻaku; peá u fakatupu ia ʻi he ʻAló, ʻa ia ko hoku ʻAlo pē Taha naʻe Fakatupú” (Mōsese 1:33).

Ko e lakanga fakataulaʻeikí ʻa e mālohi naʻe fakatupu ʻaki ʻa e langí mo e māmaní. Ko e tupuʻanga ʻo e mālohi ko ʻeni ʻo e lakanga fakataulaʻeikí ko e ʻOtua Māfimafí mo Hono ʻAlo ko Sīsū Kalaisí. Ko e mālohi ia naʻe ngāue ʻaki ʻe he Fakamoʻuí ke fakahoko e ngaahi maná, fakahoko ha Fakalelei taʻefakangatangata, mo ikunaʻi ʻaki e mate fakaesinó ʻo fakafou ʻi he Toetuʻú.

ʻI he palani ʻa ʻetau Tamai Hēvaní, ʻoku maʻu ai ʻe he kakai tangatá ʻa e fatongia makehe ke ngāue ʻaki e lakanga fakataulaʻeikí, ka ʻoku ʻikai ko kinautolu ʻa e lakanga fakataulaʻeikí. ʻOku mahuʻinga ke mahino kiate kitautolu naʻe ʻomi ʻe he Tamai Hēvaní ha founga ke lava Hono ngaahi fohá mo Hono ngaahi ʻofefiné ʻo maʻu e ngaahi tāpuakí pea fakamālohia ʻe he mālohi ʻo e lakanga fakataulaʻeikí.

ʻE lava pea ʻoku totonu ke hoko e mālohi tatau pē ʻo e lakanga fakataulaʻeiki ne fakatupu ʻaki e ngaahi māmaní, kanivá, pea mo e ʻunivēsí, ko ha konga ʻetau moʻuí ke fakafiemālieʻi, fakamālohia, mo tāpuekina hotau fāmilí, kaungāmeʻá, mo hotau kaungāʻapí—ko hono fakalea ʻe tahá, ke fai e ngaahi meʻa ʻe fai ʻe he Fakamoʻuí kapau naʻá Ne ngāue fakaetauhi mai kiate kitautolu he ʻahó ni (vakai, Tokāteline mo e Ngaahi Fuakava 81:5).

Ko e tefitoʻi taumuʻa ʻo e mālohi ko ʻeni ʻo e lakanga fakataulaʻeikí ke tāpuekina, fakamāʻoniʻoniʻi, mo fakamaʻa kitautolu ke tau lava ʻo nofo fakataha mo hotau ngaahi fāmilí ʻi he ʻao ʻo ʻetau ongomātuʻa fakalangí ʻo taʻe ngata. ʻI he foungá ni, ʻoku lava ai ʻa e kakai tangata, fefine, mo e fānau kotoa pē—neongo pe ko e hā hotau ngaahi tūkungá—ʻo kau ʻi he ngāue fakaofo ʻa e ʻOtuá mo Sīsū Kalaisí (vakai, Mōsese 1:39) mo fiefia ʻi he ngahi tāpuaki ʻo e lakanga fakataulaʻeikí.

Fakatauange te tau poto pea kumi ke fakamālohia ʻetau moʻuí, moʻui ʻa hotau fāmilí, mo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi he mālohi ʻo e lakanga fakataulaʻeiki ʻo e ʻOtuá.