“Ang Tanan Nagkinahanglan sa Ebanghelyo,” Liahona, Hulyo 2023.
Ang Tanan Nagkinahanglan sa Ebanghelyo
Nagplano ko nga moserbisyo og misyon, apan human sa kolehiyo naghunahuna ko nga dili na ko kinahanglan moserbisyo—hangtod nga nakakuha ko og trabaho nga nagtabang sa giabuso nga mga batang babaye. Dayon akong nakita nga ang tanan nagkinahanglan sa ebanghelyo.
The Lost Coin [Ang Nawala nga Sensilyo], ni Harold Copping © Providence Collection / licensed from GoodSalt.com
Sa Primary pa ko, dili ko makahinumdom kon kapila nangutana ang akong mga magtutudlo kon kinsa kanamo ang moserbisyo og full-time nga misyon. Sa akong batan-on nga hunahuna kanunay kong moingon nga moserbisyo ko.
Ang akong inahan mipakita kanako kon unsa ka importante ang pagpundok sa Israel pinaagi sa pagtabang sa full-time nga mga misyonaryo sa pagtudlo ug pagpaambit sa ebanghelyo. Usa ka higayon miuban ko niya sa pagpangita sa balay sa usa ka sister diha sa ward kinsa wala na mosimba sa dugay nga panahon. Hapit kami nasaag tungod kay wala kami nasayod sa eksaktong dapit diin siya nagpuyo. Imbes nga sapoton, ang akong inahan makugihong nangita sa panimalay niana nga sister. Sama sa babaye diha sa sambingay sa nawala nga sensilyo (tan-awa sa Lucas 15:8–10), nakit-an niya ang sister ug nalipay.
Ang paagi nga ang akong inahan mihatag sa iyang labing maayo alang sa buhat sa Ginoo, dili lang sa pagpaambit sa ebanghelyo apan usab sa laing mga calling sa Simbahan, nakatabang kanako nga makaamgo nga ang tanan kinahanglang moserbisyo sa Ginoo, bisan diha sa gagmay nga mga paagi.
Sa paglabay sa katuigan, migradwar ko sa seminary, nakadawat sa akong medalyon sa Young Women, migradwar sa kolehiyo, ug nagsugod sa pagtrabaho. Hinay-hinay, ang pagbati nga mahimong usa ka full-time nga misyonaryo nahimong dili na kaayo prayoridad. Bisan og aktibo gihapon ko ug mipalambo sa akong mga calling sa Simbahan, miingon ko sa akong kaugalingon, “OK ra nga dili moserbisyo og full-time nga misyon tungod kay kini dili akong obligasyon. Ako usa ka sister, ug ako makaserbisyo sa Ginoo sa daghang lain nga mga paagi.”
Unsay Nakapausab sa Akong Hunahuna
Sa dihang 22 anyos ko, aduna koy kahigayonan nga motrabaho sa usa ka sentro diin miserbisyo ko sa mga batang babaye nga nakasinati og pag-abuso ug kawalay pag-atiman. Mibati ako og kaluoy kanila. Nakita nako kon sa unsa nga paagi nga ang pag-abuso nakapasinati nila og grabe nga emosyonal nga kaugtas ug nakapaubos sa ilang pagtagad sa ilang kaugalingon. Pipila kanila misulay sa paghikog. Pipila kanila dili gustong mosalig ni bisan kinsa. Daghan kanila walay paglaom sa kinabuhi ug wala mobati sa gugma sa Manluluwas.
Kanunay kong nangutana sa akong kaugalingon, “Mapugngan ba unta kini nga mga pag-abuso? Unsa kaha kon ang mga miabuso kanila nakadawat pa unta sa ebanghelyo? Unsa kaha kon ang ilang mga ginikanan nahimo pa unta nga mga miyembro sa Simbahan sa wala pa matawo kini nga mga batang babaye?” Akong naamgohan nga kini nga mga batang babaye tingali wala unta makasinati niini nga mga pagsulay kon ang ilang mga ginikanan ug ang mga miabuso nakadawat pa unta ug nagsunod sa ebanghelyo.
Ang pagpamalandong niini nga mga pangutana ug pagtrabaho didto sa sentro nakatabang kanako nga makita nga ang tanang tawo nagkinahanglan sa ebanghelyo. Sama lang sa kasundalohan ni Helaman diha sa Basahon ni Mormon nga nakig-away aron sa pagdepensa sa ilang hugot nga pagtuo ug mga pamilya, ang Ginoo nagkinahanglan og full-time nga mga misyonaryo aron sa pagpaambit sa Iyang ebanghelyo ug sa pagpanalipod sa Iyang gingharian.
Ang mga kasinatian nga akong nasinati uban sa mga batang babaye didto sa sentro nakadasig kanako nga mobuhat sa mga butang nga gusto nga ipabuhat sa Ginoo kanako. Midesisyon ako nga kinahanglan kong moapil sa misyonaryo nga kasundalohan sa Ginoo. Nakita Niya kini nga tinguha, ug gitawag ko nga moserbisyo sa Philippines Cauayan Mission.
Pagserbisyo og Misyon
Sa akong misyon, nakita nako nga nausab ang mga tawo samtang nakat-on sila sa ebanghelyo. Gitudloan nako ang mga tawo kinsa wala kahibalo kon unsaon sa pagpasaylo, kinsa nanigarilyo ug miinom og bino, kinsa adunay garbo, kinsa wala kahibalo kon unsaon sa pag-ampo. Tungod sa ebanghelyo, gibiyaan nila ang ilang karaan nga mga kinaiya aron mahimong takos sa unsay gisaad sa Dios: kinabuhing dayon.
Tungod sa Pag-ula sa Manluluwas, akong nakat-onan nga si bisan kinsa makasugod o makabalik ngadto sa higpit ug pig-ot nga agianan kon sila maghinulsol. Ang ebanghelyo ni Jesukristo motabang kanato nga mag-usab ug mouswag paingon sa pagkahingpit ug mahimong takos sa dako nga mga panalangin nga giandam sa Langitnong Amahan alang kanato. Kini nga mga kausaban mahimong gikan sa kaguol ngadto sa kalipay, gikan sa kagubot ngadto sa kalinaw, gikan sa kasuko ngadto sa pagpasaylo, gikan sa kahuyang ngadto sa kalig-on, gikan sa kasilag ngadto sa gugma.
Gibati nako nga bulahan kaayo nga nahimong usa ka miyembro sa Ang Simbahan ni Jesukristo sa mga Santos sa Ulahing mga Adlaw. Ang ebanghelyo ni Jesukristo nagtabang kanako nga makasabot sa akong bili isip usa ka anak nga babaye sa langitnong mga ginikanan, bisan diha sa dili maayo nga mga kahimtang. Ang atong Amahan sa Langit kanunay nga naghupay kanako pinaagi sa Espiritu Santo. Ang mga kasulatan mao ang akong giya kon ako naglibog ug nagkinahanglan nga mohimo og mga desisyon.
Ang akong pamilya ug ako naningkamot nga matinud-anong molahutay ngadto sa kataposan. Mapasalamaton ako nga naminyo ngadto sa usa ka lalaki kinsa naghupot sa pagkapari ug adunay lig-on nga pagpamatuod sa gipahiuli nga ebanghelyo ni Jesukristo. Ang akong pakigsaad sa Ginoo dili lang para sa akong kaugalingon apan alang sa akong pamilya ug alang sa Iyang Gingharian.
Ang tagsulat nagpuyo sa Pilipinas.