Ol Eksampol we I Soem Strong Paoa long Tingting
Sapraes Misin Kol
Edwin Dharmaraju i smael taem i wokbaot i kamaot long eapot mo san i saen long hem. Hem i save luk ol pam tri oli laen long ol strit mo smel blong ol spaes long wan maket we i stap kolosap. Hem mo waef blong hem, Elsie, !i kambak long India! Oli bin stap laef long Samoa be naoia oli kambak hom bakegen.
Edwin mo Elsie i no kam blong visit nomo. Oli bin singaotem tufala blong wok olsem ol misinari blong Jos Ia blong Jisas Kraes Ia blong Ol Lata-dei Sent. Edwin i harem i fraet smol. Be hem i save se Papa long Heven bae i helpem tufala. Papa long Heven i bin helpem tufala fulap taem finis.
Edwin mo Elsie oli bon long India. Be Edwin nao i bin harem faswan abaot Jos taem hem i stap go long skul long Yunaeted Stet. Hem i bin go long jos wan taem long we. Hem i iven ridim Buk blong Momon. Be taem hem i gobak long India, hem i fogetem abaot Jos.
Sam yia afta, Edwin mo Elsie i filim se tufala i mas muv i go long Samoa. Edwin i wan saentis blong ol bebet, mo hem i tekem wan wok long aelan ia blong mekem sam wok mo stadi. Long we nao, Edwin mo Elsie tufala i mitim ol misinari. Taem Edwin i ridim Buk blong Momon bakegen, hem i filim wan spesel samting. Elsie i ridim Buk blong Momon tu. Oli bin jusum blong kasem baptaes, tugeta wetem ol boe mo gel blong tufala.
Afta we oli joenem Jos, wanem we Edwin i wantem moa !i blong famli blong hem long India i lanem abaot gospel! !Problem se i no gat ol misinari long India blong tijim olgeta! Edwin mo Elsie i raetem wan leta i go long hedkwota blong Jos blong askem olgeta blong sendem ol misinari i go long India.
Wanem we i kam afta long hemia i wan bigfala sapraes. Presiden Spencer W. Kimball i singaotem olgeta !blong wok olsem ol misinari long India!
Mo naoia, tufala hemia.
Fas stop blong tufala long India hem i long haos blong brata blong Edwin. Papa, mama, mo ol brata mo sista blong Edwin i stap long we tu. Kwik taem nomo, Edwin mo Elsie i stat blong tijim olgeta. Famli blong olgeta i hapi blong lanem abaot gospel.
Sam wik afta, Edwin mo famli blong hem i kam tugeta raonem pul blong swimswim we i stap long yad blong brata blong hem. Oli bin klinim pul, pentem gud, mo fulumap wetem fres wota. Evriwan i bin werem waet klos. Ol woman oli werem ol longfala kaliko we oli hangem ova long ol solda blong olgeta. Ol man oli werem ol slakslak jaket we i stael blong India mo ol traoses.
Edwin i stanap insaed long pul wetem papa blong hem. “Samuel David,” Edwin i talem, “Jisas Kraes i givim raet long mi, blong baptaesem yu long nem blong Papa, mo Pikinini mo Tabu Spirit.”
Edwin i filim glad taem i baptaesem papa blong hem. Hem i filim moa glad taem i baptaesem mama blong hem nekis wan. Long en blong dei, !Edwin i baptaesem 18 pipol!
Long nekis dei, Edwin mo Elsie i ron long tren blong sikis aoa. Oli visitim moa memba blong famli mo tijim olgeta abaot gospel. Edwin i baptaesem fo moa long ol famli blong hem long wan reva we i stap kolosap.
Long en, Edwin mo Elsie i ron long tren blong 16 aoa blong visitim papa mo mama blong Elsie. Papa blong Elsie i wan lida blong wan nara jos. Hem i no kasem baptaes, be hem i bin ting se Buk blong Momon i wan gud buk. Hem i help blong transletem Buk blong Momon i go long Telugu, wan long ol lanwis we oli stap toktok long hem long India.
Taem Edwin mo Elsie i finisim misin blong tufala, !i bin gat inaf niu memba blong statem wan long ol fas branj blong Jos long India! Edwin mo Elsie oli hapi taem oli gobak long Samoa. !Oli talem tangkyu tumas long Papa long Heven blong sendem tufala i go long wan misin! ●