Sũa Jesus Christ ho Nsɛm na Nya No Tum ho Kwan

Mepɛ dɛ mekyɛ mbrɛ yebesi atwe Jesus Christ, hɛn Ewuradze na Owura no, no tum aba hɛn abrabɔ mu.

Yɛhyɛ ase sũa No ho nsɛm.¹ “Wonnkotum agye nyimpa nkwa wɔ no kotooyɛ mu” (Nkyerɛkyerɛ na Ahyɛmudzi 131:6). Yɛretse Agyenkwa no Ne nkyerɛkyerɛ na dza Ɔyɛɛ maa hɛn ase yie no, nna yetum hu no yie dɛ Obotum ama tum no a yehia wɔ hɛn abrabɔ mu no.

Dɛ yɛyɛ Latter-day Saintfo no, yɛkã No botae ho asɛm dɛ Jesus Christ No Werdambɔ no, a ɔmaa wusoɛr botum aba obiara do na ɔmaa onnyiewiei nkwa botum aba hɔn a wonu hɔnho fi hɔn bɔn ho na wɔgye na wosie ayɛdze horow a ohia tsitsir no.

Egya ne onnyiewiei nhyehyɛɛ kɛse no mu no, ɔyɛ Agyenkwa no na Ohun amandze. Ɔyɛ Agyenkwa no na Obubuu owu mpokyerɛ mu no. Ɔyɛ Agyenkwa no na Otuaa hɛn bɔn na mbratõ ho kaw na Ɔpepa wɔ hɛn nnuho ngyinado ho. Ɔyɛ Agyenkwa no na ɔgye hɛn fi honandua na sunsum mu owu.

Nsɛmfua krɔnkrɔn tse dɛ Werdambɔ na Wusoɛr kyerɛ dza Agyenkwa no yɛɛ, ɔnam Egya ne nhyehyɛɛ do, ama yɛdze enyidado aatsena wɔ abrabɔ yi mu na yeenya onnyiewiei nkwa wɔ wiadze a ɔreba no mu.