Digitaka

Na noda rawata me da digitaka ka cakacaka vakataki keda e vakatokai me galala ni digidigi. E sa dua na tiki bibi ni ituvatuva Nona na Tamada Vakalomalagi. E dua na inaki ni bula oqo sa ikoya me da vakaraitaka ni da digitaka me da talairawarawa ki na ivakaro ni Kalou me rawa ni da vakataki Koya vakalevu cake kina. Eda na lewai me vaka na noda digidigi. (Raica na 2 Nifai 2:27; Vunau kei na Veiyalayalati 101:78; Eparaama 3:25.)

A vakauqeti ira na nona tamata o Josua me ra digitaka na “edaidai,” se ena gauna sara ga oqo. E rawa ni da vakayaco digidigi bibi eso vakadua ka me da qai tovolea me da yalodina kina. (Raica na Same 37:5.)

Ena tikina oqo, mo veiqarava e kena ibalebale mo sokalou, veivuke, talairawarawa, ka yalodina vua e dua. E dodonu me da qarava na Turaga (raica na Mosese 1:15).

Era vakaroti na Isireli me ra qarava ga na Kalou dina ka bula, o Jisu Karisito (raica na Lako Yani 20:2–5). A solia o Josua na ivakaraitaki ni kalou tale eso me ra kakua ni sokalou kina na nona tamata. Na kalou tale eso ena noda bula e rawa ni oka kina na veika eda taukena, na nodra nanuma o ira na tani, na veika taleitaki tale eso—na veika cava ga e kauti keda tani mai vua na Turaga.

E vosa o Josua ena vukuna kei na nona lewenivale. A kaya o koya ni ratou na qarava na Turaga. A vinakata me liutaka vakadodonu na nona matavuvale ka vakavulici iratou me ratou muria na Turaga (raica na Vunau kei na Veiyalayalati 93:40).