“Iesu Kristo e Kamaiuira man te Bure ao te Mate,” Riaona, Eberi 2021
Ni katoa namwakaina Riaona Te Rongorongo, Eberi 2021
Iesu Kristo e Kamaiuira man te Bure ao te Mate
Ibukin Ana anganano, ngaira ni kabane ti karekea te tai ni karekea te rau ao te kimwareirei ae akea tokina.
Christ and the Creation (Kristo ngke E Karika te Aonaaba), iroun Robert T. Barrett
Ti arana Iesu Kristo bwa ara Tia Kamaiu. Anne ibukina bwa E kabooira man ara bure ao e tokanikai iaon te mate. E kamaiuira! Ana anganano ibukira, e aranaki bwa te Mwakuri ni Kamaiu, bon te kabanea ni kakaawaki n te bwai are ea tia n riki. Bwa ibukina, te mate bon tiaki te toki. Bwa ibukina, a kona ni bane ni kabwaraaki ara bure, manga kaitiakaki, ao n rikirake n tamaroa ni katoa bong.
Iesu Kristo Bon te Rikitemanna
Imwain rokora n te aonaaba, ti maeka ma ara karo ake i karawa. Ngkai te Moan bungiaki, Iesu Kristo e buoka karikan te aonaaba ae tamaroa aei. E rineaki bwa e na riki bwa ara Tia Kamaiu ao e kariaia bwa e na bungiaki nako aon te aba bwa E aonga ni katea te banna ni katoto ae kororaoi, reirei Ana euangkerio, ao ni katia te Mwakuri ni Kamaiu ibukira.
O Tamau, iroun Simon Dewey
Iesu Kristo E Kabooi Ara Bure
Ngke e a ataia Iesu bwa e nang mate, E nakon te onaroka are e aranaki bwa Ketemwane n tataro. Inanon te tataro anne, E waaki ni kabooi ara bure. E tauraoi ma nanona ni korakai bwa ti aonga ngaira n aki korakai—ngkana ti rari nanora. Ngkai ti rairakinako man ara bure ao n onea mwiina n iriira te Tia Kamaiu, ti kona ni karekea kabwaraan ara bure ao ni kamarurungaki. Ibukin te bwai are e rinanona i Ketetemwane, Iesu e atai raoi arora n tatabemaniira nako. E namakina ni kabane rawawatara, aorakira, ao marakira. Aio te moan mwakoro n te Mwakuri ni Kamaiu.
Taunakin Kristo, iroun Carl Heinrich Bloch
Iesu Kristo E Tokanikai iaon te Mate
Imwiin Ana tataro i Ketetemwane, Iesu e bwainikirinaki, kabureaki, ao e motikaki taekana bwa e na mate iaon te kaibangaki. E ngae ngke bon iai irouna te mwaaka ni kabane, Iesu e kariaia bwa e na mate iaon te kaibangaki. Taan ririmwiina a katuka rabwatana ma te tangira inanon te ruanimate. A aki ataia bwa e ngae ngke e mate rabwatana, Tamneina e bon teimatoa ni maiu n te aonaaba n tamnei. Teniua te bong imwiina, Iesu e a manga maiu ao e kawariia, ni kakoaua bwa E kona n tokaninkai iaon te mate. Aio e na kabwanina te Mwakuri ni Kamaiu. Ibukina bwa Iesu e mangauti, ngaira n tatabemaniira ti na manga maiu imwiin matera.
E Maiu, iroun Simon Dewey
Nanon te Kiritimati ao te Itita
Angiin te aonaaba a bukamarui bong ni motirawa aika uoua ake e buokiia n uringa ana Mwakuri ni Kamaiu Iesu Kristo. N tain te Kiritimati, ti uringnga ma te kakaitau bwa Iesu e a tia n anganano ni butimwaea te mition n roko iaon te aba, e ngae ngke e na raonaki n te korakai ao te mate ibukira. Te Itita e bukamarua ana tokanikai te Tia Kamaiu iaon te bure ao te mate, are e anganiira te kantaninga ibukin te kimwareirei n taai aika a na roko ae akea tokina.
Kristo ngke e wetea Betero ao Anterea, iroun James Taylor Harwood
Tera ae e Taekinaki n Koroboki aika a Tabu iaon Ana Mwakuri ni Kamaiu te Tia Kamaiu?
Ibukina bwa Iesu e kinaira raoi, E kona n anga “kamaiuara,” ke ni buokiira (taraa Aramwa 7:11–12).
Te Tia Kamaiu e atai rawawatara ao kainnanora (taraa Itaia 53:2–5).
Te Atua e kanakoa Iesu bwa e na kamaiuira ibukina bwa te Atua e tangiriira n tatabemaniira (taraa Ioane 3:16–17).
Iesu e tataro ibukiia taan iriiria, n raonaki ma ngaira, bwa tina kawakinaki mairoun teuare e buakaka ao ni katiteuanaaki ma ngaia ao Tamara are i Karawa (taraa Ioane 17).
Te Tia Kamaiu e kaoira bwa ti na rimwiina ao n oki nakoina (taraa Reirei ao Berita aika Tabu19:16–19, 23–24; 132:23).
© 2021 iroun Intellectual Reserve, Inc. A bane n tauaki mwiin taian kariaia ibukin katootongana. Boreetiaki i USA. Kariaiakaki n te Ingiriti: 6/19. Kariaiakaki rairana: 6/19. Rairan te Monthly Liahona Message, April 2021. Kiribati. 17467 859