“Na Veiyalayalati e Semati Keda ki Vua na Kalou,” Liaona, Feperueri 2022
iTukutuku Vakavula ni Liaona Feperueri 2022
Na Veiyalayalati e Semati Keda ki Vua na Kalou
Na vakayacori kei na maroroi ni veiyalayalati ena kauta mai na veivakalougatataki.
Na veiyalayalati e sa dua na yalayala e cakava na Tamada Vakalomalagi kei ira na Luvena. E vakarautaka o Koya na veika e lavaki ena veiyalayalati eda cakava vata kei Koya. Ni da cakava na ka e kerea o Koya, eda na ciqoma e vuqa na veivakalougatataki. Ka da sega walega ni ciqoma na veivakalougatataki e vuravura—ni da cakava ka maroroya na veiyalayalati, eda na lesu ka da na la‘i bula vata kei na Kalou kei na noda matavuvale e lomalagi ena dua na siga.
Veiyalayalati kei na Cakacaka Vakalotu
Eda vakayacora na veiyalayalati ena so na gauna ni cakacaka vakalotu. Ena gadrevi me da ciqoma na vei cakacaka vakalotu ka talairawarawa ki na veiyalayalati oqori me rawa ni da lesu tale kina ka bula vata kei na Kalou. Na cakacaka vakalotu e vakayacori ga ena lewa ni matabete. Na cakacaka vakalotu oqori e oka kina na papitaiso kei na veivakadeitaki, ciqomi ni Matabete i Melikiseteki (vei ira na tagane), kei na cakacaka vakalotu eda ciqoma ena valetabu. Ena gauna ni sakaramede, era vakavouya na lewe ni Lotu na yalayala era sa vakayacora vua na Kalou (raica na Vunau kei na Veiyalayalati 20:77, 79).
Na Veiyalayalati ena Vukei Keda me da Bula Dodonu
Ena gauna ni papitaiso, eda yalataka me da muri Jisu Karisito, dau nanumi Koya tikoga, ka maroroya na ivunau (raica na Vunau kei na Veiyalayalati 20:37). Sa yalataka na Kalou ni na tiko ga kei keda na Yalo Tabu.
Ni ra ciqoma na tagane na matabete, era sa yalataka ni ra na bula kilikili kaya ena kaukauwa ni matabete ni Kalou. Sa yalataka na Kalou me vakalougatataki ira. (Raica na Vunau kei na Veiyalayalati 84:33–40.)
Droini ni Valetabu e Recife Brazil mai vei James Porter
Na Veiyalayalati eda Cakava ena Valetabu
Ni ra ciqoma na lewe ni Lotu na nodra edaumeni ena valetabu, era yalataka me ra bula dodonu ka solibula ena vuku ni kosipeli. E sa yalataki vei ira na kaukauwa mai vua na Kalou (raica na Vunau kei na Veiyalayalati 38:32; 109:22).
Ena veivauci ni valetabu, e rau sa vakamau e dua na tagane kei na yalewa vakawati ki na bula tawamudu ka yalataka ni rau na yalodina vakairau ka vakakina ki vua na Kalou. Sa yalataka na Kalou ni na rau na lesu tale yani Vua ka bula vakamatavuvale me tawamudu. (Raica na Vunau kei na Veiyalayalati 132:19–20.)
Eda sa Tamata ni Veiyalayalati.
O ira era sa mai lewena Na Lotu i Jisu Karisito ni Yalododonu Edaidai era sa yaco me ra tamata ni veiyalayalati ni Kalou. Era na rawata talega na veivakalougatataki kei na itavi ni veiyalayalati vaka-Eparaama (raica na Kalatia 3:27–29). Ni da sa tiki ni tamata ni veiyalayalati ni Kalou sa kena ibalebale ni da na veivukei vakai keda ni da toro voleka yani vei Karisito. Sa kena ibalebale talega ni da na cakacakataka me vakaqaqacotaki na Lotu ni Kalou e vuravura. Ni da maroroya na noda veiyalayalati, sa rawa ni da kunea na kaukauwa mai vua na Kalou.
© 2022 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me vaka-Valagi: 6/19. Vakadonui me vakadewataki: 6/19. iVakadewa ni Monthly Liahona Message, February 2022. Fijian. 18313 858