Defren be Tugeta
Hem we i raet i stap long Jojia, YSA.
“Wosip long fasin we oli wantem, long weaples we oli wantem, o wanem we oli wantem” (Ol toktok blong Bilif 1:11).
Ellie mo famli blong hem oli stap go blong visitim ol kasen blong olgeta we oli stap longwe. !Ellie i glad tumas! Hem i no bin luk ol kasen blong hem long taem.
Bifo long trip ia, papa mo mama blong Ellie oli talem se oli wantem tokbaot wan samting.
“Taem yumi kam tugeta wetem ol famli, oltaem yumi mas talem ol prea long taem blong kakae. Mo samtaem yumi tokbaot jos, i tru?” Papa i askem.
“!i tru!” Ellie i talem.
“Be, ol samting bae oli defren smol long trip ia,” mama i talem. ‘Anggel mo anti blong yufala i nomo stap go long jos. Mo oli no laekem taem ol man i stap tokbaot hemia long olgeta.”
Ellie i mekem fes blong hem i nogud smol. “?From wanem no?”
“Yumi no save evri risen blong hem,” papa i talem. “Be olgeta i lavem yumi tumas. Mi ting se bae oli no wantem raorao wetem yumi o mekem yumi harem nogud. Mekem se oli askem sapos yumi save no tokbaot ol samting blong jos wetem olgeta.”
Ellie i saksakem hed blong agri.
“Yumi save gohed blong ridim ol skripja blong yumi mo prea taem yumi stap long we. Be bae yumi mekem taem yumi nomo yumi stap,” mama i talem.
“?Be afta taem bae yumi kakae bae wanem?” Sista blong Ellie i askem.
“Bae yumi wet mo luk,” mama i talem. “Sapos oli no prea bifo yumi kakae, yumi save talem wan prea long hat blong yumi.”
“Okei,” Ellie i talem. “!Mi save mekem hemia!”
Long nekis dei, famli blong Ellie i fulumap trak. Oli draev kasem let long naet. Long en, taem oli kasem haos blong ol kasen blong olgeta, anti mo anggel blong Ellie i helpem olgeta blong karemaot ol basket blong olgeta long trak. Afta, evriwan i go silip.
Long nekis moning, Ellie i talem wan prea bifo i go long kijin blong kakae brekfas. Hem i harem i fraet smol blong luk famli blong hem. Be afta, anti blong hem i sidaon narasaed long hem wetem wan naes smael long fes blong hem.
“Sam long yumi bae oli stap go long ples blong mekem hea blong kasen blong yu, samtaem tedei. ?Yu wantem kam?” hem i askem Ellie.
“?Wan ples blong mekem hea?” Ellie i askem.
“!Yes! Oli save mekem hea blong yu mo sista blong yu sapos yu wantem.”
Ellie i smael mo saksakem hed blong talem yes. !Hemia i naes blong mekem!
Afta long brekfas, oli karem wan bas i go long ples blong mekem hea. Ellie i laekem tumas blong stap lukluk kasen blong hem i wok. Ol fingga blong hem i flae i go fored mo biaen taem hem i stap komem mo tanem hea. Afta we oli finisim hea blong evriwan, oli priten blong gat wan fashen so long fored blong ol mira mo stap laflaf smosmol long ol niufala stael lukluk blong olgeta.
Be long nekis dei, ren i ren strong. Mekem se evriwan i disaed blong stap insaed mo plei ol bod gem. Ellie mo wan long ol kasen blong hem oli stap long wan tim agensem tu long tufala boe we oli mo bigwan. Oli jik jikim olgeta taem oli stap resis long ol pisis blong gem blong olgeta raon long bod we oli stap plei long hem.
“!Mifala i win!” Ellie i singaot taem hem i muvum pis blong gem blong hem kasem en blong bod. Olgeta evriwan i hae faef long olgeta—iven ol kasen we oli moa bigwan, we oli priten blong mekem fes i longwan from oli lus.
Sam dei nomo afta, hem i taem blong gobak hom. Taem Ellie i stap klaem i go biaen long trak blong famli blong olgeta, hem i harem famli blong hem i stap talem tata.
“!Bae mifala i misim yufala!”
“!Kambak i no long taem!”
“!Mifala i lavem yu tumas!”
Ellie i smael mo tata taem trak blong olgeta i stap aot. Hem i gat fulap gud taem. Nomata we oli biliv long ol defren samting, oli save gohed yet blong stap olsem wan hapi famli. ●