“Rikirake inanon Tuan te Kaotioti,” Riaona, Tianuare 2021
Ni katoa namwakaina Riaona Te Rongorongo, Tianuare 2021
Rikirake inanon Tuan te Kaotioti
I kaungako bwa kam na toui mwiin mwaneka bwa kona ongora raoi bwanaan te Uea n taainako n te aro bwa ko aonga ni karekea te ota are E tangiria n anganiko.
Tamnei iroun Getty Images
N Tebetembwa 30, 2017, imwiin te tetere n te bwakantaai n te maungatabu ni kabuta, I nakon te onaoraki n nooria bwa e uara kaain au kooram ae tangiraki ae Unimwaane Robert D. Hales. E rin n te onaoraki imwiin rotakina ni mamaaran burona tabeua te bong mai imwaaina.
E kakukurei mwanangara ngke ti kawaria, ao e taraa n iai te marurung teutana irouna. E bon ikeike i bon irouna, are bon te kanikina ae iai te nakoraoi.
N te tairiki anne, n aki atakina, e taetae te Tamnei inanou ao n au iango bwa I riai n okira te onaoraki n te Tabati. N tain te tetere ni maungatabu n te Tabati, e a manga moan oki te namakin ae korakora anne. I namakinna bwa I riai n taona au tai ni katawanou ao ni kawaekoaai nako rarikin ana kainiwene Unimwaane Hale imwaain banen te moan tetere, ao I bon karaoia.
Ngke I roko, I a kona n noora Unimwaane Hale bwa e tabe ni kerikaaki marurungin rabwatana. Ae kananokawaki, e mate 10 te miniti imwiin rokou, ma I kakaitau bwa I mena irarikina ma buuna ae kakate, ae Mary, ao uoman natiia mwaane ngke e kitana te maiu aei.
I kakaitau bwa I anganaki te wirikiriki mairoun te Tamnei ae Raoiroi bwa N na karaoa te bwai ae ngke e mena ao N a bon aki karaoia. Ao I kakaitau ibukin koauan te kaotioti bwa e a manga moan kaukaki riki karawa.
N te ririki aei katuruan ara taratara ibukin te kamatebwai n ae onoti n te kiraatiruum bon iaon Reirei ao Berita aika Tabu. Taian “kaotioti mai eta aikai ao katanoata n ana kairi te tamnei” a kona ni kakabwaiaia ni kabane ake a kamatebwai ao ni mwakuri iaon kaetieti mai ieta. A kaoia “aomata ni kabane bwa a na ongo bwanaan te Uea Iesu Kristo,”1 bwa ni koauana “bwanaan te Uea e bon nakoia aomata ni kabane” (Reirei ao Berita aika Tabu 1:2).
Kabuanibwai, Rotongitong, Mwamwanaaki
Angibuaka n te rabwata ao n te tamnei bon mwakoron te maiu iaon te aba, n aron ae ti kauringaki n te buti n aoraki ae te COVID-19. N te tai are imwaain Kauaokina, e a tia te Tia Kamaiu n taekin rokonboong aika a na rang karawawata . E taku, “A na roko rongo, ao aoraki aika kamamate, ao mwaeiein te aba n taabo aika mwaiti” (Iotebwa Timiti—Mataio 1:29).
N raonaki ma te karawawataki n aron aei bon rikiraken te rotongitong ao te mwamwanaaki are ti a katobibiaki iai. Ngkai Iesu e tuangiia Ana reirei, “E na korakora te buakaka” imwaain okina (Iotebwa Timiti—Mataio 1:30).
E rangi ni korakora ana kairoro Tatan ao e un ni kaitarai ana mwakuri te Uea ao nakoira ngaira ake ti kabaeaki n te mwakuri. Ibukin rikiraken taian kangaanga ake ti kaitara ma ngaai, kainnanora ibukin kairakira mai eta e a rangi ni kakorakoraaki riki, ao ara kekeiaki n ongo bwanaan Iesu Kristo—te Tia Raoi ibukira, ara Tia Kamaiu, ara Tia Kabooira—e tuai man kawaekoaki n aron ae ngkai.
N aron ae I taku imwiin weteau n riki bwa te Beretitenti n te Ekaretia, e a tauraoi te Uea ni kaota Ana iango nakoira. Anne teuana Ana kakabwaia ae moan te korakora nakoira.2
Inanon ara bong, E berita, “Ngkana ko bubuti, ko na karekea te kaotioti teuana i mwin te kaotioti teuana, te atatai teuana i mwin te atatai teuana” (Reirei ao Berita aika Tabu 42:61).
I ataia e na kaekai ara bubuti.
Ti na Kanga n Ongo Irouna
N ataakina bwa e kanga te Tamnei n taetae e bon kakawaki ni boong aikai. Ni karekea oin ara kaotioti, ni kakaei taian kaeka, ao ni karekea te kamanomano ao te kairiiri, ti uringa te banna are e kateia ibukira te Burabeti Iotebwa Timiti.
Te moan, ti kabanei nanora ni booki aika tabu. Karaoana e kauki ara iango ao nanora nakon ana reirei ao ana koaua te Tia Kamaiu. Ana taeka Kristo “a na tuangi [ra] bwaai ni kabane aika [ti] riai ni karaoi” (2 Nibwaai 32:3), ai moarara riki inanon tai n nanououa ao ni kamangaongao.
Imwiina tina tataro. Te tataro e kainnanoa mwakuriana, ngaia are ti nanorinano imatan te Atua, kakaea te tabo ae rau ike ti kona n nanako iai ni katoa tai, ao ni bunra nanora Nakoina.
E taku te Uea, “Kaaniai ao N na kaaningkami; botumwaaka n ukoukorai ao kam na kuneai; bubuti, ao kam na karekea; karebwerebwe, ao e na kaukaki nakoimi.” (Reirei ao Berita aika Tabu 88:63).
Ni kaaniaki ma te Uea e uota te raunnano ao te kaunganano, kantaninga ao te kamaiuaki. Ngaia are, ti tataro n arana ibukin tabeaiangara ao mamaarara, n te bwai are e tangiria nanora, ake ti tangiriia, nakoara ao ara titiraki.
Ngkanne ti kakauongo.
Ngkana ti tiku ni maan iaon bubuan waera ibukin teutana te tai imwiin tiara n tataro, iango, namakin, ao kaetieti a na roko nakon ara iango. N tauii mwiin namakin aikai a na buokiira n uringnga tera mwakuri ae tangiria te Uea bwa ti na anai.
Ngkai ti kaokioka te waaki aei, ti na bon, n ana taeka te Burabeti Iotebwa Timiti, “rikirake inanon tuan te kaotioti.”3
N Tau ni Karekea te Kaotioti
Kanakoraoan ara konabwai ni kinaa ana wirikiriki te Tamnei ae Raoiroi ao ni karikirakea ara konabwai ni karekea te kaotioti e kainnanoa te kororaoi. Arom ae tau e aki kainnanoa te kororaoi, ma e kainnanoa aei ti riai ni kekeiaki ni karikirakea te itiaki.
Te Uea e kainnanoa te kekeiaki ni katoa bong, te nakoraoi ni katoa bong, ao te rairannano ni katoa bong. Arom ae tau e uota te itiaki, ao te itiaki e karekea ae tau ibukin te Tamnei ae Raoiroi. Ngkai ti butimwaea “te Tamnei ae Raoiroi ibukin kairaki [ra]” (Reirei ao Berita aika Tabu 45:57), ti tau ibukin oin ara kaotioti.
Ngkana iai te bwai ae tuukira man kaukan te mataroa nakon kairi mai i karawa, ti riai n rairinanora. Te rairannano e anganiira te kona ni kauka te mataroa bwa ti na kona n ongo bwanaan te Uea n tainako n ae mwaiti riki ao ni mataata riki.
“E mataata te kainibaire,” e reirei Unimwaane David A. Bednar man te Kooram n Abotoro n te Tengaun ma Uoman. “Ngkana te bwai ae ti iangoia, nooria, ongo, ke ni karaoia e kararoaira mairoun te Tamnei ae Raoiroi, ngkanne ti riai ni katoka iangoana, taratarana, ongoraeakinana, ke karaoan te bwai anne. Ngkana te bwai are e na kakukurei, n aron te katooto, e kararoaira mairoun te Tamnei, ngkanne ni koauana te aekaki ni kamataku anne bon tiaki ibukira. Ibukina bwa e aki kona ni mena te Tamnei ni baika aki karinerine, a kammaira, katein kunnikai aika kabwakabwaka, ngkanne n ae mataata raoi bwaai n aekakin aikai bon tiaki ibukira.”4
Ngkana ti ikota rikiraken te itiaki ao te ongotaeka ma te aki mamatam, te nanomwaaka n ukeuke, kamatebwai booki aika tabu ao aia taeka burabeti aika a maiu, ao mwakurin te tembora ao rongorongon te utu, e na kaukaki karawa. Te Uea, ni kaboan mwiina, e na kakoroa bukin Ana berita: “N na kaota nakoim Tamneiu, are e na kaotaa am iango” (Reirei ao Berita aika Tabu 11:13).
Ti bon riai n taotaonaki n nano, bwa te Atua e na taetae nakoira n oin Ana kawai ao n oin Ana tai.
Tamnein te Atatai
E taetae Iobi, “Bon iai te tamnei i nanon te aomata: ao e kawanawana te aba iken Teuare moan te Mwaka” (Iobi 32:8). N te ririki ae boou aei, I kaungako bwa ko na toui mwiin mwaneka bwa kona ongora raoi bwanaan te Uea n taainako n te aro bwa ko aonga ni karekea te ota are E tangiria n anganiko.
Imwaain maten Unimwaane Hale ni bongin Okitobwa n 2017, e katauraoa ana marooro ae uarereke ibukin te maungatabu ni kabuta are e aki reke ana tai n anga. N te marooro anne, e koreia, “Ara onimaki e katauraoira bwa ti na kona ni maeka irarikin te Uea.”5
Ngkana ti karekea te kaotioti, ti kabanea ara tai ni maeka ma te Atua ngkai E kaota ana iango, kantaninga, ao bwanaana nakoira (taraa Reirei ao Berita aika Tabu 68:4). Ti bia kamwakura ara onimaki, ni wetea arana, ni kororaoi ni maiuakin Ana berita n ana kairi te tamnei, ao ni mwakuri iaon kairi ake ti karekei.
© 2020 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki i USA. Kariaiakaki n te Ingiriti: 6/19. Kariaiakaki rairana: 6/19. Rairan te Monthly Liahona Message, January 2021. Kiribati. 17463 859