Joes blong Lila
Hem we i raet i stap long Korientes, Ajentina.
“My body is the temple my Father gave to me” (Children’s Songbook, 153).
Lila i bin wantem blong jusum raet.
“!Taem blong skripja!” Lila i talem.
Lila i laekem tumas blong stap rid long smol sista blong hem, Anika, mo bebi brata blong hem, Svetan. !I no longtaem bae Lila i kasem baptaes! Blong hem i rere, hem i wantem blong ridim ol skripja evri dei.
Lila i openem skripja stori buk i go long fas pej. Anika mo Svetan oli fasfas kolosap blong save luk ol pikja.
“Lisin gud from bae mi askem ol kwestin afta,” Lila i talem. Afta hem i stat blong ridim fas japta.
“Bifo yumi bon, yumi bin laef long heven,” Lila i ridim. “Yumi no gat ol bodi yet. Yumi ol spirit.”
Lila, Anika, mo Svetan i lukluk ol pikja blong ol pipol we oli dresap long waet.
“?Rere from fas kwestin blong yu?” Lila i tanem hem i go long Anika. “?Yu kam wea bifo yu bon?”
Anika i klapem ol han blong hem. “!Heven!”
“Hemia i stret,” Lila i talem. “?Mo Svetan i kam wea?”
“Hem i kam long heven tu,” Anika i talem. Svetan i laflaf smosmol mo putum han blong hem insaed long maot blong hem. Lila mo Anika i laf. !Svetan i gat wan yia mo i wan naes bebi blong wan yia long Ajentina!
‘Ful famli blong yumi i kam long heven,” Lila i talem. “Jisas tu, i kam long heven. Hem i kam blong helpem yumi mekem se yumi save laef wetem Papa long Heven bakegen.” Lila i poen i go long pikja blong Jisas long pej ia.
Afta we hem i finis blong rid, Lila i wokem tingbaot se i bin olsem wanem blong save laef wetem Jisas long heven. Hem i wantem blong stap olsem Hem. !Oltaem hem i wantem blong jusum raet!
Long nekis dei long skul, bel blong Lila i mekem noes taem hem i stap wet long laen blong brekfas. Hem i save testem flaoa blong kek taem Senora Ruiz i putum i go long plet blong hem. !Oli smel gud tumas!
Afta Senora Ruiz i kasem wan kap blong melek. O o, Lila i tingting. Melek ia i luk olsem i moa dak bitim oltaem. Samtaem skul blong hem i stap ademap kofi o ti long ol dring.
“I gat eni kofi o ti long melek blong tedei?” Lila i askem.
Senora Ruiz i saksakem han blong hem. “Wan smol kofi,” hem i talem. “Bae yu no iven save testem.”
Lila i tingting blong wan smol taem. Hem i tingbaot olsem wanem hem i bin wantem blong stap moa olsem Jisas mo jusum raet. Hem i save se blong dring kofi i wan samting we ol profet oli talem blong no mekem.
“No, tangkyu. Bae mi no gat melek tedei,” Lila i talem. Hem i smael long Senora Ruiz. Mo afta hem i sidaon blong kakae.
Long naet ia, Lila i helpem papa blong hem blong wasem ol plet long kijin. Hem i stap tingbaot skripja stori ia yet. Hem i stap tingbaot melek ia tu.
“?Papa?”
“?Yes?” Papa i talem.
“?From wanem Papa long Heven i wantem yumi blong gat bodi?”
Papa i stap tingting long hemwan taem i rinsim wan nara plet. “Hem i givim bodi long yumi mekem se yumi save kam olsem Hem,” hem i talem. “Bodi blong yu i wan hom blong spirit blong yu. Hemia nao wanem yumi minim taem yumi talem ol bodi blong yumi oli ol tempol.”
Lila i saksakem hed blong hem blong agri. !Hem i bin singsing wan singsing abaot hemia long Praemeri samtaem! “?Hemia ia nao from wanem Papa long Heven i wantem blong yumi lukaot gud long bodi blong yumi?”
“Hemia stret wantaem,” Papa i talem.
“Tedei long skul, oli putum sam kofi long melek,” Lila i talem. “Mi no bin dring. Mi stap traem blong lukaot long tempol blong mi.”
“Mi glad long yu,” Papa i talem. Hem i waepem ol han blong hem i drae long wan tawel mo i givim wan hag long Lila.
Lila i haggem Papa strong. Hem i hapi blong lukaot long bodi we Papa long Heven i bin givim long hem. ●