49-р бүлэг
Мормон ба түүний заасан сургаалууд
Есүс Христийг нифайчууд дээр айлчилснаас олон жилийн дараа хэсэг хүн Сүмийг орхин явж, өөрсдийгөө леменчүүд гэж нэрлэв.
Яваандаа нифайчууд, леменчүүдийн аль аль нь бараг бүгд ёс бус болжээ.
Аммарон хэмээх зөв шударга эр ариун нандин бичээсүүдийг хадгалж байлаа. Ариун Сүнс түүнд тэдгээрийг нуу, ингэснээр тэдгээр нь аюулгүй хадгалагдах болно гэж хэлэв.
Аммарон 10 настай Мормон хүүд цэдгүүдийг хаана нуусныг хэлж өгөв. Аммарон Мормонд найдаж болно гэж мэдэж байлаа.
Мормон 24 нас хүрээд, Нифайн ялтаснуудыг авч, түүн дээр ард түмнийхээ тухай бичих ёстой байлаа.
Мормоныг 11 настай байхад нифайчууд, леменчүүдийн хооронд дайн дэгдэв. Нифайчууд ялж, дахин амар амгалан ноёрхсон.
Нифайчууд дэндүү ёс бус байсан учир Их Эзэн гурван шавиа эргүүлэн авч, гайхамшиг, эдгээлтүүд эцэслэв. Ариун Сүнс ард түмнийг удирдахаа болив.
Мормоныг 15 настай байхад Есүс Христ түүн дээр ирсэн. Мормон Аврагчийн тухай болон түүний сайхан сэтгэлийн талаар илүү ихийг мэдэж авчээ.
Мормон хүмүүст номлохыг хүссэн боловч хүмүүс дэндүү ёс бус байгаа учир номлох хэрэггүй гэж Есүс хэлэв. Тэдний зүрх сэтгэл Бурханы эсрэг эргэсэн байлаа.
Удалгүй дахин нэг дайн дэгдэв. Мормон том биетэй, хүчирхэг хүн болсон учраас нифайчууд цэргээ удирдуулахаар түүнийг сонгожээ.
Нифайчууд леменчүүдтэй олон жилийн турш дайтав. Мормон хүмүүстээ гэр бүл, гэр орныхоо төлөө байлдахад уриалахыг хичээж байлаа.
Нифайчууд дэндүү ёс бус болсон тул Их Эзэн тэдэнд тусалсангүй.
Хэрэв нифайчууд нүглээ наманчилж, баптисм хүртвэл амь өршөөгдөх болно гэж Мормон тэдэнд хэлэв. Гэвч хүмүүс татгалзсан.
Тэд леменчүүдийг бүгдийг ална гэж хүч чадлаараа бардамнаж байлаа. Нифайчууд ёс бус байсан учраас Мормон тэднийг цаашид удирдахаас татгалзав.
Леменчүүд тулалдаан бүрд нифайчуудыг ялж эхлэв. Мормон нифайчуудын их цэргийг дахин удирдахаар шийдсэн.
Ёс бус нифайчууд дайнд ялахгүй гэдгийг тэр мэдэж байв. Тэд наманчилсангүй, тэр ч бүү хэл хэрэгтэй байгаа тусламжийнхаа төлөө залбирсангүй.
Мормон Аммароны нуусан бүх цэдгийг толгодоос авч, хэзээ нэгэн өдөр уг цэдгийг унших хүмүүст зориулан бичив.
Тэр бүх хүнийг, тэр дундаа иудейчүүдийг Есүс Христийн тухай мэдэж, наманчлан, баптисм хүртэж, сайн мэдээний дагуу амьдран, адислагдаасай гэж хүсэж байв.
Ариун Сүнс Христийн ирэх тухай бошиглолыг агуулсан Нифайн бага ялтаснуудыг өөрийнхөө ялтаснуудтай хамт тавь гэж Мормонд хэлэв.
Мормон нифайчуудыг Куморагийн газар нутаг тийш удирдав. Тэнд тэд леменчүүдтэй дахин байлдахад бэлэн болов.
Мормон өндөр настай болж байлаа. Энэ нь сүүлчийн дайн байх болно гэдгийг тэр мэдэж байв. Тэр леменчүүдээр ариун нандин цэдгүүдийг олуулж, устгуулахыг хүсэхгүй байлаа.
Тиймээс тэр Мормоны ялтаснуудыг өөрийн хүү Моронайд өгч, үлдсэн бүх ялтсыг Кумора гүвээнд нуулаа.
Леменчүүд довтолж, 24 нифай хүнээс бусад бүх хүнийг алав. Мормон шархадсан байлаа.
Маш олон нифай хүн үхсэнд Мормон гашуудаж байсан ч тэд Есүсийг эсэргүүцсэн тул алуулсан гэдгийг мэдэж байв.
Мормон нифайчуудад үнэнийг заахыг хичээсэн билээ. Тэр Есүс Христэд итгэлтэй байх нь хэчнээн чухал болохыг тэдэнд хэлсэн.
Тэр тэдэнд Есүс Христийн Цагаатгалаар дамжуулан найдвар тээж, Христийн цэвэр хайраар хайрлан, энэрдэг байхыг заах гэж хичээсэн юм.
Мөн Мормон нифайчуудад сайн мэдээг заасан хүү Моронайдаа захидлууд бичсэн байв.
Мормон нифайчуудын аймшигт ёс бус байдлын талаар бичсэн байлаа. Тэр Моронайд Есүс Христэд итгэлтэй хэвээр бай гэж хэлжээ.
Леменчүүд цэдгүүдийг бичиж дуусгасан Моронайгаас бусад бүх нифай хүнийг болон Мормоныг алжээ.