“Ama Mbabun Enya Ahoɔdzen: Agyenkwa ne Nsɛm ma Hom’’ For the Strength of Youth, Ebɔw 2024.
Bosoom bosoom Ama Mbabun Enya Ahoɔdzen Amandzɛɛbɔ, Ebɔw 2024
Ama Mbabun Enya Ahoɔdzen: Agyenkwa ne Nsɛm ma Hom
Kwankyerɛ yi boa wo ma edze wo nsanmu yi no nya sus Christ na Ne nkyerɛkyerɛ ho nkitahodzi.
Migyina Abowano na Morobɔ Mu, J. Kirk Richards yɛɛ nsaano mfonyin no
Susu dɛ nna etse tsese Galilee, mfe 2,000 abasen kɔ no mu. Wɔato nsa afrɛ ɔwo nye w’anyɛnkofo bi dɛ wɔnkɔ mbabun mpaabɔsom bi ase wɔ apaamu nhyiamudan hɔ; a ɔhɔho kasamaafo tsitsir bi reba: Jesus Nazarenyi no. Na Oedu Ne nsɛm ne beebi no, Jesus to nsa frɛ mbabun a wɔwɔ dɔm no mu no dɛ wombisa no nsɛm.
Ebɛn nsɛmbisa binom na edwendwen ho a ibotum atse?
Mususu dɛ nsɛmbisa binom bɛda mber no mu kusum na gyinabew horow edzi. Naaso nokwar mu ara no mu pii so bɛyɛ dɛ nsɛmbisa a yɛwɔ no ndɛ.
Mfatoho, Ahyɛmu Fofor mu no, nkorɔfo bisaa Agyenkwa no nsɛmbisa tsetse dɛ iyinom:
-
Ebɛnadze na ohia dɛ meyɛ dze nya onnyiewiei nkwa?1
-
Ana wɔgye me to mu a? Ana meka ho a?2
-
Sɛ mo nua yɛ bɔn tsia me a, mpɛn dodow ahen na ɔwɔ dɛ medze kyɛ no?3
-
Ebɛnadze na ndaamba obesi wiadze yi do? Ana mebenya ahotɔ a?4
-
Ana Ibotum asa mo dɔfo yarba a?5
-
Ebɛnadze nye nokwar?6
-
Sɛ menam kwan pa no do a mibesi dɛn bohu?7
Ana hɛn nyinara adze kor noara nnyɛ hɛn nwanwa ofi mber to mber a? Mfe ɔha ɔha abasen no, nsɛmbisa no nnsesaa kɛse. Nna Agyenkwa n’ayamuhyehye wɔ hɔn a wobisa no do so dɛmara nnsesae. Onyim mbrɛ ɔyɛ a abrabɔ mu ɔhaw na basabasayɛ besi botum ayɛ tse. Onyim mbrɛ osi yɛ mberɛw dɛ yɛbɛyew hɛn kwan tse. Onyim dɛ ɔtɔfabi a yɛhaw wɔ ndaamba ho. Na Ɔkã kyerɛ ɔwo na emi dɛ, dɛmara dɛ ma Ɔkãa kyerɛɛ N’akadofo mber tsentsen no dɛ:
Sɛ ewɔ nsanmuyi horow a ohia yɛ a, Jesus Christ na N’asɛmpa a wɔdze asan ananmu aba no nye nsanmuyi tsitsir no. Sɛ ewɔ nsɛmbisa a, Jesus Christ na N’asɛmpa a wɔdze asan ananmu aba no nye mbuae tsitsir no.
Iyi ntsi na mepɛ For the Strength of Youth: A Guide for Making Choices [Ama Mbabun Enya Ahoɔdzen: Kwankyerɛ ma Nsanmuyi]. Ɔkyerɛ hɛn kɔ Jesus Christ hɔ ama yeetum eenya N’ahoɔdzen. Mber nyinara medze bi hyɛ mo kotoku mu. Ber a mihyia nkorɔfo wɔ wiadze nyinara a wɔpɛ dɛ wobohu siantsir a ihɛn, dɛ Jesus Christ N’Asɔrmba, yɛ dza yɛyɛ ntsi a, menye hɔn kyɛ kwankyerɛ yi.
Ama Mbabun Enya Ahoɔdzen kyerɛkyerɛ onnyiewiei nokwar nsɛm fa Agyenkwa na N’Akwan ho. Ɔto nsa frɛ wo dɛ yɛ nsanmuyi a ogyina nokwar no do. Na ɔkyɛ anohoba nhyira a Ɔtserɛw mu dze ma hɔnnom a wɔkã No do no. Meserɛ, kenkan, dwendwen ho, na kyɛ kwankyerɛ yi!
To nsa frɛ No ma ɔmbra mu
Jesus Christ pɛ dɛ Ɔbɛkã w’abrabɔ ho—ɔwɔ hɔ aber biara, daa daa, wɔ mber pa na mber bɔn mu. Onngyina anamɔn kwan n’ewiei ara, rotweɔn wo dɛ ibɔto No. Ɔnye wo bɛnantsew wɔ kwan no anamɔn biara a ebotu no. Ɔno nye Ɔkwan no!
Mbom Ɔrennhyɛ Noho mba w’abrabɔ mu. Ɔnam wo nsanmuyi do, ito nsa frɛ No dɛ Ɔmbra mu. Iyi nye siantsir a kwankyerɛ dɛ edze bɛyɛ nsanmuyi, tse dɛ Ama Mbabun Enya Ahoɔdzen, sombo dodoodow. Aber biara a ebɛyɛ nsanmuyi a ɔtsen na ogyina Agyenkwa n’onnyiewiei nokwar horow do no, ekyerɛ dɛ epɛ No wɔ w’abrabɔ mu. Nsanmuyi horow yinom buebue ɔsor mbobow, na N’ahoɔdzen hue gu w’abrabɔ mu.11
Yɛ Nkitahodzi Dzendzen
Ibotum akaa dɛ Agyenkwa no dze hɔnnom a wɔtse na wɔyɛ Ne nsɛmkãe no totoo ɔbarimba nyansafo no a “osii ne dan wɔ ɔbotan do no ho.” Ɔkyerɛkyerɛɛ mu dɛ:
“Na nsu tɔree, na nsuyirii bae, na ehum tui, ma wɔboor dan no, na ɔannhwe ase, osiandɛ wɔtoow ne fapem wɔ ɔbotan do.’’12
Dan tum gyina ehum ano nnyɛ dan no yɛ dzen ntsi. Ɔsan so tum gyina ehum ano nnyɛ ɔbotan no yɛ dzen ara ntsi. Dan tum gyina ehum ano osiandɛ ɔafam dɛm ɔbotan dzendzen no pintisnn. Ɔyɛ nkitahodzi n’ahoɔdzen ma ɔbotan no na ohia.
Ne saso no ntsi, ber a yɛkyekyer hɛn abrabɔ no, ohia dɛ yɛyɛ nsanmuyi horow apapa. Na ohia dɛ yɛtse Agyenkwa n’onnyiewiei nokwar no ase. Naaso ahoɔdzen no a yebehia dze egyina abrabɔ n’ehum ano ba ber a yɛdze hɛn nsanmuyi horow nye Jesus Christ na Ne nkyerɛkyerɛ nya nkitahodzi. Dɛm na Ama Mbabun Enya Ahoɔdzen boa hɛn ma yɛyɛ.
Mfatoho, w’anyɛnkofo botum ehu dɛ ebɔ mbɔdzen dɛ nnkã kasa bɔn anaa nnhyehyɛ ahorba. Wobotum ehu wo dɛ ehwɛ dɛm abofra no a ɔwɔ skuul a nkorɔfo dodowara mmpɛ n’asɛm anaa mpo wɔyɛ no ayakayakadze no do. Naaso ana wonyim dɛ eyɛ nsanmuyi horow yinom osiandɛ Jesus Christ kyerɛkyerɛɛ dɛ “nyimpa nyinara yɛ wo nuambanyin na nkyerɛbaa ntsi—a nkorɔfo … a wɔyɛ soronko sen ɔwo kã ho’’?13
W’anyɛnkofo botum ehu dɛ ekɔ asɔr Kwesida biara. Wobotum ahyɛ no nsew ber a idum ndwom bi anaa wɔto nsa frɛ wo dɛ kɔhwɛ sene bi a nnkɔ. Naaso ana wonyim dɛ eyɛ nsanmuyi horow yinom osiandɛ “enye Ɔsor Egya na Jesus Christ wɔ enyigye ahyɛmudzi nkitahodzi,’’ na ntsi no dɛm enyimpisi ne fã bi dɛ ebɛbɛkã Agyenkwa do no no, w’enyi sɔ “dɛ ibenya Sunsum Krɔnkrɔn no dɛ wo daa daa nyɛnko a’’?14
Nkorɔfo botum ehu dɛ nnom nsa dzen anaa nnhyew sigyarɛt anaa nnom ndur bɔn. Naaso ana wonyim dɛ eyɛ nsanmuyi horow yinom osiandɛ Jesus Christ kyerɛkyerɛɛ dɛ “nyimpa wo nyimpadua yɛ krɔnkrɔn,’’ “akyɛdze nwanwa fi wo Ɔsor Egya hɔ,’’ Ɔyɛɛ no wɔ No su do?15
W’ayɛnkofo botum ehu dɛ nnsisi anaa nnwia adze na nnfa nwomasũa nndzi agor. Mbom ana wonyim dɛ iyi ntsi na Jesus Christ kyerɛkyerɛɛ dɛ “nokwar no bɛma ayɛ adehye’’?16
Nokwar ne nyinara nye dɛ, ana w’anyɛnkofo nyim dɛ ɔtɔfabi a eyɛ nsanmuyi horow yinom a wɔnnyɛ atsenkã ama eedzi nokwar aama Christ ne gyinapɛn horow osiandɛ inyim dɛ “Jesus Christ nye w’ahoɔdzen a’’?17
Ɔno Nye Hom Ahoɔdzen
Medze mo nokwar dase ma hom dɛ Jesus Christ nye Kwan no dze kɔ ndaamba enyimnyam a ɔhyerɛn no—wo ndaamba. Na Ɔsan so nye Kwan no dze kɔ sesei enyimnyam a ɔhyerɛn no. Nantsew N’akwan mu, na Ɔnye wo bɛnantsew. Ibotum ayɛ iyi!
M’anyɛnkofo adɔfo kumabaa, Jesus Christ nye hom ahoɔdzen. Kɔdo nye No nnantsew, na Ɔbɔboa wo ma “edze anomakɔr ne ntsaban’’ etu akɔ sor18 dze akɔ onnyiewiei dɛwdzi a Ɔahyehyɛ ama wo no.
© 2024 odzi wɔ Intellectual Reserve, Inc. All rights reserved. Wotsimtsimii wɔ USA. Ngyiresi Borɔfo kasa ngye ntomu: 6/19. Nkyerɛase ngye ntomu: 6/19. Monthly For the Strength of Youth Message, Ebɔw 2024 ne nkyerɛase. Fante. 19356 502