Taem Mi Filim se Oli Bin Giaman long Mi Abaot Jos
From wanem mi bin go. Mo from wanem mi bin kambak.
Ol pikja droing oli kam long Mark Smit
Sam yia i pas, mi stap folem wan storian long sosol media bitwin tu long ol kompanion blong mi we mifala i bin wok tugeta long misin. Ol man ia we mi lavem mo respektem.
Oli stap storian raon long ol kwestin we oli gat abaot Jos mo doktrin blong hem. I no longtaem, i kam klia long se tufala tugeta i bin lego Jos. Mi sek mo i mekem tingting blong mi no stap kwaet. Mi bin neva harem sam long ol samting we tufala i stap tokbaot. Mi filim se mi mas save sapos ol samting ia i gat mining. Mekem se mi stat blong ridim gud ol raorao blong olgeta we oli gat poen long Jos.
Sam long ol samting we mi ridim long tufala nekis ia yia ia i lidim mi blong gat kwestin abaot evri samting blong Jos. Sam we oli stap go tru long hemia i filim nogud. Oli harem nogud bigwan from fet blong olgeta we oli lusum. Mi kam blong kros. Mi filim se Jos i bin giaman long mi. Mi no sua wanem i tru o huia mi save trastem.
Mi bin gat had taem blong stap go long jos. Mi askem blong oli rilisim mi long koling blong mi. Rilesensip blong mi wetem waef blong mi, Cheri, mo famli blong mi i kam nogud. Mi gohed blong go long jos, be hem i blong soem mi nomo mo traem blong kipim famli blong mi i stap tugeta. Laef i olbaot nomo. Mi no save filim Spirit mo askem miwan sapos yes o no se mi bin filim Tabu Spirit tru.
Taem bigfala boe blong mi, Kayson, i stap lego mifala blong go long misin blong hem, mi pulum wan dak klaod i kavremap taem ia we i sapos blong stap olsem wan hapi taem. Afta long tu yia, fulap long famli blong mi i save wanem mi stap go tru long hem. Taem olgeta evri wan i go long tempol wetem Kayson blong fas taem blong hem, mi no bin stap.
Truaot long taem ia, mi filim mi stap miwan tumas.
Sapot I Raonem Mi
Wan dei ol brata blong mi oli kam tugeta blong toktok long mi abaot wanem mi stap go tru long hem. Mi no bin tingbaot gud tumas wanem oli talem, be mi save se oli mekem from lav blong olgeta long mi. Taem mifala i stap toktok, mi stat blong kam blong luksave wanem mi stap mestem. Hemia i kam wan strong pus long mi blong jenis. Mi nao mi sapos blong odenem Kayson olsem wan elda. Mi nao mi sapos blong karem hem tru long tempol. Mi nao mi sapos blong givim hem wan blesing blong papa bifo hem i go long misin. Fulap long ol impoten taem long laef blong hem, i sapos blong mi nao blong stap long taem, be i no wan nara man. Mi tingbaot we mi stap askem miwan se,”?Mi stap mekem wanem?”
I no longtaem afta, wan gudfala fren i kasem insperesen blong introdiusum mi long wan memba blong stek presidensi blong hem. Man ia we i kaen i lisin gud long stori blong mi mo i luk olsem hem i save wanem bae mi talem bifo we mi talem. Mitufala i toktok blong plante aoa. Stori blong mi, ol kwestin blong mi, fasin blong tingting ia we stap tingting long hem i semmak fulap long wanem ol nara wan oli serem wetem hem. Mi stat blong kam blong luksave se i gat ol ansa we i gat mining long ol fulap wari mo fulap kwestin blong mi, we nomata we oli tru, oli stap mo i gat from ol pipol we oli wantem stap damejem fet.
?I kwiktaem nomo blong ansarem mo stretem evri kwestin mo wari blong mi? No, o yes, no. Be hat blong mi i kam sopsop inaf blong luksave wan bigfala mo gudfala trutok: ol kwestin oli gud, be sam kwestin oli moa impoten bitim ol nara wan.1 ?I inaf blong lusum famli blong mi mo blong stanap long fored blong God from sam kwestin we oli no ansarem? Taem mi lukluk moa faswan long ol kwestin we oli moa impoten mo putum bak God long fas ples insaed long hat blong mi, mi stat blong faenem ol ansa we i talem bakegen wetem strong tingting se mi stap kambak long stret rod.
Stek presiden mo bisop blong mi tu, oli kamaot blong helpem mi. Oli wan gudfala mo bigfala help long mi mo Cheri long ol taem blong tudak. Oli neva givap. Olgeta mo famli blong mi long tugeta saed blong vel oli ol gudfala tul blong stap helpem mi. Mi save se Papa long Heven i save mo i lavem yumi. Hem i putum ol pipol long rod blong yumi taem yumi nidim olgeta. Yumi jes nidim blong gat gladhat blong akseptem help blong olgeta.
Wanem blong Mekem Sapos Hemia I Yu
Mi save se i gat ol nara wan i stap we maet oli stap go tru wan samting we i kolosap semmak olsem. Maet hem i yu o wan we yu save.
mi save se Sevya i bin stanemap Jos blong Hem wetem atoriti blong save givim ol odinens mo kavenan we yumi nidim blong gobak long Hem. Setan i stap wok ova taem blong talem nogud Jos blong Lod taem i stap yusum evri wei we i posibol. Blong stap gat ol kwestin mo mekem ap ol tu tingting i isi. Blong foldaon insaed long ol trap blong hem, i save hapen long eniwan. Blong stap dipen long infomesen mo ol ansa we ol nara wan i givim i stap olsem wei we i isi moa blong stap faenemaot trutok blong yuwan “tru long stadi mo tu, tru long fet” (Doktrin mo Ol Kavenan 88:118; oli ademap long italik). Be antap long evri samting, hemia nao wanem God i nidim.
Sapos yu stap fesem hadtaem wetem ol kwestin o gat tu tingting abaot Jos o fet blong yu, bae yu faenem trutok taem yu stap rid long ol websaet o stap lisin long rekoding long olgeta we oli no agri wetem Jos o oli bin lego Jos. Be tu, bae yu no harem se i inaf wetem ol ansa we oli no hevi, mo maet bae yu no laekem tingting ia blong “putum ol kwestin blong yu long self.”
Mi bin lanem se, oltaem yumi no save laef long laet we yumi boro long hem, be, yumi mas tanem yumi i go long God we i ples blong evri laet mo trutok (luk long Doktrin mo Ol Kavenan 93:26). Yumi mas stadi gud long hem insaed long maen blong yumi, be tu, yumi mas askem long God sapos wanem yumi stap tingting long hem i raet (luk long Doktrin mo Ol Kavenan 9:8). Yumi mas lan blong yumiwan, olsem we Josef Smit i bin mekem (luk long Josef Smit—Histri 1:20) mo gat fasin blong save stap wet longtaem long wanem yumi stap lukaotem (luk long Alma 32:41). Be blong stap lan wetem fet i minim se yumi mas pruvum trutok ia taem yumi stap laef folem (luk long Jon 7:17; 1 Tesalonaeka 5:21).
taem mi stap stadi ol samting we i go agensem Jos, mi filim olsem mi stap long medel blong tudak (luk long 1 Nifae 8:23–24; 12:17). Taem mi holemtaet tok blong God mo tekem fas step ia i go long Hem, hemia i evri samting Hem i bin nidim blong sendem Spirit blong Hem blong tajem hat blong mi.
?Hop I Inaf?
Sam wik afta we Kayson i bin aot blong go long misin blong hem, stek presiden blong mi i bin visitim mi. Mi mekem hem i kaj ap long wanem i bin hapen long ol wik ia afta we ol brata blong mi oli bin toktok wetem mi. Mi talem mi wantem blong gat wan niu tempol rekomen. Hem i askem sapos mi save ansarem gud ol kwestin blong rekomen. Mi konfes: “Presiden, mi no ting se mi save talem yet se Jos i tru, be mi hop tru wetem ful hat blong mi se hem i tru. Mo bae mi stap lidim laef blong mi folem hop ia. ?Hemia i inaf?
Hem i stop smol taem mo talem: “Travis. Hemia bae i inaf oltaem.”
I gat sam samting we mi stap wet yet blong andastanem, be sam samting oli kam klia long mi. Mi save Papa long Heven i lavem mi. Mi save se samtaem bae yumi wokbaot i go defren mo yumi gat hadtaem blong smol taem. Be mi save se tru long Kraes, Atonmen blong Hem, mo hop we hemia i tekem i kam, hem i posibol blong gobak long rod ia we i lidim yumi i gobak long Hem.
Hem we i raet i stap long Yuta, YSA.