“Hom Nkyerɛw Nto Hɔ,” For the Strength of Youth, Ayɛwoho 2021, 18–19.
Bosoom Bosoom For the Strength of Youth Amandzɛɛbɔ, Ayɛwoho 2021
Hom Nkyerɛw Nto Hɔ
Erekyerɛw adwen a ɔba ber a irusũa kyerɛwsɛm no bɔboa wo ara yie ma ehu adze.
Asɛmpasomafo bi kãa kyerɛɛ ne nsɛmpakã president no dɛ “Ber biara mehyɛ ase dɛ merekenkan kyerɛwsɛm no, nda fa me!” “Ɔtse dɛ ma kyerɛwsɛm no ayɛ edur a mefa dze da!”
Ne president no buaa dɛ, “Ana erekenkan a ekyerɛw nsɛnsin a?”
Asɛmpasomafo no buaa dɛ, “Oho.”
“Ɔyɛ mberɛw dɛ ebɛda anaa ebɛma w’adwen ekyinkyin ber a erekenkan nko no, mbom sɛ edze akyerɛw kã ho a, nnkɛda ara da,” president no kãe.
Afotu yi a asɛmpakã president yi dze maa n’asɛmpasomafo a oridzi aper no nyaa nsunsuando mapã. Ntsi sɛ erohwehwɛ kwan fofor dze ahyɛ wo kyerɛwsɛm adzesũa dzen a, yɛ iyi hwɛ. Ber a ekyerɛw dza erekenkan ho asɛm no, ibohu dɛ edze woho ahyɛ mu yie na iruhu adze yie so.
Akwan horow a yeehu dɛ ɔyɛ mfaso binom nye yi.
Onuabanyin Steven Lund:
Sɛ merekenkan a medze krataa to me nkyɛn. Ber a murusũa adze no, sɛ Sunsum no kenyan me a, mekyerɛw dɛm nkenyan no to hɔ.
Minyaa adwenkyerɛ yi fii Elder Richard G. Scott (1928–2015) a ɔkã Asomafo Duebien no hɔn Quorum ho no hɔ, a ɔkãa dɛ: “Kyerɛw to bambɔ bea ndzɛmba a ho ohia a esũa efi Sunsum no hɔ. Ber a erokɔ do akyerɛw nkenyan a ɔsombo horow no, ibohu dɛ, pii bɛtaa aba. Nyimdzee no a inya no so bɔwɔ hɔ ama wo wɔ w’abrabɔ nyina mu” (“To Acquire Knowledge and the Strength to Use It Wisely,” Ensign, Obiradzi 2002, 32).
Minyim dɛ dɛm nsɛm no yɛ nokwar. Ber a meyɛ kasa anaa adzekyerɛ ho ahoboa no, nnyɛ kyerɛwsɛm no nko na mohwɛ, mbom dza makyerɛw ato hɔ so ber a merekenkan kyerɛwsɛm no.
Onuabanyin Ahmad Corbitt:
Mepɛ nsɛngyinado adzesũa. Mekenkan kyerɛwsɛm no fi ahyɛse kesi ewiei, naaso mepɛ so dɛ miyiyi mu na musũa nsɛngyinado horow. Mfatoho, medze Kyerɛwsɛm ho Kwankyerɛ no hwehwɛ gyedzi anaa Israel mboano ho nsɛm wɔ kyerɛwsɛm no mu. Na mennkyerɛw nsɛnsin nko, mbom mekyerɛw dza murusũa no ama meesi no tadua dɛ maatse ase yie. Ɔyɛ me nwanwa aber biara dɛ menya ndzɛmba horow ho ntseasee ara yie ber a meyɛ dɛm no. Mesan mu yi so dɛ mubosũa kyerɛwsɛm no bi egu me tsir mu.
Onuabanyin Bradley Wilcox:
Misie adzesũa journal a mekyerɛw kyerɛwsɛm no wɔ mankasa me nkasafua mu. Mfatoho, “Honammunyi yɛ ɔtamfo ma Nyankopɔn” (Mosiah 3:19) bɛyɛ “Nyimpa ahantan a onnu noho no san mu yi dɛ ɔbɛyɛ ɔtamfo ma Nyankopɔn, mbom Nyankopɔn nnyɛ ne tamfo. Nyankopɔn nye ne nyɛnko mapã.”
Mekyerɛw nsɛmbisa horow so. Obotum ayɛ nsɛmbisa ahorow a morodwendwen ho ansaana mebɛkenkan, anaa obotum ayɛ nsɛmbisa a dza makenkan no epuhim. Kwan biara no ɔma mitsim.
Erekyerɛw W’Adwendwen no mu Tum.
Hɛn presidency mu no, ɔson ɔbaako biara kwan a ɔdze sũa kyerɛwsɛm no, naaso hɛn nyina yɛkyerɛw ber a yerusũa no.
Akenkan boa hɛn ma adwendwen na nkã-tse tsena hɛn mu. Ɔno ho hia. Na ber a yɛkasa anaa yɛkyerɛw no, yehu na yɛda adwendwen na nkã-tse a ɔhyɛ hɛn mu no edzi. Yenya atsenkã dɛ ɔno boa hɛn ma asɛmpa no nokwar no yɛ hɛn dze ara yie.
Aberantsɛba bi bohun nokwar yi maa noho ber a wobisaa no dɛ ɔnkasa wɔ sacrament nhyiamu ase no. Nna ɔatse nkorɔfo pii binom a wɔakasa naaso nna ɔnnkaa nsɛm ne nyina. Na ber yi yɛ soronko. Ber a ɔkyerɛɛw nankasa ne kasaa n’apɔwdo apɔwdo no, ɔammboa no ma ɔannkã n’asɛm no esiado esiado nko, mbom ɔkaa dza ɔkãe no mber pii ekyir no.
Adze kor yi ara botum esi wɔ wo kyerɛwsɛm adzesũa mu. Sɛ ibue wo kyerɛwsɛm mu na ereda a, mber no asõ dɛ ebɛtsew w’enyiwa. Bɔ mbɔdzen yi pɛnsel, pɛn, foon, anaa kɔmputa na hyɛ ase kyerɛw. Nsesã a ɔbɛba no bɛyɛ wo nwanwa!
© 2021 odzi wɔ Intellectual Reserve, Inc. All rights reserved. Wotsintsimii wɔ USA. Ngyiresi Borɔfo kasa ngye ntomu: 6/19. Nkyerɛase ngye ntomu: 6/19. Monthly For the Strength of Youth Message, July 2021ne nkyerɛasee. Fante. 17471 502