« បព្វជិតភាពគឺជាព្រះចេស្ដារបស់ព្រះ » លីអាហូណា ប្រចាំខែ សីហា ឆ្នាំ ២០២១
សារលិខិត លីអាហូណា ប្រចាំខែ សីហា ឆ្នាំ ២០២១
បព្វជិតភាពគឺជាព្រះចេស្ដារបស់ព្រះ
ព្រះប្រទានពរដល់យើងតាមរយៈអំណាចនៃបព្វជិតភាព ។ ពរជ័យបព្វជិតភាពគឺមានសម្រាប់មនុស្សគ្រប់គ្នា ។
បព្វជិតភាពគឺជាព្រះចេស្ដារបស់ព្រះ ។ ទ្រង់ប្រើព្រះចេស្ដានេះ ដើម្បីប្រទានពរដល់បុត្រាបុត្រីទាំងអស់របស់ទ្រង់ ហើយជួយពួកគេឲ្យត្រឡប់ទៅរស់នៅជាមួយទ្រង់វិញ ។ ព្រះបានប្រទានអំណាចបព្វជិតភាពដល់បុត្រាបុត្រីរបស់ទ្រង់នៅលើផែនដី ។ ដោយមានអំណាចនេះ ថ្នាក់ដឹកនាំបព្វជិតភាពអាចដឹកនាំសាសនាចក្រ ហើយអ្នកកាន់បព្វជិតភាពអាចធ្វើពិធីបរិសុទ្ធដ៏ពិសិដ្ឋ ដូចជាពិធីបុណ្យជ្រមុជទឹក ដែលជួយយើងឲ្យមកកាន់តែជិតព្រះ ។ បុរស និងស្ដ្រីគ្រប់រូបដែលទទួលបានពិធីបរិសុទ្ធបព្វជិតភាពដោយភាពស័ក្ដិសម ហើយបានចុះសេចក្ដីសញ្ញា ( សេចក្ដីសន្យាដ៏ពិសិដ្ឋ ) មានសិទ្ធិទទួលបានព្រះចេស្ដារបស់ព្រះ ។
អំណាចបព្វជិតភាពត្រូវបានប្រទានដល់យ៉ូសែប ស្ម៊ីធ
កាលព្រះយេស៊ូវគ្រីស្ទគង់នៅលើផែនដី ទ្រង់បានដឹកនាំសាសនាចក្ររបស់ទ្រង់ដោយអំណាចបព្វជិតភាព ។ ទ្រង់ក៏បានប្រទានអំណាចនេះដល់ពួកសាវករបស់ទ្រង់ផងដែរ ។ អស់ជាច្រើនសតវត្សរ៍បន្ទាប់ពីពួកលោកបានស្លាប់ទៅ នោះសមាជិកជាច្រើនបានវង្វេងចេញពីសាសនាចក្រ ។ ពួកគេបានផ្លាស់ប្ដូរដំណឹងល្អ និងរបៀបដែលសាសនាចក្របានដំណើរការដោយមិនត្រឹមត្រូវ ។ បព្វជិតភាពរបស់ព្រះលែងមានទៀតនៅលើផែនដីនេះ ។ នៅឆ្នាំ ១៨២៩ ព្រះយេស៊ូវបានបញ្ជូន យ៉ូហាន-បាទីស្ទ និងសាវកពេត្រុស យ៉ាកុប និងយ៉ូហាន ឲ្យមកផ្ដល់បព្វជិតភាពដល់យ៉ូសែប ស្ម៊ីធ ។ សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយគឺជាស្ថាប័នតែមួយគត់នៅលើផែនដី ដែលមានសិទ្ធិអំណាចនេះមកពីព្រះ ។
សំឡេងពេត្រុស យ៉ាកុប និង យ៉ូហាន ដោយ លីនដា ឃើរលី គ្រីស្ទានសិន និង ម៉ៃឃើល ធី ម៉ម
កូនសោបព្វជិតភាព
កូនសោបព្វជិតភាពគឺជាសិទ្ធិអំណាចដើម្បីដឹកនាំការប្រើប្រាស់បព្វជិតភាព ដូចជាការផ្ដល់ការអនុញ្ញាតឲ្យធ្វើពិធីបរិសុទ្ធ ។ ព្រះយេស៊ូវគ្រីស្ទកាន់កូនសោទាំងអស់នៃបព្វជិតភាព ។ ប្រធាននៃសាសនាចក្រគឺជាបុគ្គលតែម្នាក់គត់នៅលើផែនដី ដែលអាចប្រើប្រាស់កូនសោបព្វជិតភាព ដើម្បីដឹកនាំសាសនាចក្រទាំងមូលបាន ។ នៅក្រោមការដឹកនាំរបស់លោក មនុស្សដទៃទៀតអាចប្រើកូនសោមួយចំនួនដើម្បីធ្វើកិច្ចការរបស់ព្រះ ។ ថ្នាក់ដឹកនាំដូចជា ប៊ីស្សព និងប្រធានស្ដេកប្រើប្រាស់កូនសោបព្វជិតភាពដើម្បីដឹកនាំនៅក្នុងវួដ និងស្ដេករបស់ពួកលោក ។ ដោយសារការហៅឲ្យបម្រើគឺចេញមកពីថ្នាក់ដឹកនាំដែលមានកូនសោបព្វជិតភាព នោះបុរស និងស្ដ្រីដែលបម្រើនៅក្នុងការហៅទាំងឡាយ អនុវត្តសិទ្ធិអំណាចបព្វជិតភាព នៅពេលពួកគេបំពេញកាតព្វកិច្ចរបស់ពួកគេ ។
បព្វជិតភាពមិលគីស្សាដែក និងបព្វជិតភាពអើរ៉ុន
បព្វជិតភាពមានពីរផ្នែក ៖ បព្វជិតភាពមិលគីស្សាដែក និងបព្វជិតភាពអើរ៉ុន ។ តាមរយៈបព្វជិតភាពមិលគីស្សាដែក ថ្នាក់ដឹកនាំសាសនាចក្រដឹកនាំកិច្ចការខាងវិញ្ញាណទាំងអស់នៅក្នុងសាសនាចក្រ ដូចជាកិច្ចការផ្សព្វផ្សាយសាសនា និងព្រះវិហារបរិសុទ្ធ ។ បព្វជិតភាពអើរ៉ុនបំពេញមុខងារនៅក្រោមសិទ្ធិអំណាចនៃបព្វជិតភាពមិលគីស្សាដែក ។ វាត្រូវបានប្រើប្រាស់ដើម្បីធ្វើពិធីបរិសុទ្ធ ដូចជាពិធីបុណ្យជ្រមុជទឹក និងពិធីសាក្រាម៉ង់ជាដើម ។
ពរជ័យនៃបព្វជិតភាព
តាមរយៈសេចក្តីសញ្ញា និងពិធីបរិសុទ្ធ នោះព្រះបានធ្វើឲ្យពរជ័យបព្វជិតភាពកើតមានដល់បុត្រាបុត្រីរបស់ទ្រង់ទាំងអស់ ។ ពរជ័យទាំងនេះរួមមានពិធីបុណ្យជ្រមុជទឹក អំណោយទាននៃព្រះវិញ្ញាណបរិសុទ្ធ ពិធីសាក្រាម៉ង់ និងពិធីបរិសុទ្ធនៃព្រះវិហារបរិសុទ្ធ ។ បុរស និងស្ដ្រីដែលបានទទួលអំណោយទានពិសិដ្ឋនៅក្នុងព្រះវិហារបរិសុទ្ធ ទទួលបានអំណោយទាននៃអំណាចបព្វជិតភាពរបស់ព្រះតាមរយៈសេចក្ដីសញ្ញារបស់ពួកគេ ។ យើងក៏អាចទទួលបានពរជ័យបព្វជិតភាពនៃការព្យាបាល ការលួងលោម និងការដឹកនាំផងដែរ ។
តើព្រះគម្ពីរថ្លែងអ្វីខ្លះអំពីបព្វជិតភាព ?
បព្វជិតភាពដែលមានកាលពីសម័យបុរាណ គឺដូចគ្នានឹងបព្វជិតភាពដែលមាននៅសម័យនេះដែរ ( សូមមើល ម៉ូសេ ៦:៧ ) ។
កូនសោបព្វជិតភាពជួយធ្វើឲ្យប្រាកដថា យើងសម្រេចបានកិច្ចការរបស់ព្រះអម្ចាស់តាមរបៀបរៀបរយ ( សូមមើល គោលលទ្ធិ និង សេចក្តីសញ្ញា ៤២:១១ ) ។
បុរសដែលកាន់បព្វជិតភាព អាចប្រើប្រាស់បព្វជិតភាពបានតែ « ដោយគោលការណ៍នៃសេចក្ដីសុចរិតប៉ុណ្ណោះ » ( គោលលទ្ធិ និង សេចក្ដីសញ្ញា ១២១:៣៦ ) ។
កាតព្វកិច្ចមួយចំនួនរបស់អស់អ្នកដែលកាន់បព្វជិតភាពត្រូវបានពិពណ៌នានៅក្នុង គោលលទ្ធិ និង សេចក្តីសញ្ញា ២០:៣៨–៦៧ ។
© 2021 by Intellectual Reserve, Inc. All rights reserved. បោះពុម្ពនៅ ស.រ.អា. ។ ការអនុម័តជាភាសាអង់គ្លេស ៖ ៦/១៩ ។ ការអនុម័តឲ្យបកប្រែ ៖ ៦/១៩ ។ ការបកប្រែនៃ Monthly Liahona Message, August 2021 ។ Cambodian. 17472 258