“Na Peteriaki: O Cei o Ira Kei na Vuna e Bibi Kina,” Me iSakisaki ni iTabagone, Fepe. 2022.
iTukutuku e Veivula ni Me iSakisaki ni iTabagone Feperueri 2022
O ira na Peteriaki
O Cei o Ira Kei na Vuna e Bibi Kina
O sa na rairai rogoca beka me baleti Eparaama, Aisake, kei Jekope. Eda wilika vakawasoma na veika e baleti iratou ena iVola i Momani ka o sa na rogoca vakalevu cake sara ena nomu vulica tiko na Veiyalayalati Makawa ena yabaki oqo. Ni sa levu na nodratou kauwaitaki, e ratou sa rairai bibi sara, se vavei? Ia o na tarogi iko tiko beka, “Na cava na vuna e ratou bibi kina nikua e tolu na turaga e ratou a bula tiko ena vica na udolu na yabaki sa oti?” Ia, na usutu ki na isau ni taro oya e koto ga ena veiyalayalati tawamudu kei na veivakalougatataki yalataki a solia vei iratou na Kalou.
Eparaama
Droini mai vei Jarom Vogel
O Eparaama e a dua na parofita cecere. A ivalavala dodonu ka talairawarawa ki na ivakaro ni Kalou.
A papitaiso, ciqoma na matabete, ka vauci vei Sera na watina me tawamudu.
A vakayacora na Kalou e dua na veiyalayalati kei Eparaama ni na cecere na nona kawa ka ra na rawata na veivakalougatataki vata ga e a ciqoma o koya.
Era na kauta na taucoko ni kosipeli i Jisu Karisito ki na vei matanitu e vuravura.
Aisake
O Aisake e a luvedrau tagane o Eparaama kei Sera.
E a tukuna vei Eparaama na Kalou me cabori Aisake. E lomani Aisake o Eparaama ia a digitaka me talairawarawa vua na Kalou. Ni voleka sara toka ga na nona vakacabori Aisake o Eparaama, a tukuna e dua na agilosi vei Eparaama me kakua. Na lomasoli nei Eparaama kei Aisake me rau talairawarawa vua na Kalou sa ivakatakarakara ni Veisorovaki ni Luvena e Duabau ga na Kalou.
A yalataki vei Aisake na veivakalougatataki vata ga a caka vei Eparaama.
Jekope
Me vakataki tamana kei tukana, a yalodina tikoga o Jekope vua na Kalou.
Ena vuku ni nona yalodina, a veisautaka na Turaga na yaca i Jekope me Isireli, ka kena ibalebale “e dua sa lako vata tiko kei na Kalou” se “laiva me qaqa tikoga na Kalou” (raica na Bible Dictionary, “Israel”).
O Jekope a tinikarua na luvena tagane. O ira na luvena tagane oqo kei na nodra dui matavuvale era a qai kilai me ra yavusa i Isireli.
Na veiyalayalati a cakava na Kalou vata kei Eparaama e a vakavoutaki vei Jekope kei ira na luvena.
Na Peteriaki kei Iko
Ni ko sa lewe ni Lotu, o sa tiki ni kawa i Eparaama, Aisake, kei Jekope. Na veiyalayalati e ratou a vakayacora vata kei na Kalou sa vakawili talega vei iko!
Sa nomu na veivakalougatataki kei na itavi mo wasea na nomu ivakadinadina me baleta na iVakabula ka wasea na kosipeli.
O sa kacivi talega mo sureti ira na tamata kecega me ra vakayacora ka maroroya na veiyalayalati ka ciqoma na cakacaka vakalotu ni matabete. E kaya o Peresitedi Russell M. Nelson ni oqo e tiki taucoko ni nodra vakasoqoni vata o Isireli, ni sa “ka bibi duadua sa yaco tiko e vuravura nikua” (“Hope of Israel,” [lotu ni itabagone e vuravura raraba, 3 ni June, 2018], 8, ChurchofJesusChrist.org).
© 2022 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me vaka-Valagi: 6/19. Vakadonui me vakadewataki: 6/19. iVakadewa ni Monthly For the Strength of Youth Message, February 2022. Fijian. 18344 858