Met Afis non Raninfel Mwichen Mwichefel?

Ekkewe memper non ewe wart ika pranch ra chufengen iteiten Raninfel ren mwichen sakrament. (Ekkewe esapw chochon ach nuku ir mi ketiw ar repwe pwan fiti.) Ewe sakrament a katou ngeni ekkewe memper non ei mwich an epwe anisir ne chechemeni Jises Kraist (nengeni ewe April 2022 Nongonongen Kapas allim ren pwan ekkoch porous usun ewe sakrament). Ewe mwich a pwan pachenong iotek, konun mwareiti, me afanafan seni ekkewe memper usun ewe kapas allimen Jises Kraist.

Mwirin mwichen sakrament, memper repwe imutiw non ekkewe klas me mwich. Semirit ier 18 maram ngeni 11 ier repwe fiti Kinter. Non ewe aewin me ounungatin Raninfel iteiten maram, meinisin memper repwe fiti Sukunen Raninfel. Non ewe oruwen me oruanun Raninfel, repwe fiti Fin Anisi, Mwichen Fopun, ika mwichen pristut.

Iotek non mwichen Mwichefen a kawor seni ekkewe memper. Ekkewe iotek mi mecheres me emwen seni ewe Ngun mi Fel. Ekkewe memper ra nounou ekkewe kapas a pwarano tong me sufon ngeni Samach won Nang. Ei a pachenong nounoun ekkei kapas Thee, Thy, Thine, me Thou nupwen iotek ngeni I.

Emon memper seni ewe mwichen pisop ika presetensin pranch epwe tingorei ekkewe memper repwe uwei afanafanen ewe mwichen sakrament. Ekkei afanafan epwe anongonong won ewe kapas allimen Jises Kraist. Ekkewe chon afanafan ra nounou ekkewe pukefel me an ekkewe souemwenin Mwichefel kapas nupwen ra amonata ar afanafan. Repwe pwan pwarata ar kapasen pwarata usun feiochun ekkewe nongonongen kapas allim non manauer.

Mwirin mwichen sakrament, ekkewe memper repwe kaeo usun ewe kapas allim non kukun klas. Ekkewe nesen enip epwe usun ekkewe pukefel, afanafan seni mwichenapen mwichefel, ika ekkoch itenap. Ina mwo ika ewe sense epwe emweni ewe nesen, esap i chok epwe kapas. Meinisin memper non ewe klas repwe aea fengen ar ekiek usun ewe itenap.

Fan eu non eu maram, mwichen sakrament a pachenong eu mwichen kapasen pwarata. Napengeni ei a fis non ewe aewin Raninfel non ewe maram. Non ei mwich, ekkewe memper ra tongeni pwarata ar kapasen pwarata usun Jises Kraist me An kapas allim. Pwarata kapasen pwarata wewen pwe pwarata ennet ren ewe kapas allim minne sia angei seni ewe Ngun mi Fel.

Memper ra ammoneta ngeni mwichen Raninfel ren iotek, kaeo ekkewe pukefel, me moneta ne angei aninis seni ewe Ngun mi Fel. Ika pwe ra tingoreok kopwe uwei afanafan me asukuna ewe nesen, iotek me ekipwichi ifa usun om kopwe asukuna ekkewe nongonongen kapas allim. Nounou ekkewe pukefel. Pwarata usun ennet. Noum kewe souemwenin Mwichefel ra tongeni anisuk ne moneta, ika ka mochen.