God I Talem long Yumi blong Kasem Baptaes.

Sapos yumi bigwan inaf mo save inaf blong talem wanem i defren bitwin wanem i raet mo rong, Papa long Heven i wantem yumi blong kasem baptaes (Luk long Doktrin mo Ol Kavenan 18:42). Jisas i stret i gud evriwan, be yet Hem i jusum blong kasem baptaes blong folem komanmen blong God (Luk long Matiu 3:13– 17; 2 Nifae 31:7). Iven olgeta we oli ded finis oli save akseptem baptaes. Yumi givim long olgeta taem yumi baptaes blong olgeta insaed long ol tempol. (Luk long Doktrin mo Ol Kavenan 128:15–18.)

Jisas i no bin kasem baptaes long eni kaen man. Hem i go stret long kasen blong hem Jon, we i gat prishud atoriti we i kam long God. Afta we Jisas i ded mo oli bin kilim ded ol disaepol blong Hem, prishud atoriti i bin lus long wol. Afta, long 1829, Jon Baptaes i bin kamaot long Josef Smit mo givim long hem atoriti blong mekem baptaes long nem blong God. Be tru long restoresen, yumi save kasem baptaes wetem semmak atoriti tedei.

Baptaes i wan tu(2)‑wei promes, o kavenan, bitwin yumi mo God. Yumi promes:

1. Blong tekem long yumiwan nem blong Kraes.

2. Blong Tingbaot Hem Oltaem.

3. Blong obei ol komanmen blong Hem.

Afta, God i promes se Spirit blong Hem bae i stap wetem yumi oltaem. Ol toktok blong prea blong sakramen i rimaenem yumi long kavenan ia evri wik. (Luk long Doktrin mo Ol Kavenan 20:77, 79.)

Afta Jisas i bin baptaes, Tabu Spirit i bin kamaot long saen blong wan pijin (Luk long 2 Nifae 31:8). Tedei, afta we ol pipol oli kasem baptaes, oli konfemem olgeta. Hemia i minim se oli kasem wan spesel blesing we oli invaetem olgeta blong kasem presen blong Tabu Spirit we i klinim man long saed blong spirit. (Luk long 2 Nifae 31:17). Tabu Spirit i save wonem yumi long saed blong denja, kamfotem yumi, gaedem yumi blong mekem ol gudfala desisen, mo helpem yumi filim lav blong God (Luk long Doktrin mo Ol Kavenan 39:6).

God i save se bae yumi save mekem ol mistek. I nomata long ol hadwok blong yumi, bae yumi sin mo stap longwe long ol promes blong baptaes blong yumi. Mekem se Hem i givim long wanwan long yumi janis blong sakem sin. (Luk long Doktrin mo Ol Kavenan 18:13.) Evri dei yumi save mekem bes blong yumi blong talem sore mo mekem wanem i rong, i raet. Yu save prea mo askem God blong fogivim yumi. Afta, taem yumi tekem sakramen wetem wan hat we i stap daon, yumi save gat Tabu Spirit wetem yumi (Luk long 3 Nifae 18:11).

Papa mo mama, tufala i mas helpem ol pikinini oli rere blong kasem baptaes (luk long Doktrin mo Ol Kavenan 68:–25).

Ol smol pikinini we oli nogat eit yia, oli no nid blong kasem baptaes (luk long Moronae 8).

Taem yumi baptaes, yumi promes blong “krae wetem olgeta we oli krae; … leftemap tingting blong olgeta we oli nidim fasin blong leftemap tingting, mo blong stanap olsem ol witnes blong God evri taem mo long evri samting, mo long evri ples” (Mosaea 18:9).