Mga Pag-aghat diha sa Templo

Sa dihang nagserbisyo ko isip usa ka ordinance worker sa Houston Texas Temple, usa ka grupo sa mga nagsakay og motorsiklo ang miliko sa among parkinganan ug nangutana kon pwede ba sila nga makasulod sa templo. Ang presidente sa templo, si Richard Sutton, mipasabot sa grupo sa katuyoan sa templo ug ang panginahanglanon sa rekomend sa templo aron makasulod sa gambalay. Ang nag-una nga rider ug ang iyang kauban naminaw og maayo.

“Naa koy gibati nga usa ka butang sa pag-agi namo sa inyong gambalay,” miingon siya. “Dili nako kini mapasabot, apan lahi kaayo kadto nga pagbati nga gusto nakong mahibaloan kon unsa kaha ang hinungdan niini.”

Ang magtiayon gusto nga makat-on pa og dugang, mao nga si Presidente Sutton nakigsabot aron ang mga misyonaryo makabisita kaniya.

Sobra sa usa ka tuig ug tunga human niana, si Presidente Sutton nakadungog nga adunay mituktok sa pultahan sa iyang opisina sa templo. “Dili nako nimo mailhan, apan sa milabay nga panahon mianhi ko kauban ang akong mga higala nga nagmotorsiklo. Kaniadto, sa gawas ra gayod ako makatan-aw.” Giisa ang iyang rekomend sa templo, siya mipadayon, “Karon makatan-aw na ko gikan sa sulod.”

Imahe

babaye nga naglakaw gawas sa templo

Ang Ikaduhang Pinulongan

Sa dihang si Dean ug Bonnie Hill gitawag nga moserbisyo isip senior nga mga misyonaryo sa Cochabamba Bolivia Temple, si Bonnie nagduhaduha. Wala pa gayod siya sukad nakatuon og Kinatsila ug dili sigurado mahitungod sa iyang abilidad nga mohimo sa gikinahanglan nga mga ordinansa o makasabot sa uban sa usa ka dili pamilyar nga pinulongan. Usa ka panalangin sa pagkapari ang nagsaad niya nga siya mahimong makig-istorya sa Kinatsila sa pulong ug sa espirituhanong paagi.

“Dili kaayo ko makasulti og maayo sa Kinatsila sa gawas sa templo,” miingon siya. “Apan diha sa balay sa Ginoo, mora og sayon ra kini para nako.”

Bisan human nga siya ug ang iyang bana nakauli na ug mitambong sa Kinatsila nga sesyon sa Ogden Utah Temple, ang mga patron mikomento sa iyang maayo kaayo nga sinultihan.

Si Presidente Russel M. Nelson miingon, “Mahimo kitang madasig sa tibuok adlaw sa mga kasinatian sa uban mahitungod sa templo ug family history. Apan kinahanglan gayod nga mobuhat kita aron masinati sa kaugalingon ang hingpit nga kalipay.”¹

Ang hingpit nga kalipay ug pagdasig ingon man ang mga pag-aghat ug mga kasiguradohan nagpaabot kanato diha sa templo. Adunay langitnon nga pinulongan nga gisulti ug masabtan didto nga dili makuha bisan asa sa kalibotan. Kita makadawat og pagpadayag nga gusto sa Ginoo nga ihatag kanato diha sa templo kon kita dili lamang motambong sa templo apan usab moadto didto nga magpaabot nga makadawat og pagpadayag. Ania ang pipila ka sanglitanan sa pagdasig nga madawat:

• Si Martin Goury sa Cote d’Ivoire nagtinguha og giya diha sa templo kalabot sa usa ka mahinungdanon nga panghitabo sa kinabuhi ug adunay makapahingangha nga kompirmasyon nga siya nakadawat na og tubag mahitungod niini. Kini mao ang baroganan nga gitudlo sa Ginoo ni Oliver Cowdery: “Hinumdomi ang gabii nga ikaw misangpit ngari kanako diha sa imong kasingkasing. … Wala ba Ako magsulti og kalinaw nganha sa imong hunahuna mahitungod niini nga butang?” (Doktrina ug mga Pakigsaad 6:22, 23).

• Si Randy Bronson nagpuyo duol sa Payson Utah Temple ug migahin og mga tuig sa paghimo og mga paniksik sa family history. “Apan ako adunay dili kaayo aktibo nga anak nga lalaki, ug dili ako sigurado kon unsa ang akong mabuhat alang kaniya. Mao nga dili lang kay akong gibutang ang iyang ngalan sa mga prayer roll, apan hugot kong nag-ampo diha sa templo, naningkamot nga makahibalo kon unsa ang akong mabuhat alang kaniya. Nakakuha ko og mga ideya kon unsa ang akong isulti o buhaton alang kaniya.”

• “Ikaw usa ka maayo nga inahan,” miingon si Stephanie Fackrell Hill sa usa ka estranghero sa Logan Utah Temple. “Giunsa nimo pagkahibalo?” nagpanagana nga nangutana ang batan-on nga inahan. Si Sister Hill miingon, “Nakit-an nako ang pintal sa imong mga anak diha sa imong mga kamot, ug samtang nakita nako kini, gibati nako ang pag-aghat sa Espiritu nga sultihan ka.” Ang batan-on nga inahan naningkamot sa pagtago sa iyang mga kamot. Nahupay, gibati na niya karon nga gidawat kay sa mikuha og atensiyon.

Ang templo usa ka dapit dili lamang aron sa pagtabang sa atong mga katigulangan apan usab aron makadawat sa matang sa pagpadayag nga makagiya nato ug sa uban subay sa dalan sa pakigsaad. Si Presidente Nelson miingon,“Matag usa kanato nanginahanglan sa padayon nga espirituhanong paglig-on ug pagtudlo nga mahimo lamang diha sa balay sa Ginoo.”² Kini nga mga pag-aghat ug mga impresyon nga madawat sa Iyang balaan nga balay nagtudlo nato nga motan-aw sama sa pagtan-aw ni Jesus, maminaw sama sa Iyang pagpaminaw, ug magpuyo sama sa Iyang pagpuyo.