Jusum

Paoa ia blong save jusum mo tekem aksen blong yumiwan oli singaotem fridom blong mekem joes. Hem i wan impoten pat long plan blong Papa long Heven. Wan stamba tingting blong laef ia i blong soem se bae yumi jusum blong obei olgeta komanmen blong God mekem se bae yumi save kam olsem Hem. Bae oli jajem yumi folem ol joes we yumi mekem. (Luk long 2 Nifae 2:27; Doktrin mo Ol Kavenan 101:78; Ebraham 3:25.)

Josua i toktok strong long ol pipol blong hem blong jusum “dei ia,” o naoia. Yumi save mekem ol impoten joes wan taem nomo mo traem stap tru long hem. Luk long Ol Sam 37:5

Long ves ia, blong givim seves i minim blong wosip, helpem, obei, mo stap tru long yuwan o wan man. Yumi sud givim seves long Lod (luk long Moses 1:15).

God i givim komanmen long Israel blong givim seves long wan tru God ia nomo we i stap laef, Jisas Kraes (luk long Eksodas 20:2–5). Josua i givim ol eksampol blong ol narafala god we ol pipol blong hem i no mas wosip long hem. Ol narafala god long laef blong yumi, i save: ol samting we yumi gat, ol tingting blong ol narafala man, ol narafala samting we yumi laekem—eni samting we i save tekem yumi i go longwe long Lod.

Josua i toktok blong hemwan mo famli blong hem. Hem i talem se bae hem i givim seves i go long Lod. Hem i wantem lidim famli blong hem wetem stret mo gud fasin mo tijim olgeta blong folem Lod (luk long Doktrin mo Ol Kavenan 93:40).