’A fa’a’amu i tō ’oe vāerua i te pure tāmau

’A haere ai te peropheta Enosa e taparahi i te mau animala i roto i te uru rā’au, ’ua feruri ’oia i « te mau parau [tāna] i fa’aro’o pinepine i [tōna] metua tāne i te paraura’a nō te ora mure ’ore, ’e te ’oa’oa ho’i o te feiā mo’a ». Teie te mau parau « ’ua puta hōhonu roa ïa i roto i [tōna] ’ā’au » (Enosa 1:3).

Nō te mea tei roto Enosa i teie huru ferurira’a pae vārua, ’ua putapū ’oia i te hō’ē hina’aro pūai : « ’Ua hia’ai ihora tō’u vārua », ’ua parau ’oia (Enosa 1:4 ; reta tei fa’ahuru-’ē-hia).

E aha tā Enosa i rave ’a putapū ai ’oia i teie po’ia pae vārua, teie hina’aro i te mā’a pae vārua ? « ’Ua topa turi ihora vau i mua i te aro o Tei Hamani iā’u ra », ’ua parau ’oia, « ’e ’ua ti’aoro atu rā vau iāna ma te pure ’ū’ana, ’e te anira’a atu i te maita’i nō tō’u ihora vārua » (Enosa 1:4).

Nō te po’ia rahi o Enosa i te pae vārua, ’ua pure ’oia « i te mahana tā’āto’a e pō ihora, tē ha’apūai noa ra [tōna] reo i ni’a ē tae roa atu ra te reira i ni’a i te mau ra’i ra » (Enosa 1:4). I te pae hope’a, ’ua pāhono mai te Atua i tāna pure ’e ’ua fa’a’ore i tāna mau hara. ’Ua ’ite a’era Enosa i tāna hara i te mo’era’a. ’Aita rā tāna mā’a pae vārua i hope i reira iho.

’Ua ha’api’i mai ’oia nō ni’a i te mana o te fa’aro’o ia Iesu Mesia, ’e ’ua nini’i atu ’oia i tōna vaerua tā’āto’a nō tōna ra mau ta’ata—e tae noa atu nō tōna mau ’enemi. ’Ua rave ’oia i te mau fafaura’a ’e te Fatu ’e ’ua roa’a mai nā roto mai i te Fatu i te mau parau fafau. ’E i muri a’e i te pure ’ū’ana a Enosa, ’ua haere atu ’oia i rotopū i tōna mau ta’ata i te tohura’a ’e i te fa’a’ite-pāpū-ra’a i te mau mea ’o tāna i fa’aro’o ’e i ’ite. (Hi’o Enosa 1:5–19.)

E’ita te mau pure ato’a e fāri’i i te hō’ē pāhonora’a huru pe’ape’a, e nehenehe rā tō tātou mau ’itera’a nō te pure e riro tāmau ’ei ’ohipa faufa’a ’e e taui i te orara’a. E nehenehe tātou e ha’api’i mai i te tahi mau ha’api’ira’a faufa’a roa nō te ’ohipa i tupu nō Enosa nō te pure. ’Ei hi’ora’a :

• E nehenehe te tūtavara’a ’ia ora hope roa i te ’evanelia e tauturu ia tātou ’ia ’ite i tō tātou po’ia pae vārua.

• E nehenehe ’e e ti’a i tō tātou po’ia pae vārua e fa’atūturi ia tātou nō te ani i te tauturu a te Metua i te ao ra.

• E nehenehe te purera’a i te Metua i te ao ra e tauturu i te ha’amāha i tō tātou po’ia pae vārua—’e te tahi atu ā.

• E nehenehe tātou e pure i te mau vāhi ato’a, i te mau taime ato’a.

• E nehenehe te pure e tauturu ia tātou ’ia tātarahapa.

• E nehenehe te pure e ha’apūai i tō tātou fa’aro’o ia Iesu Mesia ?

• E nehenehe tātou e fāri’i i te ’itera’a pāpū nō tātou iho ē, tē fa’aro’o mai nei tō tātou Metua i te ao ra ia tātou ’e ’ua ’ite ’oia ia tātou.

• E nehenehe te ’itera’a pāpū ’e te pūai tā tātou e fāri’i mai nā roto i te pure, e tauturu ia tātou ’ia tāvini ’e ’ia ha’apūai ia vetahi ’ē.

Hōho’a

Elder Soares ’ei tamaiti ’āpī

Tō’u ’itera’a ’e te mana o te pure

Mai ia Enosa, ’ua ha’api’i mai au i te tahi o teie mau ha’api’ira’a maoti te ’ohipa i tupu nō’u iho nei. ’Ua ’āmui mai tō’u nā metua i Te ’Ēkālesia a Iesu Mesia i te Feiā Mo’a i te mau Mahana Hōpe’a nei i tō’u tamaiti ’āpīra’a, ’e ’ua bāpetizohia vau i te va’ura’a o tō’u matahiti. ’Ua vai noa na te hō’ē nīnoa mana’o maita’i ’e te māhanahana i roto i tō’u ’ā’au nō tō’u Metua i te ao ra ’e nō Iesu Mesia, nō tāna ’evanelia tei fa’aho’i-fa’ahou-hia mai ’e tāna ’Ēkālesia. Terā rā i te rae’ara’ahia tō’u matahiti e 16, tō’u ha’amatara’a i te pure nō ni’a i te parau mau o teie mau mea.

’Ua ani mai tō’u ’episekōpo fa’auruhia ’ia ha’api’i vau i te hō’ē piha Ha’api’ira’a Sābati nā te feiā ’āpī. ’Ua tītauhia iā’u e ha’api’i i te hō’ē ha’api’ira’a, e nāhea e roa’a ai ia tātou i te hō’ē ’itera’a pāpū nō te ’evanelia nā roto i te pure. ’Ua tītau teie fa’auera’a a tō’u ’episekōpo iā’u ’ia feruri hōhonu atu ā i tō’u iho ’itera’a pāpū. ’Ua rave au i te taime nō te ’imi maita’i i te Buka a Moromona ’e ’ua ’ite tāmau iho ā vau ē, e parau mau te ’Ēkālesia. ’Ua ti’aturi noa vau i te Fa’aora ia Iesu Mesia, ’aita rā vau i rave pāpū i te fafaura’a a Moroni e vai ra i roto te Moroni 10:4–5. ’Aita roa a’enei au i pure nō te parau mau o te ’evanelia.

Tē ha’amana’o nei au i te putapūra’a o tō’u ’ā’au ē, mai te mea e ha’api’i au i teie feiā ’āpī nāhea ’ia roa’a i te hō’ē ’itera’a pāpū nā roto i te pure, e ti’a iā’u iho e pure nō te roa’a i te hō’ē ’itera’a pāpū. ’Ua hia’ai roa tō’u vaerua—penei a’e ma te rāve’a ta’a ’ē i tō Enosa, ’ua putapū rā vau i te hō’ē hina’aro pae vārua.

’A fa’aineine ai au i te ha’api’ira’a, ’ua tūturi atu vau i raro ’e ’ua pūpū atu i te hina’aro o tō’u ’ā’au i tō’u Metua i te ao ra, nō te ha’apāpū mai i te parau mau ’o tā’u e putapū nei i roto iā’u. ’Aita vau e tīa’i nei i te hō’ē fa’a’itera’a rahi. I tō’u rā anira’a i te Fatu ē, e parau mau ānei te ’evanelia, ’ua tae mai te hō’ē nīno’a mana’o mārū i tō’u ’ā’au—teie reo ’iti ha’iha’i tei ha’apāpū mai iā’u ē, e parau mau te reira, ’e e ti’a iā’u ’ia tāmau noa i te rave i te mea tā’u e rave nei.

E mea pūai mau teie nīno’a mana’o ē, e’ita roa e nehenehe iā’u ’ia tau’a ’ore i teie pāhonora’a, ’e ’ia parau ē, ’aita vau i ’ite. ’Ua putapū vau i te reira mahana tā’āto’a i te ’oa’oa rahi. Tei roto tō’u ferurira’a i te mau ra’i, i te hi’ohi’ora’a i te nīno’a mana’o nehenehe i roto i tō’u ’ā’au.

I te sābati i muri mai, ’ua ti’a vau i mua i tō’u nā hoa e toru ’aore rā, e maha pīahi, e mea ’āpī a’e iā’u. ’Ua fa’a’ite pāpū vau ia rātou ē, e pāhono mai te Metua i te ao ra i tā rātou pure mai te mea e fa’aro’o tō rātou.

Hōho’a

Elder Soares

Mai te reira taime, ’ua vai noa teie ’itera’a pāpū i roto iā’u. ’Ua tauturu te reira iā’u ’ia rave i te mau fa’aotira’a, i te mau taime iho ā rā ’a fa’aruru ai au i te mau tāmatara’a. Nā taua pure i taua mahana ra, e tae noa atu i te tahi atu mau ’ite tā’u i fāri’i nā roto i te mau matahiti, i fa’ati’a iā’u ’ia fa’a’ite pāpū i te ta’ata, ma te ti’aturi pāpū ē, e nehenehe rātou e fāri’i i te mau pāhonora’a a te Metua i te ao ra mai te peu e pure rātou ma te fa’aro’o. E parau mau te reira mai tā’u i fa’a’ite pāpū ’ei misiōnare, ’ei ti’a fa’atere nō te ’Ēkālesia, ’ei metua tāne ’e ’ei tāne fa’aipoipo, ’e i teie ato’a mahana ’ei ’āpōsetolo.

’Oia mau, e’ita tātou e pure noa ’ia ’ite ana’e tātou i te hō’ē hina’aro pae vārua pūai ta’a ’ē. Nō reira, e aha te taime tātou e pure ai ? ’E nō aha tā tātou e pure ai ? Te pāhonora’a poto i te mau taime ato’a ïa, ’e nō te mau mea ato’a.

’O te Atua tō tātou Metua i te ao ra. Te ’itera’a i te reira e taui te huru e nāhea tātou ’ia pure. ’Ua ha’api’i te peropheta Iosepha Semita : « Ma te roa’ara’a te ’ite nō te Atua, e ha’amata tātou i te ’ite nāhea ’ia ha’afātata atu iāna, ’e nāhea ’ia ani nō te fāri’i i te hō’ē pāhonora’a. … ’Ia ineine ana’e tātou nō te haere iāna ra, ’ua ineine ’oia nō te haere mai ia tātou ra », ¹

’Ua ineine noa tō tātou Metua i te ao ra i te fa’aro’o ia tātou ’e tē hina’aro nei ’ia pure tātou iāna ma te tāmau ’e te pinepine. E ti’a ia tātou e « paraparau atu i te Fatu i te mau mea ato’a tā [tātou] e rave ra, » (Alama 37:37) ’e ’ia pure i te po’ipo’i, i te avatea ’e i te pō. ’Ia pure tātou i te fare, i te ’ohipa, i te fare ha’api’ira’a—i te mau vāhi ato’a tei reira tātou ’e i roto i tā tātou mau tauto’ora’a (hi’o Alama 34:17–26).

E pure tātou i roto i tō tātou mau ’utuāfare (hi’o 3 Nephi 18:21). E pure tātou « ma te reo ’e ma te ’ā’au ato’a, i te vāhi ta’ata ’e i te vāhi ta’ata ’ore ho’i » (Te Ha’api’ira’a Tumu ’e te mau Fafaura’a 81:3). ’E « ’ia ore [tātou] ’ia ti’aoro atu i te Fatu, ’ia ’ī ïa tō [tātou] ’ā’au i te ti’aoro atu iāna i roto i te pure tu’utu’u ’ore iāna ’ia maita’i nō [tātou], ’e nō te maita’i o te feiā e fa’a’ati nei ia tātou » (Alama 34:27). ’E e ti’a ia tātou ia pure tāmau noa i te Metua nā roto i te i’oa ’o Iesu Mesia (hi’o 3 Nephi 18:19–20).

Hōho’a

Iosepha Semita ’ei tamaiti ’āpī

Fa’ahōho’ara’a nō Iosepha Semita nā Walter Rane, ’eiaha e tāhōho’ahia

Ha’afātatara’a i tō tātou Metua i te ao ra

Tē hina’aro nei tō tātou Metua i te ao ra e ha’amaita’i ia tātou. ’E e nā reira ’oia—mai te mea e ani tātou. ’Ua ha’api’i te peropheta Iosepha Semita, « ’a ha’amana’o ’aita ana’e e ’anira’a, e’ita tātou e fāri’i i te hō’ē mea ; nō reira, ’a ani ma te fa’aro’o, ’e e fāri’i ’outou i te mau ha’amaita’ira’a tā te Atua e hi’o tei au taua hōro’ara’a ra nō ’outou ».²

’Ua riro tā tātou mau pure tāmau ’e te pinepine ’ei tuha’a faufa’a mau nō te fa’a’aifāito i te mā’a pae vārua nō te po’ia o tō tātou vaerua. E roa’a ’e e fāri’i-poupou-hia te ’āparaura’a ’e te Metua i te ao ra nā roto i te pure, i te mau vāhi ato’a ’e i te mau taime ato’a.

Tē ha’api’i nei te hō’ē o tā’u mau pāpa’ira’a mo’a au roa a’e, e nāhea tātou ’ia ha’afātata atu i tō tātou Metua i te ao ra ’ia tūturi ana’e tātou nō te pure : « ’Ia vai ha’eha’a noa ’oe ; ’e nā te Fatu tō ’oe Atua e arata’i ia ’oe nā te rima, ’e e hōro’a atu ia ’oe te pāhonora’a i tā ’oe mau pure » (Te Ha’api’ira’a Tumu ’e te mau Fafaura’a 112:10). ’Ia ha’eha’a ana’e tātou ’e ’ia ha’apa’o, e pārahi mai te Metua i te ao ra ia tātou ra. E arata’i ’oia ia tātou nā te rima. E fa’auru ʼoia ia tātou i te vāhi e haere atu ʼe te mea e rave. E pāhono mai ’oia i tā tātou mau pure mai te au i tōna hina’aro, te rāve’a, te taime ’e te ’ite pāpūra’a i te mea maita’i nō tātou.

E ti’a ia tātou ’ia ha’amana’o i te reira ’e ’ia poihere i te mau rāve’a nō te ha’afātata atu i te terono o te Atua ’e nō te fāri’i i te mau ha’amaita’ira’a a tōna rima.