“ຄວາມເຫລື້ອມໃສ ຄືເປົ້າໝາຍຂອງເຮົາ,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2023)
“ຄວາມເຫລື້ອມໃສ ຄືເປົ້າໝາຍຂອງເຮົາ,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024
ຄວາມເຫລື້ອມໃສ ຄືເປົ້າໝາຍຂອງເຮົາ
ຈຸດມຸ້ງໝາຍຂອງການຮຽນຮູ້ ແລະ ການສິດສອນພຣະກິດຕິຄຸນຂອງເຮົາທັງໝົດ ແມ່ນເພື່ອເຮັດໃຫ້ຄວາມເຫລື້ອມໃສຂອງເຮົາເລິກເຊິ່ງ ແລະ ຊ່ວຍເຮົາໃຫ້ກາຍເປັນເໝືອນດັ່ງພຣະເຢຊູຄຣິດຫລາຍຂຶ້ນ. ເພາະດ້ວຍເຫດນີ້, ເມື່ອເຮົາສຶກສາພຣະກິດຕິຄຸນ, ເຮົາຈຶ່ງບໍ່ພຽງແຕ່ຊອກຫາຂໍ້ມູນໃໝ່ເທົ່ານັ້ນ, ແຕ່ເຮົາຍັງຢາກກາຍເປັນ “ຄົນທີ່ຖືກສ້າງໃໝ່” ນຳອີກ (2 ໂກຣິນໂທ 5:17). ສິ່ງນີ້ໝາຍເຖິງການເພິ່ງອາໄສພຣະບິດາເທິງສະຫວັນ ແລະ ພຣະເຢຊູຄຣິດ ເພື່ອຊ່ວຍເຮົາໃຫ້ປ່ຽນໃຈ, ປ່ຽນມຸມມອງ, ປ່ຽນການກະທຳ, ແລະ ປ່ຽນທຳມະຊາດຂອງເຮົາ.
ແຕ່ການຮຽນຮູ້ພຣະກິດຕິຄຸນທີ່ຈະເພີ່ມຄວາມເຂັ້ມແຂງໃຫ້ແກ່ສັດທາຂອງເຮົາ ແລະ ນຳພາໄປສູ່ການເຫລື້ອມໃສທີ່ໜ້າອັດສະຈັນໃຈ ຈະບໍ່ເກີດຂຶ້ນບາດດຽວ. ມັນຂະຫຍາຍຈາກຫ້ອງຮຽນເຂົ້າໄປສູ່ໃຈ ແລະ ບ້ານຂອງບຸກຄົນ. ມັນຮຽກຮ້ອງຄວາມພະຍາຍາມທີ່ໝັ້ນຄົງທຸກມື້ ເພື່ອຈະເຂົ້າໃຈ ແລະ ດຳລົງຊີວິດຕາມພຣະກິດຕິຄຸນ. ການເຫລື້ອມໃສທີ່ແທ້ຈິງຮຽກຮ້ອງອິດທິພົນຂອງພຣະວິນຍານບໍລິສຸດ.
ພຣະວິນຍານບໍລິສຸດນຳພາເຮົາໄປສູ່ຄວາມຈິງ ແລະ ເປັນພະຍານເຖິງຄວາມຈິງນັ້ນ (ເບິ່ງ ໂຢຮັນ 16:13). ພຣະອົງໃຫ້ຄວາມຮູ້ແກ່ຄວາມຄິດ, ກະຕຸ້ນຄວາມເຂົ້າໃຈ, ແລະ ສຳຜັດໃຈຂອງເຮົາ ດ້ວຍການເປີດເຜີຍຈາກພຣະເຈົ້າ, ຊຶ່ງເປັນແຫລ່ງຂອງຄວາມຈິງທັງໝົດ. ພຣະວິນຍານບໍລິສຸດຊຳລະໃຈຂອງເຮົາ. ພຣະອົງດົນໃຈເຮົາໃຫ້ມີຄວາມປາດຖະໜາທີ່ຈະດຳລົງຊີວິດຕາມຄວາມຈິງ, ແລະ ພຣະອົງສື່ມບອກວິທີທາງທີ່ຈະເຮັດສິ່ງນີ້. ແທ້ຈິງແລ້ວ, “ພຣະວິນຍານບໍລິສຸດ … ຈະສິດສອນ [ເຮົາ] ທຸກສິ່ງ” (ໂຢຮັນ 14:26).
ເພາະດ້ວຍເຫດຜົນເຫລົ່ານີ້, ໃນຄວາມພະຍາຍາມຂອງເຮົາທີ່ຈະດຳລົງຊີວິດ, ຮຽນຮູ້, ແລະ ສິດສອນພຣະກິດຕິຄຸນ, ກ່ອນອື່ນເຮົາຕ້ອງສະແຫວງຫາຄວາມເປັນເພື່ອນຂອງພຣະວິນຍານກ່ອນ. ເປົ້າໝາຍນີ້ຄວນຄວບຄຸມການເລືອກຂອງເຮົາ ແລະ ນຳພາຄວາມຄິດ ແລະ ການກະທຳຂອງເຮົາ. ເຮົາຄວນສະແຫວງຫາສິ່ງໃດກໍຕາມທີ່ເຊື້ອເຊີນອິດທິພົນຂອງພຣະວິນຍານ ແລະ ປະຕິເສດສິ່ງໃດກໍຕາມທີ່ຂັບໄລ່ອິດທິພົນນັ້ນ—ເພາະເຮົາຮູ້ວ່າ ຖ້າຫາກເຮົາສາມາດມີຄ່າຄວນສຳລັບການສະຖິດຢູ່ຂອງພຣະວິນຍານບໍລິສຸດແລ້ວ, ເຮົາກໍສາມາດມີຄ່າຄວນທີ່ຈະດຳລົງຊີວິດຢູ່ໃນທີ່ປະທັບຂອງພຣະບິດາເທິງສະຫວັນ ແລະ ພຣະບຸດຂອງພຣະອົງ, ພຣະເຢຊູຄຣິດ.