“Kutheni Sihlawula Isishumi,” Liyahona, EyoMnga 2022.
Umyalezo weNyanga Liyahona, EyoMnga 2022
Kutheni Sihlawula Isishumi
Amalungu eBandla likaYesu Krestu labaNgcwele beMihla yokuGqibela anika isinye eshumini sengeniso yabo eBandleni. Oku kubizwa ngokuba sisishumi. Imali isetyenziselwa ukuqhuba umsebenzi weBandla kwihlabathi liphela.
Yintoni Isishumi?
Omnye wemithetho kaThixo kukuhlawula isishumi, esisisinye kwishumi sengeniso yethu, eBandleni laKhe. Xa sihlawula isishumi, sibonisa umbulelo wethu kuThixo ngeentsikelelo zethu. Sibonisa ukuba sithembele kuyo iNkosi kwaye sizimisele ukuyithobela Yona kuzo zonke izinto.
UMelkitsedeke—UMgcini kaVimba, nguClark Kelley Price
Iimfundiso zeTestamente eNdala
Abantu bakaThixo bahlawula isishumi ukususela kumaxesha eTestamente eNdala. Umzekelo, uAbraham wahlawula izishumi (bona Genesis 14:18-20 Umthetho wesishumi wafundiswa nangabaprofeti bamandulo, kuquka uMoses noMalaki (bona Levitikus 27:30–34; Nehemiya 10:35–37; Malaki 3:10).
Ukubuyiselwa koMthetho weSishumi
Ngo-1838, uMprofeti uJoseph Smith wabuza iNkosi ukuba amalungu eBandla kufuneka asihlawule njani isishumi. Impendulo yeNkosi ibhalwe kwi IMfundiso neMinqophiso 119, ethi amalungu kufuneka anike isinye eshumini senzala yabo eBandleni (bona umqolo 4). Iinkokeli zeBandla zifundisile ukuba “inzala” ithetha umvuzo.
Umfanekiso nguJamie Dale Johnson
Indlela yokusihlawula Isishumi
Sinokuhlawula isishumi ngokugcwalisa ifomu yomnikelo kwi-intanethi ku donations.ChurchofJesusChrist.org. Okanye singagcwalisa ifomu yephepha kwaye sinike imali komnye wamalungu wobubishophu okanye ubongameli besebe. Yonke imali ithunyelwa kundlunkulu weBandla, apho iinkokeli zeBandla (uBongameli bokuQala, iQumrhu labaPostile abaLishumi elineSibini, kunye noBubhishophu oBongamelayo) benza isigqibo ngomthandazo ukuba iya kusetyenziswa njani na.
Iintsikelelo
INkosi ithembisile ukuba abo bahlawula isishumi bayakusikelelwa ngokwasenyameni nasemoyeni. Isishumi kananjalo sisikelela bonke abantwana bakaThixo ngethuba lokufunda ngaYe kwaye bakhule kwivangeli.
Indlela iingxowa-mali zeSishumi Ezisetyenziswa Ngayo
Imali yesishumi isetyenziselwa ukwakha iBandla leNkosi kwihlabathi liphela. Oku kuquka ukwakha iitempile kunye nezinye izakhiwo zeBandla, ushicilelo lwezibhalo kunye nezinye izixhobo, ukuxhasa ngemali izikolo eziphantsi kweBandla, kunye nokunceda ngembali yosapho kunye nomsebenzi wobufundisi bevangeli.
Isibhengezo seziShumi
Kanye ngonyaka, amalungu eBandla adibana nobhishophu wabo (okanye umongameli wesebe) ukuze bamxelele ukuba bangabahlawuli besishumi esipheleleyo na.
Into Isishumi Esihlawulela Yona
Umfanekiso weTempile yase Oakland California nguLongin Lonczyna Omnci.
© 2022 yi Intellectual Reserve, Inc. All rights reserved. Ishicilelwe eMelika. Imvume yesiNgesi: 6/19. Imvume yenguqulelo: 6/19. Inguqulelo yo Myalezo weNyanga weLiyahona, EyoMnga 2022. Xhosa. 18318 774