“Zinyuleleni,” Okwenzelwe Ukomeleza uLutsha, EyeSilimela 2022.
UMyalezo weNyanga Okwenzelwe Ukomeleza uLutsha, EyeSilimela 2022.
Zinyuleleni
UYoshuwa wakhuthaza abantu bakhe ukuba benze ukhetho olulungileyo—ukulandela iNkosi.
zinyuleleni
Ukwazi kwethu ukukhetha kwaye sizenzele ngokokwethu kubizwa ngokuba inkululeko yokuzikhethela. Iyinxalenye ebalulekileyo yecebo likaBawo oseZulwini. Injongo enye yobubomi kukubonisa okokuba sizakukhetha ukuthobela imiyalelo kaThixo ukuze sibe nokuba njengaYe ngakumbi. Siyakugwetywa ngokokukhetha kwethu. (Bona 2 Nifayi 2:27; IMfundiso neMinqophiso 101:78; Abraham 3:25.)
namhla
UYoshuwa wakhuthaza abantu bakhe okokuba bazinyulele “namhla,” okanye ngoku. Singenza ukhetho olubalulekileyo kube kanye size emva koko sizame ukuhlala sizibophelele kulo. (Bona Iindumiso 37:5.)
khonza
Kulo mqolo, ukukhonza kuthetha ukunqula, ukuncedisa, ukuthobela, kunye nokuzinikela emntwini. Kumele sikhonze iNkosi (bona Moses 1:15).
oothixo
USirayeli wayeyalelwe ukuba akhonze kuphela uThixo oyinyaniso nophilayo, uYesu Krestu (bona Eksodus 20:2–5). UYoshuwa wanikela imizekelo yabanye oothixo ababengafanele banqulwe ngabantu bakhe. Abanye oothixo ebomini bethu banokuquka izinto esinazo, iingcinga zabanye, eminye iminqweno—nantoni na esisusa eNkosini.
mna nendlu yam
UYoshuwa wayethethela isiqu sakhe kunye nendlu yakhe. Yena wathi baya kukhonza iNkosi. Yena wayefuna ukukhokela usapho lwakhe ngobulungisa kwaye alufundise ukulandela iNkosi (bona IMfundiso neMinqophiso 93:40).
© 2022 yi Intellectual Reserve, Inc. All rights reserved. Ishicilelwe eMelika. Isivumelo sesiNgesi: 6/19. Isivumelo senguqulelo: 6/19. Inguqulelo ye Monthly For the Strength of Youth Message, June 2022. Xhosa. 18315 774