Na Cava e Dau Vakayacori ena Veisoqoni ni Lotu ena Sigatabu?

Era dau soqoni vata na lewe ni tabanalevu se tabana ena vei Sigatabu yadua me baleta na soqoni ni sakaramede. (E sa dola tale tale tu ga na katuba ki vei ira ka duidui na nodra vakabauta.) E dau soli na sakaramede vei ira na lewenilotu ena soqoni oqo me vukea na nodra nanumi Jisu Karisito (raica na itukutuku ni iVakavuvuli Taumada ni Kosipeli ni Epereli 2022 me baleta na ikuri ni ivakamacala ni sakaramede). Na soqoni oqo e oka talega kina na masu, sereivakatagi ni sokalou, kei na itavi vosa mai vei ira na lewenilotu me baleta na kosipeli i Jisu Karisito.

Ni oti na soqoni ni sakaramede, era dau dui tawase na lewenilotu ki na veikalasi kei na kuoramu eso. O ira na gonelalai mai na vula 18 ki na yabaki 11 era gole ki na kalasi ni Lalai. Ena imatai kei na ikatolu ni Sigatabu ni veivula, o ira kece na lewenilotu tale eso era na tiko ena Matawilivola ni Sigatabu. Ena ikarua kei na ikava ni Sigatabu, era na vakaitavi ena soqoni ni iSoqosoqo ni Veivukei, Goneyalewa, se kuoramu ni matabete.

Na masu ena veisoqoni ni Lotu era dau cabora na lewenilotu. Na masu e dau rawarawa ga ka dusimaki mai vua na Yalo Tabu. Era dau masu na lewenilotu ena nodra cavuta na vosa e vakaraitaka na loloma kei na veidokai vua na Tamada Vakalomalagi. Oqo e oka kina na kena vakayagataki na vosa Kemuni, Nomuni, kei na O ni ni masuti tiko o Koya.

Era dau kerei o ira na lewenilotu mai vua e dua na lewe ni matabisopi se mataveiliutaki ni tabana me ra vosa ena soqoni ni sakaramede. Na vei itavivosa oqo e dau vakanamata ki na kosipeli i Jisu Karisito. Era dau vakayagataka o ira era vosa na ivolanikalou kei na nodra vosa na iliuliu ni Lotu ni ra vakarautaka na nodra itavivosa. Era dau wasea talega na ivakadinadina ni veivakalougatataki ni ivakavuvuli ni kosipeli ena nodra bula.

Ni oti na soqoni ni sakaramede, era dau vulica na lewenilotu na kosipeli ena nodra iwasewase lalai. Na lesoni e rawa ni baleta na ivolanikalou, ivakavuvuli mai na koniferedi raraba, se so tale na ulutaga. E dina ga ni dau liutaka na lesoni o qasenivuli, ia e sega ni veivunauci. E rawa ni ra wasea na lewe ni kalasi taucoko na nodra nanuma me baleta na ulutaga.

Vakadua e veivula, e dau okati ena soqoni ni sakaramede e dua na soqoni ni soli ivakadinadina. E dau vakayacori oqo ena imatai ni Sigatabu ni veivula. Ena soqoni oqo, sa rawa ni ra wasea na lewenilotu na nodra ivakadinadina me baleti Jisu Karisito kei na Nona kosipeli. Na wasei ni ivakadinadina e kena ibalebale me vakatusai na dina ni kosipeli ena veivakauqeti ni Yalo Tabu.

Era dau vakavakarau na lewenilotu ki na veisoqoni ni Sigatabu ena masu, vulici ni ivolanikalou, kei na nodra tuvakarau me ra ciqoma na veivakauqeti mai vua na Yalo Tabu. Kevaka o kerei mo vakaitavi ena vosa se vakavulica e dua na lesoni, vakasamataka ena masumasu na sala o rawa ni vakavulica kina na ivakavuvuli ni kosipeli. Vakayagataka na ivolanikalou. Wasea na ivakadinadina ni veika dina. E rawa ni ra vukei iko na nomu iliuliu ni Lotu ena nomu vakavakarau, kevaka e gadrevi.