“4 Yam uas Yexus Khetos Ua Kom Muab Dag Zog rau Koj,” Ntxiv Dag Zog rau cov Tub Hluas Ntxhais Hluas, Ib Hlis Ntuj 2023.
Zaj Lus hauv Ntxiv Dag Zog rau cov Tub Hluas Ntxhais Hluas Txhua Hli, Ib Hlis Ntuj 2023
4 Yam uas Yexus Khetos Ua Kom Muab Dag Zog rau Koj
Vim [muaj] Yexus Khetos … kuv thiaj tiv taus txhua tsav yam huv tib si.
Filipis 4:13
Thoob plaws lub ntiaj teb, cov Neeg Ntseeg Khetos zoo siab rau nqe vaj lug kub no: “Vim Yexus Khetos txhawb kuv lub zog, kuv thiaj [ua] taus txhua tsav yam huv tib si” (Filipis 4:13).
Thaum tib neeg hnov nqe no, tej zaum ib txhia xav hais tias lawv xeem tau txhua txoj kev xeem ntawv, yeej tau txhua yam ua si, thiab tag nrho tej yam lawv xav tau yuav muaj tseeb. Tiam sis nqe vaj lug kub no tsis qhia li ntawd.
Tus Thwj Tim Povlauj tau sau nqe no thaum nws raug kaw hauv lub tsev rau txim. Vim nws yog ib tug neeg raug kaw, muaj ntau yam Povlauj ua tsis taus, tiam sis nws paub tias Yexus Khetos ua tau kom muab dag zog rau nws ua txhua yam tseem ceeb tshaj.
Qhov ntawd muaj tseeb rau koj thiab!
1 Khetos Muab Dag Zog rau Koj Kom Koj Paub
Yexus Khetos tau muab ntau yam tseem ceeb rau nej kom koj thiaj paub hais tias dab tsi muaj tseeb. Nws tau qhia peb sawv daws kom thov Vajtswv tas mus li (saib 3 Nifais 18:18) thiab thov seb tej yam twg muaj tseeb (saib Maulaunais 10:4–5). Koj kuj nrhiav thiab paub txog tej yam muaj tseeb los ntawm koj txoj kev kawm vaj lug kub.
Kev thov Vajtswv thiab kev kawm vaj lug kub yuav ua rau koj muaj tus Ntsuj Plig hauv nej lub neej. Tus Ntsuj Plig yuav hais lus rau “koj lub cim xeeb thiab… koj lub siab” (Lus Qhuab Qhia thiab Keb Khi Lus 8:2), “ua kom koj tus ntsuj plig muaj txoj kev xyiv fab puv npo,” thiab “ua kom koj lub siab to taub” (Lus Qhuab Qhia thiab Kev Khi Lus 11:13).
Thaum koj ua tej yam no, koj thiaj li “mloog Nws hais”—mloog tus Cawm Seej tej lus thiab ua raws li Nws tau hais. Thawj Tswj Hwm Russell M. Nelson tau qhia tias nov yog txoj kev “yuav tsum ua li cas kom vam meej, muaj kev zoo siab thiab muaj kev xyiv fab hauv lub neej no”1
2 Khetos Muab Dag Zog rau Koj Kom Koj Ua Taus
Koj yuav muaj zog ntxiv thaum koj siv zog ua raws li tus Tswv tej lus txib thiab xaiv ua tej yam zoo uas yuav cia koj muaj kev kaj siab lug thiab kev zoo siab. Yexus Khetos yuav pab koj muaj zog ntxhiv ua li no txawm tej yam xaiv ntawv nyuaj npau li cas lo xij. Tej zaum koj yuav xaiv tej yuam kev. Zoo siab kawg, tus Cawm Seej txoj Kev Theej Txhoj ua rau peb txais tau kev hloov siab lees txim. Vim yog Yexus Khetos, koj muaj peev xwm ua neeg huv dua thiab nrhiav tau kev xyiv fab. Nws muab dag zog rau koj kom koj “ua zoo dua ntxiv thiab ua neeg zoo dua ntxiv”2 txhua hnub.
3 Khetos Ua Kom Muab Dag Zog rau Koj Kov Yeej Tau
Thaum nws nyob hauv lub tsev rau txim, Povlaug sau: “Txawm yog kuv yuav nyob li cas los kuv yeej nyob tau.
“Kuv twb paub lawm hais tias, thaum tsis muaj noj tsis muaj hnav zoo li cas thiab thaum muaj ntau lawm ho zoo li cas. Kuv yeej paub tej uas tsis yooj yim to taub no” (Filipis 4:11–12).
Ua lwm yam lus hais, Povlauj kawm tias, los ntawm Yexus Khetos, nws kov yeej thiab kawm tau los ntawm nws tej kev sim siab thiab tej teeb meem. Yexus Khetos muab dag zog rau koj kom koj ua tau tib yam nkaus.
Tus Cawm Seej raug “tej kev mob thiab kev tsim txom thiab kev ntxias txhua yam.” Nws tau ris peb tej kev qaug dag qaug zog kom “nws yuav paub pab nws cov neeg … raws li lawv tej kev qaug dag qaug zog.” (Amas 7:11–12). Txawm koj raug dab tsi los xij, Yexus Khetos muab dag zog rau koj kom koj nyiaj tau thiab ua txhua yam uas koj ua tsis taus koj ib leeg xwb.
4 Khetos Muab Dag Zog rau Koj Kom Hloov Los Ua Neeg Zoo
Yexus Khetos tau ua kom peb sawv daws yuav sawv rov los, thiab yog vim Nws, txhua tus uas hloov siab lees txim, txais cov kab ke tseem ceeb, thiab ua raws li lawv tej kev khi lus yuav muaj txoj sia nyob mus ib txhis. Yog tsis muaj Khetos, peb yeej tsis muaj peev xwm ua raws li Leej Txiv Saum Ntuj Ceeb Tsheej txoj kev xav tau tshaj txhua yam—kom peb los ua neeg zoo li Nws thiab Nws Leej Tub, Yexus Khetos, thiab nrog nkawd nyob mus ib txhis.
Koj yuav los ua zoo li Yexus Khetos thaum koj kawm txog Nws, cia siab thiab ntseeg Nws, thiab coj raws li Nws tus yam ntxwv. Ua li no yuav ua rau koj ua neej nrog kev ntseeg, kev cia siab, kev siab hlub, kev ua siab ntev, kev ua dawb huv, thiab kev mloog lus. Tej no yog tus Cawm Seej tej cwj pwm.
Thaum koj rau siab coj raws li Yexus Khetos, Nws yuav ua tus uas koj cia siab rau thiab koj txoj kev kaj uas yuav coj koj kev mus ua tus neeg uas Nws paub tias koj mus ua tau. Ces, nrog nraim Povlauj, koj yuav muaj peev xwm hais, “Vim Yexus Khetos txhawb kuv lub zog, kuv thiaj [ua] taus txhua tsav yam huv tib si.”
© 2023 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly For the Strength of Youth Message, Ib Hli Ntuj 2023. Language. 18904 295