Nkɔnhyɛfo Atseasefo na Wodzi Kan

Nkɔnhyɛfo nya nyikyerɛ fi Nyankopɔn hɔ. Ber a nkɔnhyɛfo enya nkenyan dze rekyerɛkyerɛ hɛn no, ɔtse dɛmara dɛ ma Nyankopɔn nye hɛn rekasa (hwɛ Nkyerɛkyerɛ na Ahyɛmudzi 1:38). Yebotum yɛatwer hɔn dɛ wɔrekã dza Nyame pɛ dɛ yehu no akyerɛ hɛn.

Nkɔnhyɛfo nyina gye Jesus Christ ho dase. Wɔkyerɛkyerɛ hɛn dɛ Ɔyɛ Nyame ne Ba. Wɔkyerɛkyerɛ hɛn N’abrabɔ, fasusu, na Werdambɔ ho nsɛm. Na wɔkyerɛ hɛn mbrɛ yebesi bɛkã No do na yɛayɛ setsie ama Ne mbrasɛm.

Nkɔnhyɛfo kyerɛkyerɛ Jesus Christ asɛmpa no ho nsɛm. Wɔkyerɛkyerɛ hɛn nhyira a yenya sɛ yɛyɛ setsie ma mbrasɛm no nna sɛ yɛannyɛ a nsunsuando a yenya. Odu mber binom a, wobotum enya nkenyan dze akã ndaamba dza obesisi akyerɛ hɛn.

Fitsi ahyɛse no Nyankopɔn edua nkɔnhyɛfo mu akyerɛkyerɛ nkorɔfo. Adam, Noah, Abraham, Moses, Isaiah, na binom so kã nkɔnhyɛfo a wɔtsenaa ase wɔ Ahyɛmu Dadaw mber mu no. Nna nkɔnhyɛfo so wɔ Mormon Nwoma nkorɔfo no mu. Lehi, Mosiah, Alma, na Moroni kã nkɔnhyɛfo yinom ho. Yebotum akenkan kyerɛwsɛm no dze esũa dza wɔkyerɛkyerɛe.

Joseph Smith yɛ ndɛ mber mu nkɔnhyɛnyi a odzi kan. Ɔdze Jesus Christ N’Asɔr sanee baa asaase do. Russell M. Nelson nye nkɔnhyɛnyi na Asɔr no ne President ndɛ. N’apamfo a wɔwɔ President a Odzi Kan na n’Apamfo mu na Asomafo Duebien no hɔn so wɔyɛ nkɔnhyɛfo, adzehufo, na nyikyerɛfo.

Nkɔnhyɛnyi no kasa kyerɛ hɛn wɔ wiadze mfɛndzanan ehyiadzi ase na mber binom so mu. Ɔkyerɛkyerɛ hɛn dza Nyankopɔn pɛ dɛ yehu na mbrɛ yebesi bɛkã Jesus Christ do ndɛ. Yebotum yeehu ne nkyerɛkyerɛ no wɔ Liahona mu na wɔ ChurchofJesusChrist.org mu.

Wobehyira hɛn sɛ yedzi nkɔnhyɛnyi no ne nkyerɛkyerɛ do a. Sɛ yɛkã nkɔnhyɛnyi no do a, yebotum ehu dɛ yɛreyɛ dza Nyame pɛ dɛ yɛyɛ no. Yebotum enya asomdwee ho atsenkã wɔ hɛn abrabɔ mu na yɛabɛn Jesus Christ ara yie.