Hɛn Ɔsor Egya Pɛ dɛ Hɛn Enyiwa Gye

Nyankopɔn dze hɛn aba asaase do, bea a yebotum enya honandua (hwɛ Genesis 1:26–27). Yehia honandua ama ɔaboa hɛn ma yeetum asɔ asaase do abrabɔ.

Nyankopɔn nyim dɛ nnyɛ ber biara na yebenya enyigye. Yɛbɔsɔw nkõgu, yaw, na owu mpo. Naaso abrabɔ mu ɔhaw horow mu no, Ɔsor Egya boa hɛn ma yesũa adze na yenyin.

Nyankopɔn dze hɛn pɛ maa hɛn, tum a yɛdze san mu yi papa fi bɔn ho. Ɔma hɛn kwan ma hɛnankasa yɛsan mu yi dza yɛbɔdwen ho na yɛbɛyɛ. Ɔama hɛn kyerɛwsɛm na nkɔnhyɛfo atseasefo a wɔboa hɛn ma yehu dza oye a yɛbɛsan mu eyi (hwɛ Abraham 3:25).

Nyankopɔn annye hɛn ammba asaase do a Ɔamma hɛn fasusu a yendzi do (hwɛ John 13:15). Nyankopɔn somaa Ne Ba, Jesus Christ, dɛ Ɔmbɛkyerɛ hɛn kwan pa no. Ama yeehu mbrɛ yebesi bɛka No do no, yebotum akenkan kyerɛwsɛm no dze ehu Ne nyimpa ban na dza Ɔyɛe wɔ N’abrabɔ ber mu wɔ asaase do. Yebotum so ayɛ dza yebotum nyina dze ayɛ setsie ama Nyankopɔn na yɛadodɔ nkaafo ama yɛayɛ tse dɛ Christ ara yie.

Sɛ yɛfom a, yɛserɛ bɔnfakyɛ na yetwe Jesus Christ No Werdambɔ mu tum no dze boa hɛn ma yɛsesã. Yebotum enya enyigye ber a dabiara yɛbɔ mbɔdzen dɛ yɛbɛyɛ dɛ Ɔno ara yie.

Sɛ yewu a, hɛn esunsum kɔ sunsum wiadze. Hɔ no yɛkɔ do sũa adze ber a yɛyɛ Wusoɛr ho ahoboa no.

Wusoɛr mu no, hɛn honandua na esunsum bɔbɔ mu bio. Hɛn honandua bedzi mu, na yennkowu anaa yɛnnkɛyar ara bio (hwɛ Alma 11:44–45). Tse dɛ mbrɛ Jesus Christ wui na Ɔbaa nkwa mu bio no, hɛn nyina bɛtsena ase bio.

Sɛ Nyankopɔn bua hɛn atsɛn a, Obeker hɛn ndzeyɛɛ na hɛn apɛdze. Sɛ yɛabɔ mbɔdzen dɛ yebesie mbrasɛm na anohoba no a yɛbɔe maa Ɔsor Egya a, na yebotum yɛnye No atsena bio.

Celestial ahenman mu no, yɛnye Nyankopɔn na Jesus Christ bɛtsena. Yebotum so yɛnye hɛn ebusua ebusua atsena hɔ afebɔɔ sɛ wɔasɔw hɛn ano a. Yebenya asomdwee, enyigye, na ahomgye (hwɛ Mosiah 2:41).

Ɔtɔfabi a hɛn asaase do abrabɔ bɛyɛ dzen, naaso sɛ yɛka Jesus Christ do a, yebotum enya dɛwdzi wɔ abrabɔ yi mu na onnyiewiei enyigye wɔ abrabɔ a ɔbɛba no mu.

Mbrɛ yesi bɔ hɛn bra no hia. Nyankopɔn bobua hɛn atsɛn na Ɔama hɛn akatua wɔ mbrɛ hɛn adwendwen na hɛn ndzeyɛɛ tse (hwɛ Alma 41:3).

Satan yɛ hɛn enyigye ho tamfo. Ɔsɔ hɛn hwɛ dɛ yɛbɔbɔ bra gyangyan wɔ asaase do na yɛayɛ bɔn. Ɔpɛ nyimpa nyinara hɔn mbɔbɔryɛ dɛ mbrɛ ɔnoara so tse (hwɛ 2 Nephi 2:27).

Sɛ yenya gyedzi wɔ Nyankopɔn ne nhyehyɛɛ a Ɔwɔ ma hɛn no mu a, yebotum enya asomdwee a nsɔhwɛ biara yɛrɛfa mu no mmfa ho. Yebotum ahwɛ kan dɛ yɛnye Nyankopɔn bɛtsena afebɔɔ (hwɛ Nkyerɛkyerɛ na Ahyɛmudzi 59:23).