Beberuare 5–11: ‘Inaomata n rinea te Inaomata ao te Maiu ae Akea Tokina, rinanon te Tia Raoi ae Korakora.’ 2 Nibwaai 1–2 ” Nakomai, Iriirai—Ibukin te Mweenga ao te Taromauri: Ana Boki Moomon 2024 (2024)
“Beberuare 5–11. 2 Nibwaai 1–2,” Nakomai, Iriirai—Ibukin te Mweenga ao te Taromauri: 2024 (2024)
Atam ao Ewa,, iroun Douglas Fryer
Beberuare 5–11: “Inaomata n rinea te Inaomata ao te Maiu ae Akea Tokina, rinanon te Tia Raoi ae Korakora”
2 Nibwaai 1–2
Ngkana ko ataia bwa e a uakaan tokin maium, tera te kabanea ni marooro ae ko tangiria ni tibwauaia nakoia aomata ake ko rang tangiriia? Ngke e namakinna te burabeti ae Riaai bwa e a kan roko n tokin maiuna, e botiia ana utu ni kabane te kabanea n tai. E tibwaia nakoia te bwai are e kaotia Tamara are i Karawa nakoina. E kaota ana koaua iroun te Mesia. E reiakin koaua n te euangkerio ake e mamate nanona iai nakoia aomata ake e tangiriia. E marooro iaon te inaomata, te ongotaeka, Bwakan Atam ao Ewa, te kamaiuaki rinanon Iesu Kristo; ao te kimwareirei. Aki bane natina n rineia bwa a na maiuakin baike e reiakin—akea mai ibuakora ae e kona ni karaoi rinerine n aron aikai ibukiia ake ti tangiriia. Ma ti kona n reirei ao ni kakoaua ibukin te Tia Kabooira, are E anganiira te “inaomata n rinea te inaomata ao te maiu ae akea tokina” (taraa 2 Nibwaai 2:26–27).
Iango ibukin Reiakinana n te Mweenga ao n te Taromauri
I kona n “uti! ao n teirake man te tano.”
N 2 Nibwaai 1:13–29, nora te taeka are e kabongana Riaai ni kabwarabwara aron maiun tamneia Raman ao Remuera. Tera ae e buokiko n uti man te “matunako” ni maiun tamneim? Tera ae e buokiko ni motiki “taurekereke” ni maiun tamneim? Iangoa ana kakoaua Riaai n te kibu 15 ao a na kakao n te kibu 23. Tera ana rongorongo Tamara are i Karawa nakoim ni kiibu aikai?
Kabonganai bwaai aika a kona n nooraki. Kabonganakin bwaai aika a kona n nooraki e na buokiia taan reiakinaki ni mataata n te koaua n te euangkerio ao n teimatoa n uringii. Ngkai ko katauraoi n anga reirei man kabonganaan te kabwarabwara aei, iangoia bwa baikara bwaai aika a kona n nooraki ae ko na kabonganai. Te katooto, tao te beeba ae e reireitaki e na kona ni buokiia taan reiakinaki ni mataata n ana taeka Riaai n te 2 Nibwaai 1:13 ke 2 Nibwaai 2:27.
Ibukin Iesu Kristo, I “inaomata n rinea te inaomata ao te maiu are akea tokina.”
Ana utu ngkai Riaai a mena n te aba ae boou, ae onrake ma bwaai aika kona ni karaoaki. Te rinerine are a karaoi n te aba ae boou aei e na rangi ni kakawaki ibukin rikirakeia ao kukureia. Tao ngaia aio bukina ae Riaai e reireina natina te mwaane ae Iakobwa iaon te inaomata n rinerine, ke te konabwai ni karaoa te rinerine, n te 2 Nibwaai 2. Ngkai ko kamatebwaia kiibu 11–30, korei ae kanga kaeka nakon titiraki aikai:
-
Bukin tera te inaomata n rinerine e kakaawaki iroun Tamara are i Karawa, e ngae ngke tabeman aomata a kabonganaa n te kawai ae buakaka?
-
Bukin tera te tia kakaitra e kataia ni kamwemwerea ke n urua inaomatam n rinerine?
-
E kanga te Tia Kamaiu ni buokiko n “rinea te inaomata ao te maiu are akea tokina” (kibu 27)?
Aio te kawai teuana n reiakina te inaomata n rinerine n te 2 Nibwaai 2: Kakaei bwaai aika a riai ibukira bwa ni karekea te inaomata n rinerine ao n roota ara konabwai ae mai iroun te Atua. Ibukin te katooto:
-
2 Nibwaai 2:5: Te atatai n te raoiroi ao te buakaka; te tua
Tera ae e na riki nakon inaomatara n rinerine ngkana iai teuana ke a mwaiti ae bua mai buakon bwaai aikai?
Man taia mwakoro ake onoua n Ibukin Kakorakoraia Kairake: Te Boki ni Kairi ibukin Karaoan Rinerine iai inanona te “Kakao” ao “Berita Aika Beritanaki.” Taraa teuana ke ae raka riki man mwakoro aikai, ao rinei berita aika beritanaki ake ko kantaningai inanon maium. Tera te kakao ae ko kainnanoia ni mwakuriia ni karekea te berita aei? Iangoia n tibwaia ma tabeman te kakabwaia are ko a tia ni karekea man irirakin kakao aikai.
Taraa naba Gospel Topics, “Agency and Accountability,” Gospel Library; “Know This, That Every Soul Is Free,” Anene n Taromauri, nambwa 240.
Te Atua e konaa ni bita te kataaki nakon te kakabwaia.
E ataia Riaai bwa natina te mwaane ae uarereke ae Iakobwa e a tia n rinanon te “karawawataki” ao “te korakai,” inanon ataeina (2 Nibwaai 2:1). Bukin tera n am iango ae ana kakoaua Riaai n te 2 Nibwaai 2:1–3, 6–25 e na rangi ni kakawaki iroun Iakobwa? Bukin tera e kakawaki iroum? Kakaei taeka ao mwakoro n taeka ae ko kunea bwa a rangi ni korakora. E kanga n tia te Atua n onea karawawataam nakon taian kakabwaia ibukim? (Taraa 2 Nibwaai 2:2.)
Taraa naba I-Rom 8:28; Dale G. Renlund, “Te Babaire ae Aki Borao ae Rangi ni Kaun,” Riaona, Meei 2021, 41–45.
Te Bwaka ao Ana Mwakuri ni Kamaiu Iesu Kristo bon mwakoro aika kakaawaki n ana Kainibaire Tamara are i Karawa.
A mwaiti aomata aika a kakoaua ae te Bwaka bon te kananokawaki ao bwa Ewa ao Atam a karaoa te bure ae teimatoa ngke a rineia ni kana uaan te kai. N 2 Nibwaai 2:15–28, e reirei Riaai tabeua riki koaua iaon te Bwaka—ao iaon te kabooaki rinanon Kristo. Ngkai ko wareki kiibu aikai, korei ni karinanii koaua iaon te bwai ae riki n te Onaroka are Eten. Titiraki n aron aikai a kona n ibuobuoki:
-
Bukin tera ngkai e riai te Bwaka?
-
Tera taben Iesu Kristo ae karaoia n tokanikai man mwiin te Bwaka?
-
E kanga etin atakin te Bwaka ni buokiira ni mataata raoi n arora ni kainnanoa Iesu Kristo?
Taraa naba Dallin H. Oaks, “The Great Plan of Happiness,” Ensign, Nobembwa. 1993, 72–75.
Ibukin iango riki tabeua, taraa te beeba ni kaongora n te namwakaina aio n te Riaona ao Ibukin Kakorakoraia Kairake maekatiin.
A Riai n Aki Raraoma Nanomi, iroun Howard Lyon
Iango ibukin Reiakinaia Ataei
Iesu Kristo e buokai n tokanikai man ni mwiin te bure.
-
Ni buokiia natim ni mataata n ana kakao Riaai ni “motiki taurekereke” n te bure, tao kam na bae n uaia ni mwakuri ni karaoa te tiein ae reireitaki man te beeba. Iaon taian moti ni beeba, natim a kona ni buokiko ni kore tabeua bwaai are e kaririira iai Tatan bwa ti na karaoi. Imwiina kam kona n uaia ni wareka 2 Nibwaai 1:13, 15, 23 ngkai a katea kain tabeua mwakoro n taeka ake ni kiibu aikai—ni ikotaki ma motikan te tiein te beeba. E kanga te bure n riki n ai aron te tiein? E kanga Iesu ni buokiira ni “motiki taurekereke” n te bure?
I kakabwaiaaki ngkana I ongeaba n Ana tua te Atua.
-
Tao e na ibuobuoki nakoia natim ni kabotaua te kaokoro n Ana tua te Atua nakon aia kau, bwaraia, nangoan baia, ke tabeua riki bwaai ake a kamanoia? Tao ko kona ni kariaia bwa a na karin bwaai aikai ngkai ko taekinna bwa a kanga tuua ni kamanoira. Imwiin ko kona ni wareka 2 Nibwaai 1:20, ao katereterea bwa ti “kakabwaiaki” (tekeraoi ke ni kamanoaki) ngkai ti kawakin tuua. Tibwaua te bwai ae e a tia n riki nakoim ngke ko kakabwaiaaki ke ni kamanoaki man iriiran tua.
-
Ni kaota te kaokoro imarenan ae ko kakabwaiaki ao ae ko kakeaaki mai imatan te Atua (taraa 2 Nibwaai 1:20), ngkoe ao natim kam kona n taraa te aroka ae e maiureirei ao te baanikai ke mwaangan te kai are e a tia ni koreaki man te aroka. Imwiina a kona natim n rinanoi rinerine ake a karaoi Nibwaai ao tarina (taraa 1 Nibwaai 2:11–16; 3:5–7; 18:9–11). Tera imwiin taian rinerine aikai? Tera rinerine ae a buokiira n tiku n reitaki nakon te Atua?
Te Atua e anganai te inaomata n rinerine.
-
Ni buokiia natim ni mataata bwa tera ae e reireia Riaai iaon te kaitara ao karaoan te rinerine, kam kona ni karaoa te takakaro are ko taekina te taeka (n aron te ota) ao natim a taekina kaitaraana (te roo). Buokiia n reiakinna bwa bukin tera te kaitara bon mwakoron Ana babaire te Atua ngkai kam uaia ni wareka 2 Nibwaai 2:11, 16. Imwiin ko kona n tibwa te karaki iaon te ataei ae e kariiriaki bwa e na karaoa te rinerine ae kairua. Natim a kona n tibwaia bwa tera kaitaraan te rinerine are e kairua ao ni katea kaina.
-
N reiakina te kaokoro imarenan “te inaomata” ao “te tautoronaki” (2 Nibwaai 2:27), a kona natim ni korea tamnein te man inanon oona ao te man ae e mena itinaniku ni bon ana tabo. Engaa te man ae e inaomata? Kaoiia ataei bwa a na kotea te tamnei ae eti ngkana ko wareka te taeka ae “inaomata” n 2 Nibwaai 2:27. Taekina koauana bwa Iesu Kristo e kainaomataira.
-
Uaia n anenea te anene n aron: “Choose the Right” (Anene n Taromauri, nambwa 239). Tera ae ti reiakinna man te anene are iaon karaoan te rinerine?
Ibukin iango riki tabeua, taraa te beeba ni kaongora n te namwakaina aio n te Rao maekatiin.
Riaai ma Ana Botanaomata a Roko n te Aba ae Boou, iroun Clark Kelley Price