Dijitol Nomo: Blong Ol Yang Adalt
I Tekem Wanem blong Kasem Ol Stret Mo Gud Tingting blong Hat blong Yumi
Taem famli blong mi i bin nomo gat samting mo kakae, mi no sua tumas long olsem wanem bae mi save go long wan misin.
Longtaem bifo mi bin kasem baptaes insaed long Jos Ia blong Jisas Kraes Ia blong Ol Lata-dei Sent, mo bin wantem blong givim seves long Lod. Oltaem mi talem long miwan se bae mi givim fulwan evri taem blong mi long Hem no mata wanem. Blong givim seves long Hem truaot long laef blong mi i bin drim blong mi. Mo blong joenem Jos blong Jisas Kraes i bin givim wan janis we i moa gud blong folem drim blong mi.
Long Disemba 2017, mi kasem baptaes. Hemia i bin dei long laef blong mi we i gud mo naes tumas. Gospel i bin tijim mi olsem wanem blong tingting i defren, olsem wanem blong givim insperesen long ol narawan, olsem wanem blong winim ol fraet blong mi, mo olsem wanem blong mekem ol talen blong mi oli kam moa strong mo faenemaot ol niu wan. Long en, mi bin lanem tu, abaot janis ia blong go long wan fultaem misin. Mi save wantaem se hemia wan samting we mi bin wantem blong mekem. Mekem se dei afta dei, mi wok blong rere. Mi ridim ol skripja, go long institiut, mo wok moa strong mo gud long koling blong mi. Be, i gat wan problem long famli blong mi we i mekem mi no sua tumas abaot fiuja.
Fasin blong Stap Pua.
Taem mi kasem 18 yia, famli blong mi i nomo gat samting mo kakae. Mifala i no save kakae, go long skul, o iven pem transpot blong go long jos. Samting nomo we i stap i fet blong mifala we mifala i hang strong long hem. Situesen ia i bin mekem rod blong go long misin blong mi i slo tumas. Mi talem long mama blong mi abaot tingting blong hat blong mi, be hem i stap ripitim wan samting we hem i stap talem long mi fulap taem: “Finisim skul, afta folem ol drim blong yu.” From faenens situesen blong mifala, mi no bin gat fulap joes tumas. Mekem se mi wok had blong go tru long skul.
Long en, mi graduet mo mi rere blong go aot mo givim seves long Lod. Be fasin blong stap pua i stap spolem mifala yet.
Mi bin kros tumas.
Mi tingting long miwan, “Mi bin finisim skul, mo mekem evri samting we mi save mekem. ?From wanem ol samting i no stap go gud yet? Mi nomo wantem longtaem moa from drim blong mi bakegen, be nomata we tingting blong mi i stap daon, mi trastem se ol samting bae oli go gud long taem we i stret.
Mi bin disaed blong wok moa had blong winim evri mane blong ol samting we bae mi yusum mane long hem long misin blong mi. Mi prea evri dei, visit wetem ol misinari evri taem we mi save mekem, mo mekem testemoni blong mi i kam moa strong taem mi stap stadi long ol materiol blong Jos.
Fulap long ol famli blong mi oli agensem drim blong mi ia blong go long wan misin. Bae oli stap talem long mi se blong go long wan misin bae i mekem ol samting i go moa wos nomo blong mi mo famli blong mi. Be mi stanap strong long drim blong mi. Mi save se mi wantem blong go long wan misin mo se Papa long Heven bae i givim wan rod.
Afta long wan longfala taem blong stap wok mo sevem mane, mi bin givim ol pepa blong mi blong misin long en. Taem bisop blong mi i bin ring mo talem long mi se kol blong mi i kam, !mi singaot mo jam from glad! Kwiktaem nomo mi go long stek ofis mo karem leta. Long naet ia, mi openem misin kol blong mi mo anaonsem long famli blong mi se oli singaotem mi blong mekem misinari wok long Filipin Kabanatuan Misin.
Mi krae from glad long naet ia. Nomata evri samting we i bin hapen, wetem fet mo had wok mo tras long Lod, mi finisim evri samting we i nidim blong go long wan misin mo mekem drim blong mi i hapen. Mi luksave se sapos mo no bin eksperiensem hadtaem ia bifo long misin blong mi, maet bae mi no rere fulwan long saed blong bodi, filing, spirit, maen, mo faenens. Be from ol situesen blong mi, mi bin save gro long fulap wei.
Mi save se Papa long Heven i gat wan plan blong yumi evriwan. Maet, long sam taem, yu no luksave mining blo evri samting we yu stap go tru long hem, mo maet bae yu wantem ol samting blong hapen naoia bitim afta, be gat tras long taem blong Hem bitim blong yuwan. Sapos yumi gat tras long Hem mo eksasaesem fet mo had wok, bae Hem i lidim yumi i go long ol stret mo gud tingting blong hat blong yumi long raet taem mo helpem yumi gro folem rod i go (luk long Inos 1:12 mo Alma 29:4).