Obiara Agyenkwa no, Obiara Asɛmpa a

Wɔdze Jesus Christ n’asɛmpa no “asan ananmu aba wɔ nda a odzi ekyir yinom mu ma aman, ebusua kuw, kasa, na asaase do nyimpa biara … nsa aka hɔn ehiadze.’’¹ Asɛmpa no tra amambayɛ na honam enyi ber a ɔtra kusum n’ahe nyinara dze kyerɛkyerɛ dɛ “hɔn nyinara yɛ adze kor ma Nyame’’ (2 Nephi 26:33).² Mormon Nwoma no gyina pi dɛ nokwar yi ho dasee nwanwa.

Nkyerɛwee tsitsir yi gye dase dɛ Christ kaa amanaman nyina (hwɛ 2Nephi 29:7) na “ɔbɛda no ho edzi akyerɛ hɔn a wɔgye no dzi, … [na [ɔa]yɛ etumdze akɛse] nsɛnkyerɛdze, na awanwadze, wɔ adasamba mu’’ (2 Nephi 26:13). Dza ɔkekã etumdze akɛse, nsɛnkyerɛdze, na awanwadze yinom ho no yɛ asɛmpa ne ntserɛwee. Ntsi no, yɛdze asɛmpasomafo kɔ wiadze nyina dɛ wɔnkɛgye n’asɛmpa ho dase. Yɛsan so nye hɔnnom a woetwa hɛnho ehyia kyɛ asɛmpa no. Asɔfodzi nsafee a wɔdze asan ananmu aba ho dwumadzi ma atseasefo na ewufo no hwɛ no pefee dɛ ewiei no hɛn ɔsor awofo hɔn babanyin na babaa biara—ma woetwa mu kɔ, ɔwɔ hɔ, anaa ndaamba no benya asɛmpa no ne mãhyɛ no.

Asɛmpa yi ne dza ohia dodow—nkɔnhyɛnyi na ɔsomafo biara a ɔafrɛ no edwuma yi pɛn—n’asɛm tsitsir nye dɛ Jesus nye Christ no na Ɔbaa dɛ Obehyira obiara. Yɛyɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo asɔrmba no, yɛpaa mu kã dɛ No werdam afɔrbɔ no yɛ wiadze nyinara dze.

Sɛ mokɔ wiadze aprɔw a, menye Asɔrmba a wogugu mu asorɔtow yɛ kokoa mu mpɛnsapɛnsamu. Menya nkenyan dɛ mebɛtse mbrɛ wosi tse Jesus Christ no Werdambɔ no ho nhyira nkã wɔ hɔn abrabɔ mu ho, mpo ber a wɔkã bɔn dadaw bi kyerɛ. Mbrɛ osi yɛ nwanwa dɛ No Werdambɔ ahotɔ nsiesie no wɔ hɔ aber nyina ma hɛn nyinara!

Amulek paa mu kãa dɛ “Ɔwɔ dɛ wɔbɔ dɛm werdam no,’’ “annyɛ dɛm a adasamba nyinara bɛhera.’’ Nkyɛ yɛbɛda ho “ahwe ase na … [yɛ]ayew, … gyedɛ wɔnam dɛm werdambɔ yi do.’’ a nna ohia “afɔrbɔ onnyieiwei na ɔmmbɔadze da’’. Osiandɛ “biribiara nnyi hɔ a ɔtɔ sin wɔ dɛm werdambɔ a ɔmmbɔadze da no a otum tua wiadze bɔn yi ho kaw’’ (Alma 34:9, 10, 12).

Nkɔnhyɛnyi kɛse Jacob sanee kyerɛkyerɛɛ dɛ osiandɛ “owu aba adasa nyinara do, … ohia dɛ owusoɛr tum ba’’ ma ɔdze hɛn aba Nyankopɔn enyim (2 Nephi 9:6).

Nna ohia dɛ yedzi bɔn na owu ebien no no do konyim. Nna iyi nye Agyenkwa no no somdwuma, a akokodur mu ara Ɔyɛe wiei dze maa Nyankopɔn ne mba nyinara.

Mfonyin

Christ wɔ Gethsemane

Gethsemane, J. Kirk Richards, yɛɛ nsaano mfonyin no, mma wɔnnyɛ ne saso

Hɛn Agyenkwa n’Afɔrbɔ

Ne anafua a odzi ewiei wɔ ɔnnkyebo abrabɔ mu no, Jesus kɛhɛɛn Gethsemane Ture no mu. Hɔ no, Obuu ntwɛr wɔ ngo ndua mu na ɔhyɛɛ ase sianee kɔr amandzehu no bun mu a emi na ɔwo nnkotum ehu dabiarada.

Hɔ no, Ɔhyɛɛ ase dɛ ɔdze wiadze bɔn roto Nankasa no ho do. Ɔtsee yaw, awerɛhow, na amandzehu biara, na Ɔsɔɔw awerɛhow na amandzehu nyinara a ɔwo, emi, na ɔkra biara a ɔatsena ase anaa ɔbɛtsena ase pɛn no bɔsɔw no pɛn. Amandzehu kɛse na ɔmmbɔadze yi “maa [Ɔno], … a [ɔ]sō sen obiara mpo, [n]oho popoe osian yaw ntsi, na bɔgya fii [n]o honandua enyi nyina” (Nkyerɛkyerɛ na Ahyɛmudzi 19:18). Ɔno nko na Obotum ayɛ iyi.

Nkyii wɔdze Jesus kɔɔr Calvary, na wɔ nsisi yayaayaw ber mu wɔ wiadze n’abakɔsɛm mu no, wɔbɔɔ No mbeamudua mu. Nkyɛ obiara nnkotum agye No nkwa efi Ne nsa mu. Dɛ Ɔyɛ Nyame ne Ba a Ɔwoo no Kortoo no, nna Ɔwɔ tum wɔ honandua mu owu do. Nkyɛ Obotum abɔ mpaa ama N’Egya, na nkyɛ abɔfo a wɔbɔbor asafokuw duebien bɛba abɛsɛɛ N’atseetseefo no na Ɔakyerɛ No tum wɔ ndzɛmba nyinara do. Jesus bisaa wɔ ber a woyii No mae ase dɛ “Na ɔnodze, kyerɛwsɛm no bɛyɛ dɛn aba mu,’’ “dɛ otwar dɛ ɔyɛ dɛm?’’ (Matthew 26:54).

Ɔnam setsie a odzi mu ma N’Egya mu—na ɔdɔ a odzi mu ma hɛn no ntsi—ɔpɛ mu ara Jesus dze No nkwa mae na owiei N’afɔrbɔ a ɔmmbɔadze na onnyiewiei no, a ɔtsen kɔ mber a ɔasen na ɔkɔ kan wɔ mfesantsen nyinara mu no.

Jesus maa N’Asomafo ahyɛdze dɛ wɔnsɔw N’edwuma do wɔ No wu ekyir no. Wobesi dɛn bɛyɛ? Nna hɔn mu beberee yɛ afarfo ara, na hɔn mu biara nnyaa ntsetsee wɔ nhyiamudan mu mma somdwuma no. Dɛm ber mu no, nna ɔyɛ dɛ ma Christ n’Asɔr rebɛyew korakoraa. Naaso Asomafo no nyaa ahoɔdzen dze soaa hɔn ɔfrɛ no na wɔsesaa wiadze abakɔsɛm.

Ebɛnadze na ɔmaa ahoɔdzen a ɔtse dɛm fii mberɛyɛw a nna ɔda edzi no mu bae? Anglican asɔr banodzinyi na nwomasũanyi Frederic Farrar kãa dɛ: “Nyiano kor, na kor pɛr na obotum aba mu—owusoer fi owu mu. Nna dwumadzi fofor kɛse yi nyinara yɛ Christ no wusoer tum no ntsi.’’⁴ Dɛ Ewuradze a Ɔasoɛr n’adasefo no, nna Asomafo no nyim dɛ biribiara nnkotum esiw edwuma yi ne kankɔ kwan. Nna hɔn dase no yɛ tum a ɔkɔr do ne farbaa ber a tsetse Asɔr no dzii ɔhaw nyinara do konyim.

Easter ber yi, dɛ N’adasefo no mu kor a wɔhyɛɛ no sɔfo no, mepaa mu kã dɛ da kor Kwesida anapatutu fɛfɛɛfɛw bi, Ewuradze Jesus Christ soɛree fi owu mu dze hyɛɛ hɛn dzen na obubuu owu no mpokyerɛ maa obiara. Jesus Christ tse ase! Ɔnam Ɔno ntsi, owu nnyɛ hɛn ewiei. Owusoer no yɛ Christ n’amansuon akyɛdze ma obiara a wonntwa ho bo.

Mfonyin

Christ na Mary Magdalene wɔ nda no ho

Christ na Mary wɔ Nda no ho, Joseph Brickey yɛɛ nsaano mfonyin no

Bra Christ hɔ

Asɛmpa na Jesus Christ No Werdambɔ no yɛ obiara dze—ɔno nye dɛ, obiara. Kwan kor pɛr a yenya Agyenkwa no werdam afɔrbɔ ho nhyira nye ankorankor bɛgye Ne nsatõ: “Hom mbra mo hɔ’’ no do (Matthew 11:28).

Yɛba Christ hɔ ber yenya gyedzi wɔ No mu na yenu hɛnho. Yɛba No hɔ ber a wonuma hɛn wɔ Ne dzin mu na yɛgye Sunsum Krɔnkrɔn akyɛdze no. Yɛba No hɔ ber a yesie mbrasɛm no, yɛgye ayɛdze horow, yedzi ahyɛdzi horow no nyi, yefua sũahu horow wɔ temple, na yɛbɔ abrabɔ a Christ n’esuafo no bɔbɔ.

Ɔto mber bi a, yebehyia abagura na enyimguase. W’akoma bedzi yaw ama wankasa woho anaa obi a edɔ no. Ebia binom hɔn bɔn bɛyɛ w’adzesoadze. Mfomdo no a ayɛ—ebia dza ɔyɛ dzen—bɛma esuro dɛ asomdwee na enyigye apa wo afebɔɔ. Mber a ɔtsetse dɛm no, kaa dɛ Agyenkwa no nnyi bɔn adzesoadze nko mmfi hɔ mbom ɔsanee so “[hun] bɔn na amandze na nsɔhwɛ ahorow biara bi’’ (Alma 7:11), a wodze kã ho! Osian dza Oduaa mu maa wo ntsi, Ɔno ankasa nyim mbrɛ obesi aboa wo ber a egye N’abrabɔ-nsesa nsato: “Hom mbra mo hɔ’’ no to mu.

Jesus Christ ada no edzi pefee dɛ Ɔsor Egya ne mba nyinara wɔ kyɛfa pɛpɛɛpɛr wɔ N’asɛmpa na Werdambɔ nhyira no ho. Ɔbɔ hɛn nkaa dɛ “mbom adasa nyinara wɔ ho ndzinoa, dɛ mbrɛ kor tse no dɛmara na kor so tse, na wonnsiw obiara kwan’’ (2 Nephi 26:28).

“Ɔto nsa frɛ hɔn nyinara dɛ wɔmbra ne nkyɛn mbenya ne papayɛ; na ɔmmpow obiara a ɔba ne nkyɛn, bibinyi na borɔnyi, akowa na fahodzinyi, ɔbarimba na ɔbaa” (2 Nephi 26:33).

“Ɔto nsa frɛ hɔn nyinara’’—ɔkyerɛ dɛ hɛn nyinara! Onnyi dɛ yɛdze ahyɛnsewdze a ɔnnyɛ nokwar anaa ndaadaa nkyekyɛmu toto hɛnankasa anaa binom do. Onnyi dɛ yɛdze biribiara siw Agyenkwa no dɔ ho kwan anaa yɛsosɔw adwendwen bi do dɛ ihɛn anaa binom nnkotum enya No ho kwan. Dɛ mbrɛ medzi kan akã no, “Onnkotum aba no dɛ [obi] bɔhwe ase atra bea a onnyiewiei kan no a Christ No Werdambɔ hyerɛn no nndu no.”⁵

Mbom, dɛ mbrɛ Emi na Akyerɛbaa Holland kyerɛkyerɛɛ abosoom kakra ansaana orubowu no, wɔama hɛn mbrasɛm dɛ “[yɛ]nyɛ ayamuyie, dɛm ayamuyie yi nye ɔdɔ’’ (2 Nephi 26:30).⁶ Ɔdɔ yi nye ma Agyenkwa no kyerɛ hɛn no, osiandɛ “Ɔnnyɛ adze biara gyedɛ dza ɔyɛ mfaso dze ma wiadze; osiandɛ ɔdɔ wiadze, dɛm ntsi na ɔdze noara no nkwa too hɔ ama ɔaatwe adasa nyinara ama noho” (2 Nephi 26:24).

Megye dase dɛ asɛmpa na Jesus Christ No Werdambɔ no yɛ nyimpa nyinara dze. Na mobɔ mpaa dɛ dɛw mu ara hom bosuo nhyira a Ɔdze ba no mu dzen.