Ana Morobɔ bra “wɔ Enyigye no Kwan mu” a?

Mfonyin

mbabun

Alyssa Gonzalez yɛɛ nsaano mfonyin no

Mber tsĩabaa ekyir a wɔtseew hɔnho fii Lamanfo ho no, Nephi kãa dɛ no nkorɔfo no “tsenaa ase wɔ enyigye mu.” (2 Nephi 5:27). Yɛhwɛ dɛ nna nkorɔfo kuw bi so wɔ hɔ a nna wɔpɛ dɛ wokumkum hɔn no a (hwɛ 2 Nephi 5:1–6, 14), nna ɔyɛ ahobow. Woana na obotum benya enyigye wɔ gyinabew a ɔtse dɛm ase?

Dza odzi kan wɔ ne nyinara mu no, hyɛ no nsew dɛ, “yɛtsenaa ase wɔ enyigye mu” no nnkyerɛ dɛ “nna Nephinyi kor biara wɔ enyigye mu mber no nyinara.” Ɔkyerɛ dɛ wɔtsenaa ase wɔ kwan bi mu, na wɔyɛɛ ndzɛmba a, ɔdze enyigye bɛba ara. Hɔn nsɔhwɛ nyinara ekyir no, nna ɔyɛ enyigye mber.

Dɛm ntsi no ebɛnadze nye “enyigye kwan mu” no? Yebesi dɛn botum esũasũa wɔ hɛnara hɛn abrabɔ a, nsɔhwɛ wɔ mu so? Hom mma yɛnhwɛ!

• Yɛ setsie. “Na yedzii … Ewuradze ne mbrasɛm do” (2 Nephi 5:10).

  Edze asɛmpa no robɔ bra yɛ Anamɔn 1. W’enyi botum agye ara wɔ bɔn mu, naaso ɔnnkɛkyɛr. Eregye enyim ara ayɛ asowadzen etsia Nyankopɔn nnyɛ “enyigye kwan no mu” (hwɛ Alma 41:10).

• Hwehwɛ kyerɛwsɛm no mu. “Na emi, Nephi, mefaa … kyerɛwsɛm no a woekrukye wɔ ayewa mprɛtse do no so bae” (2 Nephi 5:12). “Na … yɛpɛnsapɛnsaa mu na yehun dɛ oye; nyew, ɔsom bo kɛse mpo ma hɛn” (1 Nephi 5:21) .

  Nephi no nkorɔfo no nyaa kyerɛwsɛm no. Na woennya ara—wɔ pɛnsapɛnsa mu.

• Tsie baanodzifo a woekenyan hɔn. “Emi, Nephi, metseew Jacob na Joseph ho, ma wɔbɛyɛɛ asɔfo na akyerɛkyerɛfo maa … mo nkorɔfo” (2 Nephi 5:26).

  Akyerɛkyerɛfo yinom dze kyerɛwsɛm no yɛɛ hɔn akwankyerɛ dze dzii dwuma (hwɛ 2 Nephi 4:15; 6:4).

• Kɔ temple (na mbea krɔnkrɔn binom so). “Emi, Nephi, sii temple” (2 Nephi 5:16).

  Ohia dɛ yebenya mbea krɔnkrɔn tse dɛ nhyiamu adan na temple ma esuafo aboa ano wɔ hɔ na wɔasɔr. (Yebotum afa no dɛ Nephifo ennya temple ara—wodzii dwuma wɔ mu ankasa.). Sɛ wankasa nnkotum akɔ temple a, aber nyina ibotum ayɛ ebusua abakɔsɛm edwuma.

• Ma woho nyɛ mfaso. “Mekyerɛkyerɛɛ mo nkorɔfo ma wosisii adan, na wɔyɛ edwumadzen. … [Emi] mekyerɛɛ mo nkorɔfo edwumadzen yɛ, na mbrɛ wosi yɛ nsa ano edwuma” (2 Nephi 5:15, 17).

  “Wɔ enyigye kwan mu” ne fã nye dɛ ibenya biribi ayɛ! Dwumadzi bi, edwuma bi, asodzi bi—biribi a ɔma itsim na ɔma wo botae (a nokwar, mber a edze bɛgye w’ahom a ɔfata ka ho). Ɔyɛ dzen dɛ w’enyi bɛgye sɛ mber nyina w’ahom nnka wo ho a.

Ana ebɛkã dɛ sesieara erobɔ bra wɔ enyigye kwan mu a? Sɛ ɔnntse dɛm a, ebia Nephi ne fasusu no botum ama wo adwenkyerɛ horow a ibesi dze botu mpon.