“Sa Vakabulai Keda o Jisu Karisito mai na iValavala Ca kei na Mate,” Liaona, Epereli 2021
iTukutuku Vakavula ni Liaona Epereli, 2021
Sa Vakabulai Keda o Jisu Karisito mai na iValavala Ca kei na Mate
Ena vuku ni Nona solibula, sa noda taucoko na madigi meda kune vakacegu kei na reki tawamudu.
Sa Bulia na Vuravura na Karisito, mai vei Robert T. Barrett
Eda tukuni Jisu Karisito ni sa noda iVakabula. Oqori baleta ni a sauma o Koya na isau ni noda ivalavala ca ka uabaleta qaqa yani na kaukauwa ni mate. Sa vakabulai keda o Koya! Na Nona solibula ena vukuda, e vakatokai na Veisorovaki, sa ikoya na cakacaka bibi duadua e sa bau yaco. Ena Vukuna, sa sega ni icavacava na mate. Ena Vukuna, sa rawa ni da vosoti ena noda ivalavala ca, savasava tale tu, ka tubu vinaka cake ena veisiga yadua.
O Jisu Karisito E a Ulumatua
Ni bera na lako mai ki vuravura, eda a bula vata tu kei na noda itubutubu vakalomalagi. Me vaka ni sa Ulumatua, a veivuke o Jisu Karisito ena kena buli na vuravura totoka oqo. A digitaki o Koya me noda iVakabula ka vakadonuya me mai sucu e vuravura me rawa Vua me tuvanaka e dua na ivakaraitaki vinaka sara, vakatavulica na Nona kosipeli, ka vakacavara na Veisorovaki ena vukuda.
Oi Kemuni Tamaqu, mai vei Simon Dewey
Sa Sauma o Jisu Karisito na Noda iValavala Ca
Ni sa kila o Jisu ni sa na vakarau mate, a lako o Koya ki na dua na were ka vakatokai ko Kecisemani me masu. Ena loma ni masu o ya, sa tekivu me sauma o Koya na isau ni noda ivalavala ca. A yalorawarawa o Koya me vakararawataki me da kakua kina ni sotava—kevaka eda veivutuni. Ni da gole tani mai na noda ivalavala ca ka muria tikoga na iVakabula, sa rawa ni da kunea na veivosoti kei na veivakabulai. Ena vuku ni veika a sotava mai Kecisemani, e kila vakavinaka sara tu ga o Jisu se vakacava tu na keda ituvaki. A vakila o Koya na noda rarawa, tauvimate, kei na mosi kecega. Oqo na matai ni tiki ni Veisorovaki.
Na Bulu i Karisito, mai vei Carl Heinrich Bloch
A Uabaleta Qaqa na Mate o Jisu Karisito
Ni oti na Nona masu e Kecisemani, a soli yani o Jisu, vesu, ka totogitaki me mate ena kauveilatai. E dina ga ni sa kaukauwa-mai na ka kecega o Koya, a vakatarai Koya o Jisu me mate ena kauveilatai. Era a vakotora na Yagona ena yalololoma o ira na Nona imuri ena dua na ibulubulu. Era sega ni kila ni dina ga ni sa mate na Yagona, a se bula tikoga na Yalona ena vuravura ni yalo. Ni oti e tolu na siga, sa bula tale mai o Jisu ka sikovi ira, ka vakadinadinataka tu ni sa rawa ni qaqa o Koya mai na mate. Sa mai vakacavari kina na Veisorovaki. Ena vuku ga ni sa tucake tale o Jisu, eda na bula vakayadua tale ni oti na noda mate.
Sa Bula Tiko o Koya, mai vei Simon Dewey
Na iBalebale ni Siganisucu kei na Siganimate
Era marautaka e levu sara e vuravura e rua na olidei e vukei keda meda vakananuma kina na Veisorovaki i Jisu Karisito. Ena gauna ni Siganisucu, eda nanuma ena vakavinavinaka ni a yalorawarawa tu ko Jisu me ciqoma na ilesilesi ni lako mai ki vuravura, e dina ga ni oka kina na veivakararawataki kei na mate ena vukuda. Na Siganimate e marautaka na qaqa ni iVakabula mai na ivalavala ca kei na mate, ka sa solia vei keda na inuinui ki na dua na reki tawamudu ena veisiga ni mataka.
Sa Kacivi Pita kei Adriu na Karisito, mai vei James Taylor Harwood
Na Cava e Tukuna na iVolanikalou me baleta na Veisorovaki ni iVakabula?
Me vaka ni kilai keda vakavinaka sara o Jisu, sa rawa ni “vukei,” keda se lomani keda (raica na Alama 7:11–12).
Sa kila vinaka tu na iVakabula na noda rarawa kei na mosi (raica na Aisea 53:2–5).
Sa talai Jisu mai na Kalou me vakabulai keda baleta ni sa lomani keda vakayadua na Kalou (raica na Joni 3:16–17).
A masulaki ira na Nona imuri o Jisu, oka kina o keda, meda taqomaki mai na veika butobuto ka meda duavata kei Koya kei na Tamada Vakalomalagi (raica na Joni 17).
Sa sureti keda na noda iVakabula meda muri Koya ka lesu ki na Nona iserau (raica na Vunau kei na Veiyalayalati 19:16–19, 23–24; 132:23).
© 2021 mai na Intellectual Reserve, Inc. Dodonu kece e taqomaki Tabaki e Amerika. Vakadonui me vaka-Valagi: 6/19. Vakadonui me vakadewataki: 6/19. iVakadewa ni Monthly Liahona Message, April 2021. Fijian. 17467 858