Fa Daa Daa Mpaabɔ Nyɛn Wo Kra

Ber a nkɔnhyɛnyi Enos kɔr dɛ ɔrekɛyɛ ha eku mbowa wɔ haban mu no, ɔdwendwenn “nsɛm a daa [ɔ]tse dɛ [n]’egya rekã a ɔfa onnyiewiei nkwa ho, na ahotseweefo hɔn dɛw a wobedzi ho.” Nsɛm yinom “hyɛɛ [n’]akoma mu mã” (Enos 1:3).

Ɔnam dɛ nna Enos n’adwen wɔ sunsum tsebew mu no ntsi, ɔtsee adzehia dzendzenndzen bi: Ɔkãa dɛ, “ Ɔkɔm dzee me kra (Enos 1:4; woetsi mu aka ho).

Ebɛnadze na Enos yɛe ber a ɔtsee dɛm sunsum mu ɔkɔm yi, sunsum mu edziban hia yi? Ɔkãa dɛ, “Mubuu ntwɛr wɔ me Yɛfo enyim, na medze mpaabɔ a ɔyɛ dzen totɔe serɛɛ no wɔ mara me kra ntsi” (Enos 1:4).

Nna Enos no sunsum mu ɔkɔm no sõ ara ma ɔbɔɔ mpaa “da no nyina … na adzesaa no so [ɔ]maa [ne] ndze do dzendzenndzen ma odur sor” (Enos 1:4). Ewiei no, Nyankopɔn yii ne mpaa ano na ɔdze no bɔn kyɛɛ no. Enos tsee nkã dɛ wɔapepa n’afɔdzi. Naaso no sunsum mu edziban no wɔannsõ hɔ ara.

Osũaa tum a ɔwɔ gyedzi wɔ Jesus Christ no mu, na ohuee ne kra nyina bɔɔ mpaa maa no nkorɔfo—n’atamfo mpo. Ɔnye Ewuradze dzii ahyɛmu na onyaa anohoba ahorow fii No hɔ. Na Enos ne mpaabɔ dzendzen ekyir no, ɔkɔr no nkorɔfo no mu a ɔhyɛɛ nkɔm na ɔgyee dase wɔ ndzɛmba a ɔatse na oehu ho. (Hwɛ Enos 1:5– 19.)

Nnyɛ mpaabɔ nyina na wobeyi ano wɔ kwan nwanwa a ɔtse dɛm mu, naaso hɛn mpaabɔ sũahu horow a yenya botum ayɛ mfaso na abrabɔ nsesa. Yebotum esũa adzesũadze horow a ohia efi Enos ne mpaabɔ sũahu mu. Mfatoho:

• Yɛreper dɛ yɛdze asɛmpa no bɔbɔ bra emudzi mu no botum aboa hɛn ma yɛatse hɛn sunsum mu ɔkɔm.

• Hɛn sunsum mu ɔkɔm botum na ɔsɛ dɛ ɔdze hɛn kɔ hɛn ntwɛr enyim ma yɛhwehwɛ Ɔsor Egya no mboa.

• Yɛrobɔ mpaa ama Ɔsor Egya no botum aboa amee hɛn sunsum mu ɔkɔm—na ndzɛmba binom so.

• Yetum bɔ mpaa wɔ beebiara, aber biara.

• Mpaabɔ tum boa hɛn ma yenu hɛnho.

• Mpaabɔ tum hyɛ hɛn gyedzi wɔ Jesus Christ mu dzen.

• Yebotum enya hɛnara hɛn dasegye dɛ hɛn Ɔsor Egya tsie hɛn na Onyim hɛn.

• Dasegye na ahoɔdzen a yenya no wɔ mpaabɔ mu no tum boa hɛn ma yɛsom na yɛhyɛ binom dzen.

Mfonyin

Elder Soares a nna ɔyɛ aberantsɛba

Mo Sũahu wɔ Mpaabɔ no Tum Ho

Tse dɛ Enos, muduaa mara mo sũahu do sũaa dɛm adzesũadze yi ara mu binom. M’awofo dɔɔm Jesus Christ N’Asɔr a ɔwɔ hɔ ma Nda a Odzi Ekyir Ahotseweefo ber a nna meyɛ aberantsɛba, na midzii mfe awɔtwe na wonumaa me. Nna dabaa minya atsenka pa na ahomka wɔ m’akoma mu fa mo Sor Egya na Jesus Christ ho, N’asɛmpa a wɔdze asan ananmu no ho, na N’asɔr ho. Mbom midzii bɛyɛ mfe 16 ansaana morobɔ mpaa wɔ dɛm ndzɛmba yinom no nokwar ho.

Mo bishop a woenkenyan no no frɛɛ me dɛ menkyerɛ Sunday School mbabun adze. Nna ɔsɛ dɛ mekyerɛ adze fa mbrɛ yebesi bodua mpaabɔ do enya asɛmpa no ho dasegye. Dɛm edwuma a mo bishop dze maa me yi gya me ma modwendween mara me dasegye ho yie. Nna mafa mber esũa Mormon Nwoma no na nna metse nkã dabaa dɛ Asɔr no yɛ nokwar. Nna megye Agyenkwa Jesus Christ dzi, mbom nna memmfaa Moroni n’anohoba a ɔwɔ Moroni 10:4–5 no enyiber do da. Nna mommbɔɔ mpaa mmfaa asɛmpa no no nokwar ho da.

Mekaa dɛ nna metse nkã wɔ m’akoma mu dɛ sɛ merebɛkyerɛ mbabun yinom mbrɛ wosi dua mpaabɔ do nya dasegye a, ɔwɔ dɛ mobɔ mpaa dze nya dasegye ma mara moho. Ɔkɔm dzee me kra—bia wɔ kwan fofor do a ɔnntse dɛ Enos ne dze no, naaso mbrɛ ɔtse biara no metsee sunsum mu ehiadze bi.

Mereyɛ adzesũadze no ho ahoboa no, mubuu ntwɛr na miyii m’akoma do ebisadze too Ɔsor Egya n’enyim dɛ Onsi nokwar a metse wɔ mo mu no pi. Nna m’enyi nnda nyikyerɛ kakraka biara do. Mbom mibisaa Ewuradze sɛ asɛmpa no yɛ nokwar no, metsee dɛw papaapa bi wɔ m’akoma mu—ɔyɛ dɛm ndze bɔkɔɔ no risi no pi kyerɛ me dɛ ɔyɛ nokwar na monkɔ do nnyɛ dza mereyɛ no.

Nna nkã a metse no yɛ dzen papa nara dɛ nna munnkotum ebu m’enyi egu nyiano no do na makã dɛ minnyim. Midzii da mu no nyina a nna metse enyigye dodow. Nna m’adwen da sor a morodwendwen dɛw a ɔwɔ m’akoma mu ho.

Kwesida a odzi do no, migyinaa me mfɛfo baasa anaa anan no enyim a, hɔn nyina wosuar kyɛn me. Megyee dase kyerɛɛ hɔn dɛ Ɔsor Egya beyi hɔn mpaabɔ ano sɛ wɔwɔ gyedzi a.

Mfonyin

Elder Soares

Ofitsi dɛm aber no, dɛm dase yi nye me atsena. Ɔaboa me ma mesi ngyinae horow, nkanka wɔ mber a mowɔ ɔhaw mu. Dɛm mpaabɔ no dɛm da no, nye dasegye horow a menya wɔ mfe a abasen mu no, ama me kwan ma medze gyedzi a osi pi dzi dase kyerɛ nkorɔfo dɛ, wobotum enya nyiano efi Ɔsor Egya hɔ sɛ wɔdze gyedzi bɔ mpaa a. Iyi ayɛ nokwar ber a magye dase dɛ asɛmpasomafo, dɛ Asɔr banodzifo, dɛ egya na okun, na mpo ndɛ dɛ Ɔsomafo.

Nokwar, nnyɛ ber a yɛtse sunsum mu ehiadze pɔkyee bi nkõ na yɛbɔ mpaa. Ntsi, ebɛn ber na ɔsɛ dɛ yɛbɔ mpaa? Na ebɛnadze na ɔsɛ dɛ yebisa wɔ mpaa mu? Nyiano tsiaba no nye aber biara na adze biara.

Nyankopɔn yɛ hɛn Ɔsor Egya. Yeruhu iyi no sesã mbrɛ yesi bɔ mpaa. Nkɔnhyɛnyi Joseph Smith kyerɛkyerɛɛ dɛ: “Yenya Nyankopɔn ho nyimdzee no, yɛhyɛ ase hu mbrɛ yebesi bɔkɔ N’enyim, na mbrɛ yebesi bebisa ama yeenya nyiano. … Sɛ yɛayɛ krado dɛ yɛbɛba No hɔ a, Ɔayɛ krado dɛ Ɔbɛba hɛn hɔ.”¹

Dabaa Ɔsor Egya ayɛ krado dɛ obetsie hɛn na Ɔpɛ dɛ yɛtaa bɔ mpaa ma no aber biara. Ɔwɔ dɛ “[yɛ]nye Ewuradze fa apam wɔ biribiara a [yɛ]bɛyɛ ho” (Alma 37:37) na yɛbɔ mpaa adzekyee, ewiaber na adzesaa. Ɔwɔ dɛ yɛbɔ mpaa wɔ fie, edwuma mu, wɔ skuul—beebi a yɛwɔ biara nna wɔ hɛn anamontu biara do (hwɛ Alma 34:17–26).

Ɔwɔ dɛ yɛbɔ mpaa wɔ hɛn ebusua ebusua mu (hwɛ 3 Nephi 18:21). Ɔwɔ dɛ yɛbɔ mpaa “[wɔ hɛn] ano nye [hɛn] akoma mu, wɔ bagua mu nye kokoa mu” (Nkyerɛkyerɛ na Ahyɛmudzi 81:3). Na “sɛ [y]ennsũ ammfrɛ Ewuradze a, [yɛ]mma mpaabɔ nhyɛ [hɛn] akoma mu mã daa nyina wɔ [hɛn] yieyɛ, nye hɔn a woetwa [hɛn]ho ehyia so hɔn yieyɛ ntsi” (Alma 34:27). Na ɔwɔ dɛ daa yɛbɔ mpaa ma Egya no wɔ Jesus Christ ne dzin mu (hwɛ 3 Nephi 18:19–20).

Mfonyin

Joseph Smith a nna ɔyɛ aberantsɛba

Walter Rane yɛɛ Joseph Smith Nsaano Mfonyin no, mma nnkɔpe

Yɛrokɔ Hɛn Ɔsor Egya N’enyim

Hɛn Ɔsor Egya pɛ dɛ Ohyira hɛn. Na Ɔbɛyɛ—sɛ yebisa a. Nkɔnhyɛnyi Joseph Smith kyerɛe dɛ, “Kaa dɛ sɛ yemmbisa a yennkotum enya hwee; dɛm ntsi, bisa wɔ gyedzi mu, na ibenya nhyira dɛ mbrɛ Ewuradze hu dɛ ɔfata dɛ Ɔdze gu wo do.”²

Hɛn daa daa mpaabɔ a ɔkɔ do no yɛ sunsum mu edziban pa ne fã tsitsir a ɔmee hɛn akra no kɔm. Yɛnye Ɔsor Egya ridzi nkitsaho wɔ mpaabɔ mu no wɔ hɔ na ɔpen do wɔ beebiara na aber nyina.

Kyerɛwsɛm a mepɛ paa no mu kor kyerɛ hɛn mbrɛ ɔsɛ dɛ yɛkɔ Ɔsor Egya N’enyim ber a yebu ntwɛr wɔ mpaabɔ mu: “Brɛ wo ho adze; na Ewuradze wo Nyankopɔn bosuo wo nsamu agye wo taataa, na ɔama wo wo mpaabɔ ho mbuae” (Nkyerɛkyerɛ na Ahyɛmudzi 112: 10). Sɛ yɛbrɛ hɛn ho adze na yɛyɛ setsie a, Ɔsor Egya bɛka hɛn ho. Obosuo hɛn nsamu agye hɛn taataa. Obekenyan hɛn bea a yɛnkɔ na dza yɛnyɛ ho. Obeyi hɛn mpaabɔ ano wɔ Ne pɛ mu, No kwan do, Ne mber mu, na Ne nyimdzee mapã wɔ dza oye ma hɛn ho mu.

Ɔwɔ dɛ yɛkaa iyi na yɛma kwan a yɛwɔ dɛ yɛkɔ Nyankopɔn N’ahengua n’enyim dze gye Ne nsamu nhyira no som hɛn bo.