Ketihnahki Palingehnomw Amw Doden Kapakap

Ansou me Inos kolahn kesik mahn nanwelo, e tamanda soangen “koasoi kan me [e] kin kalapw rongasang [ah] pahpao me pid duwen mour soutuk, oh popohl en souleng kan.” Mahsen pwukat “sairada wasa loal en [ah] mohngiong” (Enos 1:3).

Pwehki ngehno eh audehla nan ahn Inos madamadau, e ahnikihda pepehm laud ehu: e nda, “Palingeniet duhpeklahr,” (Enos 1:4; emphasis added).

Dahme Inos wia ansou me e pehmadahr me pali ngene duhpeklahr, anahn en ketihna palingehne? “I kelepwidier mwohn me kapikiehdao,” e koasoia, “oh I ahpw lukweriong ih ni kapakap ngidingid ong ni palingeniet” (Inos 1:4).

Palingehnen Inos inenen duhpekla ni mehlel me karehda ah kakapak “rahno pwon … ni eh wasapwongidier I pil ngihl laudida lao ngiliet leldahla nanleng.” (Inos 1:4). Ni imwilao, Koht ketin sapeng ah kapakap oh mahkihong dipehkan. Inos pehmada ah katoutou kan arail sohrala. Ahpw ketihnepen palingene sohte uhdi mwo.

E esedahr duwen manaman en pwoson Sises Krais, oh e pil kapakapki ni ngidingid nah aramas akan—iangahki ah imwin tihti kan. E wiahda ah inou sarawi kan ong Kauno oh alehdi inou tengeteng kan sang Reh. Oh mwurin ahn Inos kapakap kehlail, e ahpw pwuralahng rehn nah aramas akan kiheng irail kokohp oh kadkadedehki mehkan koaros me e rongehr oh kilang. (Kilang Enos 1:5–19.)

Kaidehn kapakap koaros kin alehdi soangen pasapengo, ahpw soahng koaros me kitail esehla ni atail kin kapakap pil kin kak mie katepe oh pil kak wekidala atail mour. Kitail kak esehla ekei mehn kaskuhl kesempwal sang ni dahme Inos alehdihsangehr ni ah kapakapo. Me duwehte:

• Atail kin nantihong momourki rongamwahuo kak seweseikitail en kak kehnda duhpek en palingenitail.

• Duhpek en palingenitail kak kahrehieng kitail en kin kelepwidi oh rapahki sawas sang Samatail Nanleng

• Kapakap ong Sahm Nanleng kak sewese kamwahuiala duhpek en palingenitail kan—oh pil depalahsang mwo.

• Kitail kak kapakap wasa koaros, ansou koaros.

• Kapakap kak seweseikitail koluhla.

• Kapakap kak kakehlakahla atail pwoson Sises Krais.

• Kitail kak alehdi pein atail kadehde me Samatail Nanleng kin karongeikitail oh ketin mwahngih duen iretail.

• Kadehde oh kakehlail me kitail aledihsang atail kapakap kak seweseikitail papah oh kakehlailih mehteikan.

Kilel

Elder Soares ni ah pwutak

Dahme I Esehla sang ni Manaman en Kapakap

Duwehte Inos, I esehla ekei soangen mehn kaskuhl pwukat sang ni dahme I pein lelohng. Ahi pahpa nohno iangala Mwomwohdiso en Sises Krais en Souleng en Imwin-rahn akan ansou me I kisin pwutak, oh I pepdaisla ansou me I sounpar waluh. I kin kalapw ahniki pepehm mwahu, nan ahi mohngiong me pid Semei Nanleng oh Sises Krais, Sapwellime rongamwahu kopwurpwurdoh ,oh Sapwellime Mwomwohdisoh. Ahpw e lao lel ai kereniong sounpar eisek wenou I ahpw kapakapki ma mepwukat mehlel.

Ahi pisopo pekida rehi ien padahk nan sunday skuhl ong me pwulopwul kan. I pahn padahngki mehn kaskuhl me pid ia mwomwen atail kak alehdi kadehde en rongamwahuo sang ni atail pahn kin kapakap. Kepwukoah me kohiengie sang rehn ahi pisopo karehda ahi medemedewe loal me pid pein ahi kadehde. I kin onopiki Pwuhk en Mormon oh I kin pehm me Mwomwohdiso wet mehlel. Ansou koaros I kin kamehlele Sounkomour Sises Krais, ahpw I sohte kiong nan ahi mohngiong ahn Moroni inou me mihmi nan Moroni 10:4–5. Sohte pak ehu I kapakapki me pid duen mehlel en rongamwahuo.

I tamatamante pepehm me mi nan ahi mohngionget me ma I pahn padahkiong me pwulopwul pwukat ia mwomwen arail pahn kak alehdi kadehde sang ni kapakap, I pahn anahne kapakapki pwe ien pein alehdi ai kadehde. Palingeniet duhpeklahr—mwein e pahn weksang dahme wiawihong Inos, ahpw I pil pehmada anahn en palingehni.

Ni ahi kaukaunop ai leseno, I kelepwidi oh kapakap sang nan ahi mohngiong ong Semei Nanleng pwe en kamehleleiongie dahme I pepehm loaleiet. I sohte kasik kasansal laud ehu. Ahpw ansou me I peki rehn Kauno ma rongamwahu wet pwung, I pehmadahr pepehm mwahu ehu nan ahi mohngiong —ngihl meleileio, kisin ngihl tikitiko kamkamehleleiongie me e pwung oh I en wenlahte mowe oh wia dahme I kin wihwiao.

Pepehm wet me inenen kehlail me karehda ahi sohte kak pohn sehse pasapengo oh nda me I sehse. Rahno pwon I ahniki pepehm en peren. Ahi madamadau audaudkihda me pid pali ngehn oh medemedewe kansenamwahu en pepehm me mihmi nan ahi mohngiong.

Rahn sarawio, I ahpw kesihnenda mwohn iengei tohn skuhl silimen de pahmeno, irail koaros pwulopwul sangie. I kadehdeiong irail me Sahm Nanleng pahn sapeng arail kapakap ma re ahniki pwoson.

Kilel

Elder Soares

Sangete ansouo lel met, kadehdeo mihmihte rehi. E kin seweseie ni ai kin wiahda pilipil kan, ni mehlel ansou kan me I kin sohpai kahpwal kan kan. Kapakap me I wia rahno, patehng kadehde kan me I alehdi nan pahr akan kohdo, me karehda ahi kak kadehdeiong aramasa akan sang nan loalei unsek me irail kak alehdi pasapeng sang rehn Sahm Nanleng ma irail pahn kapakap ni pwoson. Met mehlel nin duwen ahi kadehdehkiher ni ahi misineri, ni ahi wia soun kaweid en Mwomwohdiso, nin duwen ai wia pahpa men oh ohl pwopwoud men, oh rahnwet nin duwen ai wia Wahnparon men.

Ei, kitail sohte kin kapakapete ansou me kitail kin pehm anahn laud en palingehn Ah, iahd me kitail konehng kapakap? Oh dahme kitail konehng kapakapki? Pasapeng mwotomwot iei ansou koaros oh soahng koaros.

Koht iei Samatail Nanleng. Atail kin esehla met kin wekidala atail kapakap. Soukohp Joseph Smith padahngki me ni atail kin esehla duwehn Koht, kitail kin esehla mwomwen atail pahn keiong Ih, oh ia mwomwen atail pahn peki mehkot pwe kitail en ale pasapengpe. … Ansou me kitail kin onopada pwe kitail en kodohng Reh, E kin ketin onopadahr pwe en ketido rehtail.¹

Samatail Nanleng onopadahr ansou koaros en karongeikitail oh kupwuriki kitail en kin poaden kapakap oh doden kapakap ong Ih. Kitail pahn “ale kaweid rehn Kauno nan [mehkoaros] me ke pahn kin wia,” (Alma 37:37) oh kapakap nimenseng, ninsouwas, oh ninsoutuk. Kitail pahn kapakap ni imwatail kan, wasahn doadoahk, wasahn skuhl—wasa koaros me kitail mihmi ie oh soahng koaros me kitail koadoakoadoahke (kilang Alma 34:17–26).

Kitail konehng kapakap nan atail peneinei kan (kilang 3 Nephi 18:21). Kitail konehng kapakap nan atail mohngiong kan oh ni sansal, nanpwungen aramas oh ni atail kelehpwla (Doctrine and Covenants 81:3). Oh ansou me [kitail] sohte kin lukwerlahng Kauno, [kitail pahn] mweidohng [atail] mohngiong kan en audauda, oh nantihlahte ni atail kapakap ong ih ong pein [atail] nsenamwahu oh pil nsenamwahu en irail kan me kapkapil [kitail] (Alma 34:27). Oh kitail udahn anahne kapakap ansou koaros ong Sahmo ni mwaren Sises Krais (kilang 3 Nephi 18:19–20).

Kilel

Joseph Smith ni eh wia pwutak pwulopwul

Kilel en Joseph Smith sang Walter Rane, sohte me pahn koapih

Koasoiong Samatail Nanleng

Samatail Nanleng men kapai kitailda. Oh E pahn ketin wia—ma kitail peki. Soukohp Joseph Smith padahngki kitail en tamataman me ma kitail sohte peki kitail sohte kak alehdi mehkot; eri, peki ni pwoson, oh kumwail pahn alehdi kapai kan ni mwohmw ehu me Koht ketin kupwuriki ong kitail.²

Atail kapakap akan en ansou koaros udahn kesempwal oh e wia mehn karoson pahrek en palingehn ong ni duhpek en palingenitail kan. Koasokosoaiong Sahm Nanleng sang ni kapakap mweimweiong kitail oh kitail kak wia wasa koaros oh ansou koaros.

Ehu iren pwuhk sarawi me I kaselelki padahngki ia mwomwen atail kak karaniala Samatail Nanleng ansou me kitail kin kelepwidi en kapakap: kitail en aktikitikila; Kauno Koht ahpw pahn kol pehtail oh kaweid kitail, oh sapengala atail kapakap akan (Doctrine and Covenants112:10). Ni ansou me kitail aktikitikla oh peik, Sahm Nanleng pahn ketket rehtail. E pahn kol pehtail oh kaweid kitail. E pahn ketin kainangihkinkitail wasa kitail pahn kohla ie oh dahme kitail pahn wia. E pahn ketin sapeng atail kapakap akan ni dahme E ketin kupwurki, ni Sapwellime wiepe, Sapwellime ansou, oh Sapwellime marain unsek ong dahme mwahu ong kitail.

Kitail anahne tamataman met oh kesekesempwalki ansou mwahu en karaniala Koht oh alehdi kapai kan me sang Reh.