?Wanem I Stap Hapen long Ol Jos Miting long Sandei?

Ol memba blong wod o branj oli kam evri Sandei blong sakramen miting. (Iven, olgeta we oli no blong jos blong yumi, oli welkam blong kam long jos.) Sakramen oli givim long ol memba long miting ia blong helpem olgeta oli tingbaot Jisas Kraes. (Luk long Eprel 2022 Ol Besik blong Gospel atikol blong moa infomesen abaot sakramen). Ol miting ia i gat ol prea, wosip miusik, mo ol toktok we ol memba oli givim abaot gospel blong Jisas Kraes.

Afta long sakramen miting, ol memba oli seraot i go long ol klas mo ol kworom. Ol pikinini we yia blong olgeta i stat long 18 manis kasem 11 yia, oli go long Praemeri. Long fas mo nambatri Sandei blong evri manis, evri memba oli go long Sandei Skul. Long nambatu mo nambafo Sandei, oli go long Rilif Sosaeti, Yang Woman, o miting blong kworom blong prishud.

Ol prea long ol miting blong Jos ol memba nao oli givim. Ol prea ia oli simpol mo Tabu Spirit nao i talem long olgeta wanem nao blong talem. Ol memba oli prea oli yusum ol toktok we i talemaot lav mo respek blong olgeta long Papa long Heven. Oli stap yusum ol toktok ia, Yu we yu Masta; blong Yu, Papa; blong Yu we Yu Hae, mo Yu Papa taem oli toktok long Hem.

Wan memba blong bisoprik o branj presidensi i askem ol memba blong givim toktok long sakramen miting. Ol toktok ia oli lukluk nomo long gospel blong Jisas Kraes. Olgeta we oli toktok oli yusum olgeta skripja mo ol toktok blong ol lida blong Jos taem oli stap rere long ol toktok blong olgeta. Oli serem testemoni blong olgeta abaot ol blesing blong gospel long laef blong olgeta.

Afta long sakramen miting, ol memba oli lanem moa abaot gospel long ol smol klas. Ol lesen maet bae hem i abaot olgeta skripja, ol tijing blong jeneral konfrens o ol narafala topik. Nomata tija bae i lidim lesen, e i no blong tija nomo i toktok. Evri memba blong klas oli save serem tingting blong olgeta abaot topik ia.

Wan taem long manis, sakramen miting ia, hem i wan testemoni miting. Hemia i hapen long fasfala Sandei blong manis. Long miting ia,ol memba oli save serem testemoni blong olgeta abaot Jisas Kraes mo gospel blong Hem. Blong talem testemoni, hem i minim blong talemaot ol trutok blong gospel olsem we Tabu Spirit i givim insperesen long yu.

Ol memba oli rere blong ol Sandei miting taem oli prea, stadi olgeta skripja, mo rere blong kasem insperesen blong Tabu Spirit. Sapos oli askem yu blong givim toktok o tijim wan lesen, tingting hevi long olsem wanem yu save tijim ol gospel prinsipol ia. Yusum olgeta skripja. Serem testemoni blong trutok. Ol Jos lida blong yu oli save helpem yu rere, sapos yu nidim.