« តើរាត្រីជួបជុំក្រុមគ្រួសារគឺជាអ្វី ? » លីអាហូណា ខែ សីហា ឆ្នាំ ២០២២ ។
សារលិខិត លីអាហូណា ប្រចាំខែ សីហា ឆ្នាំ ២០២២
តើរាត្រីជួបជុំក្រុមគ្រួសារគឺជាអ្វី ?
រាត្រីជួបជុំក្រុមគ្រួសារគឺជាពេលវេលាមួយដែលបានកំណត់ទុកនៅក្នុងសប្ដាហ៍សម្រាប់ក្រុមគ្រួសាររបស់អ្នកដើម្បីជួបជុំគ្នា ។ នៅក្នុងអំឡុងពេលនេះ អ្នកអាច « រៀនដំណឹងល្អ ពង្រឹងទីបន្ទាល់ កសាងសាមគ្គីភាព និងរីករាយជាមួយគ្នាទៅវិញទៅមក » ( ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ, ២.២.៤, គេហទំព័រ ChurchofJesusChrist.org ) ។ រាត្រីជួបជុំក្រុមគ្រួសារគឺមានលក្ខណៈខុសៗគ្នាសម្រាប់ក្រុមគ្រួសារនីមួយៗ ។ ប៉ុន្តែគោលបំណងគឺដើម្បីប្រើពេលវេលានេះ ដើម្បីខិតកាន់តែជិតគ្នា និងកាន់តែជិតព្រះអង្គសង្គ្រោះ ។
ការរៀបចំខ្លួន
សូមគិតអំពីសកម្មភាពមួយដែលគ្រួសាររបស់អ្នកចូលចិត្ត និងប្រធានបទដំណឹងល្អមួយដែលអ្នកចង់ពិភាក្សា និងរៀនជាមួយគ្នា ។ ជាមួយគ្នានោះដែរ សូមជ្រើសរើសថ្ងៃមួយ និងពេលវេលាមួយជារៀងរាល់សប្ដាហ៍ជាពេលដែលសមាជិកគ្រួសារភាគច្រើន ឬទាំងអស់គ្នាអាចជួបជុំគ្នា ។ សាសនាចក្រលើកទឹកចិត្តសមាជិកឲ្យធ្វើរាត្រីជួបជុំក្រុមគ្រួសាររៀងរាល់យប់ថ្ងៃចន្ទ ។ ប៉ុន្តែ ក្រុមគ្រួសារអាចជួបជុំពេលណាដែលល្អបំផុតសម្រាប់ពួកគេ ។
ការអធិស្ឋាន
ក្រុមគ្រួសារជាច្រើនចាប់ផ្ដើម និងបញ្ចប់រាត្រីជួបជុំក្រុមគ្រួសារដោយការអធិស្ឋាន ។ ការអធិស្ឋាននេះអញ្ជើញព្រះវិញ្ញាណបរិសុទ្ធចូលមកក្នុងផ្ទះរបស់ពួកគេ ។ រាត្រីជួបជុំក្រុមគ្រួសារគឺជាពេលវេលាដ៏ល្អមួយសម្រាប់កុមារ និងមជ្ឈិមវ័យដើម្បីរៀនអធិស្ឋានជាមួយក្រុមតូចមួយ ។
តន្ត្រី
ក្រុមគ្រួសារជាច្រើនក៏មានចម្រៀងបើក និងចម្រៀងបិទផងដែរ ។ ជាទូទៅ ពួកគេជ្រើសរើសចម្រៀងចេញពីសៀវភៅទំនុកតម្កើង ឬសៀវភៅចម្រៀងកុមារ ។ សាសនាចក្រមានការថតចម្លងភ្លេងព្យាណូនៃទំនុកតម្កើងនៅលើគេហទំព័រ music.ChurchofJesusChrist.org ។ អ្នកក៏អាចទស្សនាវីដេអូរបស់ក្រុមចម្រៀងរោងឧបោសថនៅវិសាលដ្ឋានព្រះវិហារបរិសុទ្ធផងដែរ ។ ការច្រៀងអំឡុងរាត្រីជួបជុំក្រុមគ្រួសារជួយសមាជិកឲ្យរៀនទំនុកតម្កើងដែលច្រៀងនៅព្រះវិហារ ។
មេរៀន
សាសនាចក្រមាននូវធនធានជាច្រើនដែលអាចជួយដល់រាត្រីជួបជុំក្រុមគ្រួសារ ។ អ្នកអាចចំណាយពេលពីរបីនាទីដើម្បីអាន និងពិភាក្សាប្រធានបទមួយនៅក្នុងទស្សនាវដ្ដី លីអាហូណា ប្រិយមិត្តឬ ដើម្បីកម្លាំងនៃយុវជន ។ វាក៏អាចជាពេលមួយដើម្បីទស្សនា និងពិភាក្សាវីដេអូនានារបស់សាសនាចក្រផងដែរ ។ ឬក៏អ្នកអាចអានសុន្ទរកថាមួយមកពីសន្និសីទទូទៅ អានព្រះគម្ពីរ ឬពិភាក្សាអំពីការអាន ចូរមកតាមខ្ញុំ នៃសប្ដាហ៍នោះ ។
ការចូលរួមរបស់គ្រួសារ
កុមារអាចរួមចំណែកនៅក្នុងរាត្រីជួបជុំក្រុមគ្រួសារ ។ ពួកគេអាចជួយដាក់ផែនការសម្រាប់សកម្មភាព អធិស្ឋាន ឬជ្រើសរើស និងដឹកនាំចម្រៀង ។ ពួកគេក៏អាចបង្រៀនផងដែរ ។ មុនរាត្រីជួបជុំក្រុមគ្រួសារ អ្នកអាចជួយកូនរបស់អ្នកអានរឿងមួយនៅក្នុងទស្សនាវដ្ដី ប្រិយមិត្ត ឬរឿងនៅក្នុងព្រះគម្ពីរដែលពួកគេចូលចិត្ត ។ កុមារអាចនិទានរឿងនោះទៅឲ្យគ្រួសារស្ដាប់ដូចជាមេរៀន ។ កុមារជាច្រើនចូលចិត្តសម្ដែងរឿងនៅក្នុងព្រះគម្ពីរសម្រាប់រាត្រីជួបជុំក្រុមគ្រួសារផងដែរ ។ សូមឲ្យកុមារធំៗរៀបចំមេរៀន ឬជ្រើសរើសសុន្ទរកថានៃសន្និសីទទូទៅដែលពួកគេចង់អាន ។ បន្ទាប់មកឲ្យពួកគេដឹកនាំការពិភាក្សានោះ ។
សកម្មភាព
ក្រុមគ្រួសារជាច្រើនរីករាយនឹងការធ្វើសកម្មភាពដែលជាផ្នែកមួយនៃរាត្រីជួបជុំក្រុមគ្រួសារ ។ សកម្មភាពក្នុងផ្ទះអាចជាការលេងល្បែងនានា ធ្វើសិប្បកម្ម ឬចំអិនអាហាររួមគ្នា ។
សម្រាប់សកម្មភាពក្រៅផ្ទះ អ្នកអាចដើរលេង ទៅឡើងភ្នំជាលក្ខណៈគ្រួសារ ឬលេងកីឡានៅខាងក្រៅជាមួយគ្នា ។ សូមស្វែងរកសកម្មភាពមួយដែលសមាជិកគ្រួសារអាចធ្វើ និងសប្បាយរីករាយទាំងអស់គ្នា ។ សូមចៀសវាងការប្រកួតប្រជែងដែលអាចនាំឲ្យបាត់បង់ព្រះវិញ្ញាណ ។
ការបម្រើ
រាត្រីជួបជុំក្រុមគ្រួសារគឺជាពេលវេលាដ៏អស្ចារ្យមួយសម្រាប់ក្រុមគ្រួសារក្នុងការបម្រើមនុស្សដទៃ ។ ឧទាហរណ៍ ៖ អ្នកអាចជួយដល់អ្នកជិតខាងដែលមានវ័យចំណាស់ ចែកអាហារនៅទីជម្រកសម្រាប់អ្នកគ្មានផ្ទះសម្បែង សរសេរសំបុត្រទៅកាន់អ្នកផ្សព្វផ្សាយសាសនា ឬរើសសម្រាម ។
© 2022 by Intellectual Reserve, Inc. All rights reserved. បោះពុម្ពនៅ ស.រ.អា. ។ ការអនុម័តជាភាសាអង់គ្លេស ៖ ៦/១៩ ។ ការអនុម័តឲ្យបកប្រែ ៖ ៦/១៩ ។ ការបកប្រែនៃ Monthly Liahona Message, August 2022 ។ Cambodian 18316 258