Taem Sik we I Stap Longtaem I Kam long Rod blong Yu

“Fesem miusik, iven sapos yu no save talem stret tiun blong miusik ia,” wan brata i talem taem oli fosem hem blong tekem spel from spesel nid taem waef blong hem i kambak long wokfos blong sapotem famli blong tufala. Hem i biliv se plante taem yumi stap putum wan hapi fes we i mekem se i stopem yumi blong no save stap progres long ol filing blong yumi o stap kam antap mo lukluk long wan gudfala wei. “Yumi no save muv fored wetem fet, taem yumi kam les blong wet from wan merikel o komplen taem wan i no kam” hem i talem. Hem i kam gud taem hem i stap lisin long ol skripja mo ol toktok blong jeneral konfrens mo taem hem stap mekem visit wetem ol fren mo ol famli long fon.

“Hemia ol nomol samting blong evri dei we i save putum mi daon,” wan sista we hasban blong hem i kasem wan sik blong longtaem i bin talem. “Helt blong hasban blong mi bae i neva kam gud. Mi akseptem hemia. Be kaen ia blong stap mekem semmak samting evri dei long saed blong ol wok i mekem tingting i kam slak, bodi i taet mo tu long saed blong spirit. Hem i akseptem ol visit we i kam long ol givhan sista. “Taem oli kam pas, i tru tumas se i mekem dei blong mi saen.”

“Samtaem waef blong mi mo mi i fogetem ol samting mo stat blong toktok tumas long mitufala wanwan,” wan brata we i olfala i stap talem. “Mitufala stap kroskros plante taem mitufala stap fogetem samting, mo speseli afta long taem we mitufala stap talem ol toktok blong kros long mitufala wanwan.” Tufala i lanem blong mekem ol not we i save helpem tufala blong stap tingbaot samting. Tufala letem wanwan long tufala blong tekem taem blong tingting i godaon bifo tufala save toktok bakegen. “Mo,” hem i talem, “mitufala i iven lanem moa se i impoten blong stap talem, ‘Tangkyu,’ mo ‘Mi lavem yu.’”

Wan narafala olfala kapol we tufala i stap laef long wan stret salari we i no save jenis, kasem taem we praes blong medikol blong tufala i go antap bakegen. Tangkyu long ol memba blong famli mo wod blong olgeta, oli luksave ol nid olsem. “Fastaem mitufala i sem blong askem help, speseli long ol pikinini blong mitufala,” brata ia i talem. “Be evriwan oli wantem tumas blong help.”

Pikja

Jisas we i stap hilim wan man

Ol infomesen long Hem i Hilim Plante Kaen Sik, i kam long J. Kirk Richards, bae yu no save mekem kopi long hem

Ol Tingting mo Ol Lukluk

Hemia sam long ol tingting mo ol lukluk blong olgeta we oli stap fesem ol sik blong longtaem:

1. Olgeta we oli tanem olgeta i go long Sevya bae oli faenem hop. Wan brata we i gat ol sik blong ol join i so mo stap taet kwiktaem(CFS) i bin talem. “Mi ting se bae i nogat wan i andastanem wanem we mi stap go tru long hem.” “Afta, wan Sandei taem mi stap tekem sakramen, mi luksave se Sevya i andastanem ol hadtaem we mi stap go tru long hem. Mi bin save se bae mi save stanap strong sapos mi kam moa kolosap long Hem.” (Luk long Alma 7:11–12; Doktrin mo Ol Kavenan 121:8; 122:8.)

2. Fasin blong gat sore bae i kam antap long olgeta we oli “mekem gud blong stap strong” (Doktrin mo Ol Kavenan 121:8). “?Huia nao yumi lukluk long hem taem long ol dei we yumi stap harem nogud mo ol taem blong disasta blong askem help mo kamfot? … I gat ol man mo ol woman we oli stap safa, mo from ol eksperiens blong stap safa, oli tekem i kam ol rij samting long saed harem nogud from ol narawan mo harem nogud from wan we i ded, i kam olsem wan blesing naoia olgeta we oli stap long nid. ?Oli save mekem hemia mo no safa?”²

3. Tekem wan dei long wanwan taem. “Samfala yia i pas, soa ia i kam moa nogud we i mekem se mi nomo save gohed wetem. Mi stat blong filim se mi wantem tekemaot laef blong mi,” wan sista we i stap safa from plante kaen sik blong skin(MS). Hem i go jekap long wan helt yunit we oli tritim olgeta wetem sik long tingting. Long taem blong kaonsel, stamba toktok blong hem i no blong “stap strong kasem en” nomo (1 Nifae 22:31) be i blong “stap strong kasem en blong dei.”

4. Developem ol niu samting blong pulum tingting mo faenem ol wei blong givim seves. I no nid blong stap harem nogud from wanem we yu no save mekem, be, faenemaot ol niufala samting we yumi laekem tumas blong mekem. Wan sista we i gat sik blong ol defren kaen skin i no save mekem ol samting we hem i laekem blong stap mekem bifo, olsem blong ron long hos o plei kriket. Be, hem i lanem blong raet long ol naesfala stael blong flasem ol toktok. Naoia hem i yusum niufala talen blong hem ia blong krietem ol naesfala raeting blong Buk blong Momon wetem han blong hem mo mekem i saen tru long sam laet blong ol famli blong hem oli luk.

Taem ol sik we i stap longtaem i kam wan tru samting long laef, i tru, hem i wan jalenj. Be wetem fet, hop long Kraes, wan strong tingting blong gohed blong givim seves, mo stap wok had blong stretem ol samting we i kam agens evri dei, i save helpem yumi blong gro long fasin blong gat sore, andastanem ol filing blong ol narawan mo fasin blong save kam oraet bakegen.