Edze Asɛmpa no Robɔ Bra ne Daapem Dɛwdzi

Osian No dɔ a odzi mu a Ɔwɔ ma hɛn no ntsi, Ɔsor Egya per dɛ Ɔnye hɛn bɛkyɛ N’enyigye a odzi mu no, wɔ ha sesie na wɔ mfesantsen mu. Dɛm no ayɛ Ne nkenyan wɔ adzebiara mu fi ahyɛse no, a N’enyimnyam enyigye ho nhyehyɛɛ na No Dɔba Kortonoo N’afɔrbɔ dɛ ɔbɔpon hɛn no kã ho.

Nyankopɔn nnyɛ dɛ ɔdze dɛwdzi anaa enyigye bɛhyɛ hɛn do, mbom Ɔkyerɛkyerɛ hɛn mbrɛ yebesi benya. Ɔsan kyerɛkyerɛ hɛn bea a yennkotum enya dɛwdzi—“emumuyɛdze [nnyɛ na ɔnnkɛyɛ] enyigyedze ara da” (Alma 41:10). Ɔnam Ne mbrasɛm do na Ɔsor Egya yi dɛwdzi anamɔn kwan no kyerɛ hɛn.

President Russell M. Nelson kyerɛɛ no wɔ kwan yi mu dɛ:

“Nokwar kɛse no nye yi: ber a wiadze si do dzendzen dɛ tum, ahonya, ehurahura, na honandua mu ahoɔdɛw na wɔdze enyigye ba no, ɔnntse dɛm! Wonnkotum! Dza wɔdze ba ara nnyɛ hwee mbom nhyɛananmu pan ma ‘nhyira nye ahomka tsebew a [hɔn] a wodzi Nyankopɔn ne mbrasɛm do no wɔ mu’ [Mosiah 2:41].

“Nokwar no nye dɛ ɔyɛ berɛ koraa dɛ ebɔhwehwɛ enyigye wɔ bea a nnkotum ehu no dabiarada! Naaso, sɛ enye Jesus Christ to kɔndua na eyɛ sunsum mu edwuma a wohia dze edzi wiadze do konyim a, Ɔno, na Ɔno nko, wɔ tum a ɔdze bɛpegya wo efi wiadze yi a ɔtwe wo no.”¹

Dɛm ntsi, yenya daapem dɛwdzi ber a yerisie Nyankopɔn ne mbrasɛm, na yenya Nyankopɔn ne mbrasɛm no wɔ Jesus Christ n’asɛmpa no mu. Mbom ɔyɛ hɛn nsanmuyi. Sɛ wɔ hɛn mberɛwyɛ mu yɛfom mber kakra dɛ yebesie mbrasɛm no a, yebotum asesa, apow wenwen no, na yɛasan etsiw papa no bio. Nyankopɔn no dɔ no nngye bɔn nnto mu—dɛm no bɛyɛ ehumbɔbɔr a oruwia pɛrpɛrdzi—naaso ɔnam No Werdambɔ do no, Jesus Christ ma ɔpon fi bɔn ho:

“Amulek … kãa dɛ … Ewuradze bɛba nokwar mu abɔpon no nkorɔfo, na ɔremmba mmbɔpon hɔn wɔ hɔn bɔn mu na mbom ɔbɔpon hɔn efi hɔn bɔn mu.

“Na Egya no ama no tum, ɔmpon hɔn mfi hɔn bɔn ho osian nnuho ntsi; dɛm ntsi ɔasoma n’abɔfoe dɛ wɔmbɛkã nnuho ho nsɛm, dza ɔma Pomfo no tum dze nkwagye ma hɔn akra” (Helaman 5:10–11; woetsĩmu akã ho).

Jesus see dɛ:

“Sɛ hom sie me mbransɛm a, hom bɛtsena mo dɔ mu; dɛ mbrɛ mo so mesie m’Egya ne mbransɛm, na metsena no dɔ mu.

“Makã yinom akyerɛ hom ama dɛw aatsena hom mu, na hom dɛw aahyɛ mã” (John 15:10–11).

Iyi nye dza Lehi tsee wɔ n’adaaso mu ber a odzii nkwa dua n’eduaba no—a ogyina hɔ ma Nyankopɔn no dɔ no. Ɔkãa dɛ, “Na midzii eduaba no, muhun dɛ enyigye kɛse ahyɛ me kra mã”(1 Nephi 8:12; hwɛ 11:21–23 so).

Lehi daa kwan a otsĩa ebien so edzi a yebotum dze enyigye aba hɛn abrabɔ mu ber a ɔkãa dɛ, “Dɛm ntsi mepɛɛ dɛ m’ebusua so dzi [eduaba no] bi” (1 Nephi 8:12).

Mfonyin

nsa kor a ɔdze eduaba no rema nsa kor so, a dua no wɔ mu.

Nkwa Dua, Kazutu Uota yɛɛ nsaano mfonyin no

Eroboa Binom Ma Woenya Enyigye

Tse dɛ Ɔhen Benjamin no nkorɔfo no, “enyigye hyɛ hɛn mã” ber a yenya hɛn bɔn ho bɔnfakyɛ na yenya “adwenmutsewee” (Mosiah 4:3). Yɛtse ne nkã bio ber a yɛhwɛ hɛnho na yɛhwehwɛ boa ebusuamba na nkaafo ma woenya dɛm enyigye na asomdwee noara bi.

Ber a nna ɔyɛ aberantsɛba no, Alma hwehwɛɛ enyigye wɔ biribiara a nna otsĩa Jesus Christ n’asɛmpa mu no. Sor ɔbɔfo kaa n’enyim ekyir no, ɔnam nnuhu “dze kɔ owu mu’’ (Mosiah 27:28) na Agyenkwa n’adom mbordo do sakyeree fii “wenwen no” ho dze kɔr “papa” ho. Mfe pii ekyir no, Alma ehurusi mu ara paa mu kãa kyerɛɛ ne babanyin Helaman dɛ:

“Na ao, ebɛn dɛw nye yi, na ebɛn kan nwanwa na muhunii yi; nyew, dɛw mbordo a ɔtse dɛ me yaw no pɛpɛɛpɛr hyɛɛ me kra mã! …

“Nyew, na ofi dɛm aber no dze besi ndɛ mpo, mayɛ edwuma atoa do a menngyaa da, ama matwe akra aaba nnuho mu; ama medze hɔn aaba ma wɔabɔsɔ dɛw mbordo a masɔ ahwɛ no bi. …

“Nyew, na afei hwɛ, O me babanyin, Ewuradze ama meenya enyigye kɛse wɔ eduaba a mo dwumadzi asow no ho;

“Na osian asɛm no [Jesus Christ n’asɛmpa] a ɔdze ama me no ntsi, hwɛ, Nyankopɔn nam do awo dodowara, na dza mosɔɛe hwɛɛ no, hɔn so wɔasɔ ahwɛ” (Alma 36:20, 24–26).

Mber bi so, Alma gyee dase dɛ:

“Na iyi nye m’enyimnyam, dɛ annhwɛ a mebɛyɛ edwindadze wɔ Nyankopɔn ne nsamu dze atwe akra aba nnuho mu, na iyi nye m’enyigye.

“Na hwɛ, sɛ muhu m’enuanom pii a woenu hɔnho nokwar mu na wɔaba Ewuradze hɔn Nyankopɔn hɔ a, nna dɛw ahyɛ me kra mã” (Alma 29:9–10).

Alma kɔɔr do bɔɔ enyigye mbordo a ɔtsee ho nkã dawur mber a binom nyaa konyimdzi wɔ dɛ wɔdze akra baa Christ hɔ mu no:

“Na mbom menndzi dɛw wɔ mo nko mo konyimdzi ho, mbom me dɛw hyɛ mã osian m’enuanom no so [Mosiah ne mbambanyin no], a wɔkɔr Nephi asaase do no hɔn konyimdzi ntsi.

“Hwɛ, wɔayɛ edwuma mbordo, na wɔdze ndɔbaa pii eduaba; na mbrɛ hɔn akatua dua dɔɔ sõ a!

“Afei, sɛ modwen m’enuanom yinom hɔn konyimdzi ho a nna me kra eguan araa ma ɔatsew noho koraa mpo efi me nyimpadua ho, na dɛ mbrɛ ɔyɛ no, dɛmara so na m’enyigye ne kɛse tse” (Alma 29:14–16).

Yebotum enya enyigye noara bi sɛ yɛdɔ nkaafo a yɛdze “Christ no dɔ mapã” (Moroni 7:47; hwɛ nyiyimu 48 so), yɛnye hɔn kyɛ nokwar a wɔdze asan ananmu no, na yɛtõ nsa frɛ hɔn ma wɔnye ahyɛmu nkorɔfo no boa ano a.

Mfonyin

Agyenkwa no wɔ Gethsemane

O My Father, (O M’Egya,), Simon Dewey yɛɛe nsaano mfonyin no

Dɛwdzi Wɔ Atseetsee Mu

Onnyi dɛ yesuro dɛ atseetsee na nsɔhwɛ a ɔyɛ dɛnara a yehyia no wɔ ɔnnkyebo asetsena mu besiw hɛn enyigye kwan anaa ɔbɛsɛe no. Alma yɛɛ nyimpa a n’ahofama som ma nkaafo no maa ohun amandze. Ɔdaa efiadze, ɔkɔm na nsukɔm dzee no yie, ebor, owu, na atwetwesi na ankonamyɛ kɔɔr do. Naaso, “wɔmen no wɔ Christ enyigye mu’’ (Alma 31:38). Ebia Alma n’amandzehu no maa enyigye a odzii ekyir mpo yɛɛ kɛsenara.

President Nelson bɔ hɛn nkaa dɛ dɛwdzi yɛɛ n’afamudze wɔ Agyenkwa n’amandzehu no mu—“osain dɛw a wɔdze sii n’enyim ntsi [Ɔno] sɔɔw mbeamudua no’’ (Hebrewfo 12:2).

“Dwen ho! Ama Ɔasɔw yaw dzendzenndzen dodow a wɔnnsɔw no wɔ asaase do da no, hɛn Agyenkwa dze n’enyim tsiim dɛwdzi do!

“Na ebɛn dɛwdzi na wɔdze sii N’enyim? Nokwar ahotsew, ayarsa, na ɔrehyɛ hɛn dzen ho enyigye kã ho, enyigye dɛ orutua hɔn a wobonu hɔnho nyina hɔn bɔn kaw, enyigye dɛ ɔreyɛ ma emi na ɔwo asan akɔ fie—a hɛnho atsew na yeedzi mu—dɛ yɛnye hɛn Ɔsor Awofo na ebusua ebusua bɛtsena kã ho.

“Sɛ yetsim wɔ dɛwdzi a ɔbɛba hɛn hɔ do, anaa hɔn a yɛdɔ hɔn no do a, ebɛnadze na yebotum asɔw no sesei a ɔbɛhyɛ hɛn do, ɔyɛ yaw a, ɔyɛ suro a, ɔyɛ nsisi a, anaa dza ɔnnkɛyɛ yie a?”²

Dɛwdzi a otsim kɔ ewiei ba ber a erosɔw kɔ ewiei wɔ Jesus Christ n’asɛmpa mu na eroboa binom ma wɔayɛ dɛmara. Daapem dɛwdzi ba ber a yegyina wɔ Nyankopɔn no dɔ mu, yeridzi Ne mbrasɛm do na yerinya Agyenkwa n’adom no. Asɛmpa anamɔn kwan mu no, dɛwdzi wɔ akwantu no mu dɛmara dɛ dɛwdzi wɔ ewiei. Jesus Christ n’asɛmpa no nye daa daa dɛwdzi n’anamɔn kwan.