Tsev Neeg Nyob Mus Ib Txhis Li

Txhua leej txhua tus yog ntsuj plig tub los sis ntsuj plig ntxhais ntawm ib khub niam txiv saum ntuj ceeb tsheej. Peb sawv daws yog Vajtswv tsev neeg. Peb sawv daws muaj cwj pwm thiab txoj hmoov uas los saum ntuj los. Yog peb coj ncaj ncees, peb yuav rov qab mus nrog peb Leej Txiv Saum Ntuj Ceeb Tsheej nyob ua Nws tsev neeg mus tas ib txhis.

Daim Duab

ib khub niam txiv tshiab nyob rau ntawm lub tuam tsev

Joseph Kaluba tau yees daim duab sib yuav

Tsev Neeg uas Nyob Ua Ke Mus Ib Txhis

Thaum ib tug txiv neej thiab ib tug poj niam sib yuav huav lub tuam tsev thiab ua raws li nkawd tej kev khi lus, nkawd yuav sib yuav nyob mus ib txhis. Txoj kab ke hauv lub tuam tsev no hu ua kev khi. Cov me nyuam uas yug tom qab lawv niam thiab txiv tau ua kev khi yug los nyob hauv txoj kev khi lus. Cov me nyuam uas yug ua ntej lawv niam thiab txiv ua kev khi kuj ua tau kev khi nrog nkawd hauv lub tuam tsev kom lawv thiaj ua tau ib tsev neeg nyob tas mus li. Cov mej zeej hauv lub koom txoos nrhiav tsev neeg zaj keeb kwm thiab ua hauj lwm hauv lub tuam tsev kom lawv muab lawv tsev neeg hauv txhua tiam neeg khi ua ke. Vim yog Yexus Khetos thiab Nws txoj kev Theej Txhoj peb txais tau txoj koob hmoov no uas yog ib tsev neeg uas nyob mus ib txhis.

Vajtswv pom zoo rau kev sib yuav ntawm ib tug txiv neej thiab ib tug poj niam. Yexus Khetos txoj moo zoo qhia tias cov txiv tsev thiab cov niam tsev yuav tsum ib leeg muab siab npuab rau ib leeg thiab ua raws li lawv tej kev khi lus thaum sib yuav. Lawv yuav tsum ua raws nraim li tej ntawd ntawm lawv tej kev xav, tej yam lawv hais, thiab tej yam lawv ua. Hauv txoj kev sib yuav cov poj niam thiab cov txiv neej nyob sib txig, thiab ob leeg yuav tsum nplij siab thiab ib leeg pab ib leeg.

Daim Duab

niam tsev txiv tsev nrog me nyuam

Cov Niam Tsev Txiv Tsev thiab cov Me Nyuam

Vajtswv txib kom Adas thiab Evas muaj me nyuam. Cov thawj coj ntawm lub Koom Txoos qhia tias txoj lus txib no tseem muaj niaj hnub nim no. Cov niam thiab txiv yuav tsum cob lawv cov me nyuam raws li kev hlub thiab kev ncaj ncees (saib Lus Qhuab Qhia thiab Kev Khi Lus 68:25–28). Me nyuam yaus kawm kom hwm thiab mloog lawv niam thiab txiv (see Khiav Dim 20:12).

Niam thiab txiv qhia lawv cov me nyuam kom hlub Vajtswv thiab ua raws li Nws cov lus txib. Kev ua neej nrog ib tsev neeg ua rau peb muaj cib fim muaj kev xyiv fab thiab kawm ua siab ntev thiab xav txog lwm tus. Tej cwj pwm no pab peb hloov los ua neeg zoo li Vajtswv thiab npaj peb nyob zoo siab nrog peb tsev neeg mus ib txhis

Yuav tsum siv zog, rau siab, thiab ua siab ntev thiaj ua tau ib tsev neeg zoo. Txoj moo zoo tej ntsiab cai xws li kev ntseeg, kev thov Vajtswv, kev zam txim, kev hlub, kev ua hauj lwm, thiab kev lom zem ua ke yuav pab peb muaj kev xyiv fab hauv peb tsev neeg. Peb kuj txais tau kev tshwm sim rau peb tus kheej kom paub ua li cas thiaj txhawb pab peb tsev neeg.

Daim Duab

daim duab txog Yexus Khetos

Khetos daim duab, los ntawm Heinrich Hofmann

Muaj Koob Hmoov rau Sawv Daws

Muaj ib txhia uas tsis muaj cib fim tau ib tsev neeg uas zoo tag nyob hauv lub ntiaj teb no. Tiam sis Vajtswv tau cog lus tias tag nrho cov uas ua raws li Nws cov lus txib yuav txais tag nrho cov koob hmoov uas yog ib tsev neeg nyob mus ib txhis. Peb tso siab rau Nws thiab cia siab rau Nws txoj kev teem sij hawm los tau.