“Yintoni Umhlangano Wangorhatya?” Liyahona EyeThupha 2022.
UMyalezo wangeNyanga weLiyahona EyeThupha 2022
Yintoni Umhlangano Wangorhatya?
Umhlangano wangorhatya lixesha elibekelwe bucala ngexesha leveki ukuze usapho lwakho luhlanganisane. Ngeli xesha, ningakwazi “ukufunda ivangeli, ukomeleza ubungqina, ukwakha umanyano, kwaye sonwabele omnye nomnye” (General Handbook: Serving in The Church of Jesus Christ of Latter-day Saints,2.2.4, ChurchofJesusChrist.org). Umhlangano wangorhatya ukhangeleka wahlukile ngandlela ithile kusapho ngalunye. Kodwa injongo kukusebenzisa eli xesha ukusondela kunye nokusondela ngakumbi kuMsindisi
Ukulungiselela
Cinga ngomsebenzi owonwabelwa lusapho lwakho kunye nesihloko sevangeli eninokuthi nisixoxe kwaye nifunde ngaso kunye. Kananjalo, khetha usuku kunye nexesha veki nganye xa uninzi okanye onke amalungu osapho anokudibana. IBandla likhuthaza amalungu ukuba abambe umhlangano wangorhatya ngoMvulo ebusuku. Kodwa iintsapho zinokudibana xa oko kuzisebenzela kakuhle.
Umthandazo
Iintsapho ezininzi ziqala kwaye zigqibe umhlangano wangorhatya ngomthandazo. Oku kumema uMoya oyiNgcwele ekhayeni labo. Umhlangano wangorhatya lixesha elifanelekileyo lokuba abantwana kunye nabantu abadala bafunde ukuthandaza neqela elincinci.
Umculo
Iintsapho ezinintsi kananjalo zinengoma yokuvula neyokuvala. Badla ngokukhetha ingoma efumaneka kwincwadi yamaculo okanye kwincwadi yengoma zabantwana. IBandla linamaculo ashicilelweyo epiyano ku music.ChurchofJesusChrist.org. Unokubukela kananjalo imiboniso bhanyabhanya ye Tabernacle Choir eTemple Square. Ukucula ngexesha lomhlangano wangorhatya kunceda amalungu afunde amaculo aculwa ebandleni.
Isifundo
IBandla linezixhobo ezininzi ezinokunceda ngazo umhlangano wangorhatya. Ungathabatha imizuzu embalwa ukufunda kwaye uxoxe ngenqaku elivela kwi Liyahona, Umhlobo okanye Okwenzelwe Ukomeleza Ulutsha. Eli ikwalixesha kananjalo lokubukela nokuxoxa ngemiboniso bhanyabhanya yeBandla. Okanye ungafunda intetho evela kwinkomfa yajikelele, ufunde izibhalo, okanye uxoxe ufundo lwaloo veki ku Uze, Undilandele.
Ifoto yabantwana besenza amaqebengwana ngu Michelle Lloynes
Ukubandakanyeka koSapho
Abantwana banokuthatha inxaxheba kumhlangano wangorhatya. Banokunceda ekucwangciseni imisebenzi, ukuthandaza, okanye ukukhetha nokukhokela iingoma. Banokufundisa nezifundo. Ngaphambi komhlangano wangorhatya, ungamnceda umntwana wakho afunde ibali ku Umhlobo imagazini okanye ibali lesibhalo abalithandayo. Umntwana emva koko unokubalisa elo bali kusapho njengesifundo. Abantwana abaninzi bayakuthanda ukudlala amabali ezibhalo kumhlangano wangorhatya. Vumela abantwana abadala bacwangcise isifundo okanye bakhethe intetho yenkomfa yajikelele abangathanda ukuyifunda. Emva koko bacele ukuba bakhokele ingxoxo.
Imisebenzi
Iintsapho ezininzi zikonwabela ukwenza imisebenzi njengenxalenye yomhlangano wangorhatya. Imisebenzi yangaphakathi ingabandakanya ukudlala imidlalo, ukwenza imisebenzi yezandla, okanye ukupheka kunye.
Kwimisebenzi yangaphandle, ningathatha uhambo, nithabathe uhambo olude lokusela umoya losapho okanye nidlale umdlalo ngaphandle kunye. Fumana umsebenzi amalungu onke wosapho anokuwenza, kwaye nizonwabele kunye. Waphephe amaxesha okukhuphisana anokugxotha uMoya.
Inkonzo
Umhlangano wangorhatya lixesha elihle lokuba iintsapho zikhonze abanye. Unokunceda abamelwane abathile abakhulileyo, ubaphakele ukutya kwindawo enabantu abangenamakhaya, ubhalele abafundisi bevangeli, okanye uchole inkunkuma ngokomzekelo.
© 2022 yi Intellectual Reserve, Inc. All rights reserved. Ishicilelwe eMelika. Isivumelo sesiNgesi: 6/19. Isivumelo senguqulelo: 6/19. Inguqulelo ye Monthly Liahona Message, August 2022. Xhosa. 17467 774