E nehenehe te Vārua Maita’i e tauturu ia tātou

Te Metua i te ao ra, ’o Iesu Mesia ’e te Varua Maita’i, ’ua parauhia rātou te Atuara’a. ’Ua here rātou ia tātou ’e tē ’ohipa tāhō’ē nei rātou nō te fa’atupu i te ’ōpuara’a nō te fa’aorara’a. E tino ’i’o ’e te ivi tō te Metua i te ao ra ’e tō Iesu Mesia, ’aita rā ho’i tō te Vārua Maita’i. E vārua ’oia.

Hōho’a

hōho’a hi’o o te Metua ’e o te Tamaiti

’Ite nō te Metua ’e nō te Tamaiti

« Te Vārua Maita’i, ’o tē fa’a’ite pāpū nei i te Metua ’e te Tamaiti » (2 Nephi 31:18). Tōna aura’a, e nehenehe tātou e fāri’i i te hō’ē ’itera’a pāpū nō te Metua i te ao ra ’e nō Iesu Mesia nā roto mai i te Vārua Maita’i.

E fa’a’ite pāpū te Vārua Maita’i i te mau parau mau ato’a. E tauturu ’oia ia tātou ’ia ’ite ē, te ’evanelia—mai te fa’anahora’a nō te fa’aorara’a, te mau fa’auera’a a te Atua, te fa’aho’i-fa’ahou-ra’a mai, ’e te Tāra’ehara a Iesu Mesia—e parau mau ïa te reira. E ha’apūai ’oia i tō tātou ’itera’a pāpū, ’a tāmau noa ai tātou i te pure, i te ha’apa’o i te mau fa’auera’a ’e i te tuatāpapa i te ’evanelia.

Hōho’a

rima e tāpe’a ra i te hō’ē ’āvei’a

E arata’i ’e e pāruru ’oia ia tātou

E nehenehe te Vārua Maita’i e arata’i ia tātou i roto i tā tātou mau fa’aotira’a ’e e pāruru ato’a i te ’ati pae tino ’e i te pae vārua. E tauturu ’oia ia tātou ’ia ’ite mai i te mau pāhonora’a i tā tātou mau uira’a, mai te mea e pure tātou ’e e tāmata i te rave i te mea ti’a. E arata’i noa ’oia ia tātou « ’ia rave i te ’ohipa maita’i » (Te Ha’api’ira’a Tumu ’e te mau Fafaura’a 11:12).

I te tahi taime e parauhia te Vārua Maita’i ’ei « Fa’aa’o » (Ioane 14:26). E nehenehe ’oia e fa’a’ī ia tātou « i te ti’aturi ’e te here ti’a mau ra, » (Moroni 8:26) ’ia ha’ape’ape’a ana’e tātou, ’ia ’oto, ’aore rā ’ia mata’u. ’A tauturu ai ’oia ia tātou ’ia ’ite i te here o te Atua, e nehenehe tātou e upo’oti’a i ni’a i te mana’o paruparu ’e e ha’apūaihia i roto i tō tātou mau fifi.

I muri a’e i tō tātou bāpetizora’ahia, e fāri’i tātou i te hōro’a nō te Vārua Maita’i i roto i te hō’ē ’ōro’a tei pi’ihia te ha’amaura’a. ’Ia fāri’i ana’e tātou i teie hōro’a, e nehenehe tātou e fāri’i tāmau noa i te auhoara’a o te Vārua Maita’i, ’a ora noa ai ma te parauti’a.

Hōho’a

vahine e tai’o ra i te mau pāpa’ira’a mo’a

Fa’ahōho’ara’a nā J. Kirk Richards

Nāhea tātou i te fa’aro’o i te Vārua Maita’i

E paraparau te Vārua Maita’i i te ta’ata nā roto i te mau rāve’a e rave rau. ’Oia hoi, mai te mau mana’o hau ’e te tāmāhanahana ’aore rā te mau mana’o nō ni’a i te mea e parau ’aore rā, e rave. ’A pure ai tātou nō te arata’ira’a ’e ’a fa’aro’o ai i tāna mau muhumuhura’a, e nehenehe tātou e ha’api’i mai e nāhea ’oia i te paraparau ia tātou.