Smol Kat blong Bred
Hem we i raet i stap long Vemon, YSA.
“Taem we yufala i stap wok blong ol narafala man, yufala i stap mekem wok blong God blong yufala nomo” (Mosaea 2:17).
Sammy i openem ol ae blong hem mo i pulum bigfala win. Hem i save smelem wan samting we i naes tumas blong kakae.
!Mmmm, Papa i stap mekem bred! Sammy i tingting long hemwan.
Papa i stap bekem bred blong famli evri Satedei. Sammy i laekem blong wajem hem i karemaot ol naes braon bred long oven. Oltaem Papa i givim fas pis blong bred we oli katem i go long Sammy.
Be tedei i no Satedei, Sammy i tingting. ?From wanem Papa i stap bekem bred?
Sammy i kamaot long bed mo i go long kijin. Hem i askem long Papa se wanem i stap hapen.
“?Yu tingbaot wanem bisop blong yumi i askem yumi blong mekem?” Papa i askem.
Sammy i saksakem hed blong hem se yes. “Hem i bin askem yumi blong helpem ol pipol. Mo mi bin helpem Sista Martin blong karem ol basket blong hem i go antap long ol step, ?yu tingbaot?”
“Yu bin mekem wan gudfala wok,” Papa i talem. “Mi bin prea abaot olsem wanem mi save help. Mi gat wan aedia blong bekem bred blong serem.”
Sammy i lukluk i go insaed long windo blong oven. Hem i kaontem ol bred.
“Wan… tu … tri … fo. ?Bae yu givim ol bred ia long huia?”
“Hemia i wan samting we mi nidim help blong yu long hem,” Papa i talem. “I gat wan bred blong Sista Martin. Mo tu bred blong famli Miller. Bae yumi givim namba fo bred long huia?”
Sammy i tingting long hemia.
“?Be Mista Lee?” Sammy i askem. Mista Lee i stap laef long wan apatmen bilding blong olgeta. Hem i no stap go aotsaed tumas. Fulap taem hem i stap wajem ol pipol long windo blong hem nomo.
“Hemia wan gudfala aedia,” Papa i talem.
Afta we bred i tan, Sammy i helpem Papa blong kavremap ol bred. Afta hem i go long kat blong hem. Hem i putum ol bred insaed.
“!Kat blong bred i rere blong ron!” Sammy i talem.
Papa i helpem Sammy blong pulum kat. Hat blong Sammy i filim naes mo wom, !semmak olsem ol bred ia we oli stap wantem blong serem nao! ●