Getesemane

Ha’api’i rahi atu ā nō ni’a i te vāhi i reira te mau māuiui o te Fa’aora nō tātou i te ha’amatara’a.

Hōho’a

uru rā’au ’ōlive

Tei hea terā vāhi ?

I ni’a i te tua mou’a nō Oliveta, i te pae hiti’a o te rā nō Ierusalema (te pae ’atau i ni’a i te fa’ahōho’ara’a, tei tāpa’ohia e te hō’ē tumu rā’au rarahi).

Hōho’a

hōho’a fenua tahito nō Ierusalema

Fa’ahōho’ara’a nō te hōho’a fenua nō Ierusalema nā Jim Madsen

E aha tō reira ?

E uru rā’au ’ōlive ’e pēnei a’e e ’ōfa’i oro nō te fa’atahe mai i te hinu o te mau ’ōlive.

Hōho’a

’ōfa’i oro ’ōlive

E aha tei tupu i’ō nei ?

I muri a’e i te tāmā’ara’a hope’a, ’ua haere Iesu Mesia ’e nā ’āpōsetolo ’ahuru ma hō’ē i Getesemane. I muri iho, fa’aātea ’ē a’era ’oia nō te pure ’e ’ua rave mai ia Petero, Iakobo ’e Ioane nā muri iāna.

« ’E ro’ohia ihora ’oia e te ri’ari’a ’e te māuiui rahi. » Nā ’ō atu ra ’oia, « ’ua ’ati roa tā’u vārua i te māuiui rahi pohe » (Mareko 14:33–34).

’Ua pure ’oia : « E tau Metua, ’ia ti’a ia ’oe ra, e hōpoi ’ē atu i teie nei ’āu’a ; ’ia tupu rā tō ’oe hina’aro ’eiaha tō’u.

« ’Ua fā mai ra te hō’ē melahi nō te ra’i mai, ’ua fa’aitoito mai ra iāna.

« ’E nō te mea tē rahi noa ra tōna māuiui ’oto, ’ū’ana roa atu ra tāna pure, e mai te toto pūtua ra tōna hou i te ma’irira’a i raro i te repo ra » (Luka 22:42–44).

I muri a’e i teie mamae rahi o te Fa’aora, ’ua ho’ohia ’oia e Iuda ’e ’ua tāpe’ahia e te feiā tōro’a ’āti Iuda ’e te hō’ē pupu fa’ehau Roma.

’Ua ’ite ānei ’oe ?

Teie ’ō i te mou’a nō Oliveta, ’o te vāhi ïa e haere-pinepine-hia e Iesu (hi’o Luka 22:39 ; Ioane 18:2).

« I roto i te reo Arama, te aura’a nō tē parau ra getesemane, e ‘nene’ira’a ’ōlive’ ïa ».¹

’Ia tāviri-ana’e-hia te mau ’ōlive mātāmua i roto i te hō’ē ’ōfa’i oro ’ōlive, e mea ’ute’ute ïa te hinu ’ia tahe mai, mai te toto ra te huru.

I te tau o te Fa’aora, ’ua riro te hāmanira’a i te hinu ’ōlive ’ei fa’anahora’a nō te fa’arahira’a i te ne’ira’a o te ta’ahira’a tāta’itahi nō te fa’atahe rahi mai i te hinu e roa’a mai :

Ha’aperehu i te mau ’ōlive i raro a’e i te hō’ē ’ōfa’i rahi.
Tu’u i te mau ’ōlive perehū i roto i te mau ’ete ha’unehia, ’e e ’āpapa i te mau ’ete te tahi nā ni’a i te tahi.
Tu’u i te hō’ē te’a rahi ’aore rā hō’ē tāpū rā’au i ni’a i te mau pānie tei ’āpapahia.
Tā’amu i te mau ’ōfa’i i te hō’ē hope’a o te te’a rahi.²

E fa’a’ohipahia te hinu ’ōlive i tahito ra nō te mōrī hinu, ’ei hinu nō te tunu te mā’a, ’ei mā’a, ’ei pu’a, nō te mau ’ōro’a ha’apa’ora’a fa’aro’o, ’ei rā’au parai nō te rapa’āu i te mau pēpē.

E rave rahi matahiti hou te taera’a mai o te Mesia, ’ua fa’ati’a te hō’ē melahi i te ari’i Beniamina i te mamae o te Mesia i Getesemane, i te nā-’ō-ra’a ē : « E tahe tōna toto nā roto i te mau ’āpo’o ato’a o tōna ’iri nō tōna māuiui rahi » (Mosia 3:7).

Te māuiui o te Fa’aora nō tātou tei roto tōna mamae i Getesemane ’e i ni’a i te sātauro, i reira ’oia i te pohera’a. ’Ua rave ’oia i ni’a iāna i tā tātou mau hara ato’a, mau māuiui, mau ’ati, mau fa’ahemara’a, mau ma’i ’e mau paruparu (hi’o Alama 7:11–12).

Hōho’a

Iesu Mesia i Gesetemane

Getesemane, nā Michael Malm

© 2023 nā Intellectual Reserve, Inc. fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/19. Parau fa’ati’a nō te ’īritira’a : 6/19. ’Iritira’a nō Monthly For the Strength of Youth Message, June 2023. Language. 19026 895