“25–31 ni Maji: ‘Ena Qai Tucake Mai … ena Kauta Lako e Tabana na Veivakabulai.’ Siganimate,” Lako Mai, Mo Muri Au—Me Baleta na iTikotiko kei na Lotu: iVola i Momani 2024 (2024)
“25–31 ni Maji. Siganimate,” Lako Mai, Mo Muri Au—Me Baleta na iTikotiko kei na Lotu: 2024 (2024)
Karisito kei ira na iApositolo, mai vei Del Parson
25–31 ni Maji: “Ena Qai Tucake Mai … ena Kauta Lako e Tabana na Veivakabulai”
Siganimate
O ira na iApositolo ni gauna makawa era doudou ena nodra ivakadinadina me baleti Jisu Karisito kei na Nona Tucake Tale (raica na Cakacaka 4:33). E milioni na tamata era vakabauti Jisu Karisito ka sasaga me ra vakamuri Koya baleta na nodra vosa ena iVola Tabu. Ia, e so era na vakataroga, kevaka o Jisu Karisito sa iVakabula dina ni vuravura taucoko, qai cava na vuna era yalani kina o ira na Nona ivakadinadina kina vica ga na tamata era tikoga ena dua ga na wasewase lailai ni vanua?
Na iVola i Momani e tu me ikuri, ni vakadinadina veivakauqeti ni o Jisu Karisito sa iVakabula kei vuravura, ka “dau vakaraitaki koya vei ira na veimatanitu kecega” (tabana ni ulutaga ni iVola i Momani) ka solia na veivakabulai vei ira kecega era lako mai Vua. Me kena ikuri, na ikarua ni vakadinadina oqo e vakamatatataka na ibalebale ni veivakabulai. Oqo na vuna e cakacaka kina vagumatua o Nifai, Jekope, Momani, kei ira kece na parofita me ra “cakacaka vagumatua me keimami ceuta na vei vosa oqo ena peleti”—me cauraki yani vei ira na kawa tamata era muri tiko mai ni o ira talega era “kila na veika baleti Karisito, ka tu … na inuinui ni nona lagilagi” (Jekope 4:3–4 Ena gauna ni Siga ni mate oqo, vakasamataka vakatitobu na vei ivakadinadina era tiko ena iVola i Momani ni kaukauwa ni Veisorovaki i Karisito sa baleti vuravura raraba kei na tamata vakayadua—ni vueta tu na vuravura taucoko kei iko talega.
Vakasama eso ni Vuli ena iTikotiko kei na Lotu
Ena vukui Jisu Karisito, au na tucake tale.
E sa itovo tudei tu me dau vakasamataki vakatitobu na Tucake tale nei Jisu Karisito ena Siga ni mate, ia na cava dina na kena ibalebale na tucake tale? Na cava e so na rai momona e tiko ena iVola i Momani me baleta na tucake tale? De na rawa beka ni tiki ni nomu marautaka tiko na Siga ni mate na nomu vola na dina me baleta na tucake tale o kunea ena 2 Nifai 9:6–15,22; Alama 11:42–45; 40:21–25; 3 Nifai 26:4–5.
E rawa talega ni o vola na sala e vakauqeta kina na nomu ivalavala kei na ivakarau ni nomu bula na dina eso oqo me baleta na tucake tale. Me kena ivakaraitaki, vakasamataka na sala mo vakacavara kina na veiyatuvosa oqo: Kevaka au sega ni kila na veika oqo … kei na Baleta niu sa kila na veika oqo…
E dua na serenilotu me vaka na “Au Sa Kila ni Bula Tu” (Serenilotu, naba 76) e rawa ni vukei iko mo vakasamataka na vuna e bibi kina vei iko na Tucaketale ni iVakabula. Ni o lagata, vakarogoca, se wilika na serenilotu, o na tarogi iko beka, “E duatani vakacava na noqu bula baleta ni sa tucake tale o Jisu Karisito?”
Na Gospel Library e tiko kina e dua na ivakasokumuni ni vidio ni Siganimate e rawa ni dua na tiki vakaibalebale ni nomu vuli. E rawa beka ni o sarava e dua se sivia na vidio oqo ka vakasamataka vakatitobu na veika era vakuria ki na nomu kila se vakavinavinakataka na Tucaketale ni iVakabula.
Raica talega na Luke 24:36–43; Cakacaka 24:15; 1 Korinica 15:12–23; Reyna I. Aburto, “Sa Sega kina na Kaukauwa ni Bulubulu,” Liaona, Me 2021, 85–86; Gospel Topics, “Resurrection,” Gospel Library; “Death, Grieving, and Loss” ena “Life Help” e komuni tu ena Gospel Library.
O Jisu Karisito sa taura vei Koya na noqu ivalavala ca, mosi, kei na noqu malumalumu.
E vakavulica vakamatata na iVola Tabu ni veisorovaki i Jisu Karisito e baleta na noda ivalavala ca. Ia na iVola i Momani, e vakarabailevutaka na noda kila me baleta na isoro kei na vakararawataki i Karisito ena sala e bibi. E rawa ni o kunea eso na ivakavuvuli oqo ena Mosaia 3:7; 15:5–9; Alama 7:11–13 Ni o wilika oti na veitikina oqo, sa rawa mo vola eso na ka o sa kunea ena dua na ituvatuva me vakataka oqo:
|
Na cava e vakararawataki kina na iVakabula? |
Na cava na vuna e vakararawataki kina o Koya? |
Na cava na kena ibalebale oqo vei au? |
|---|---|---|
Oqo e dua tale na sala me vulici kina na veimalanivosa oqo: Vakaraica na serenilotu o vakila ni veisotari kei na itukutuku era vakavulica. Na ituvatuva vakamatanivola ni “iVolanikalou” ena daku ni ivolanisere e rawa ni veivuke. Na malanivosa cava so mai na serenilotu oqo kei na ivolanikalou e vukei iko mo vakavinavinakataka vakatitobu na solibula ni iVakabula?
Raica talega na Aisea 53; Iperiu 4:14–16; Gérald Caussé, “E Dua na iVakadinadina Bula i Karisito sa Bula Tiko,” Liaona, Me 2020, 38–40.
E rawa ni vakasavasavataki au o Jisu Karisito ka vukea meu vinaka sara.
E rawa ni tukuni ni Vola i Momani e dua na itukutuku levu ni tamata era veisau baleta na Veisorovaki i Jisu Karisito. E rawa ni o wilika eso na ka oqo ena Mosaia 5:1–2; 27:8–28; Alama 15:3–12; 24:7–19. O na vakasamataka beka eso tale na ivakaraitaki mo vulica talega. Na cava o rawa ni raica e tautauvata mai na veika era sotava oqo? Na duidui cava o raica? Na cava e vakavulica vei iko na veika e sotavi oqo me baleta na sala ena rawa ni veisautaki iko kina na Veisorovaki ni Vakabula?
Raica talega na Alama 5:6–14; 13:11–12; 19:1–16; 22:1–26; 36:16–21; Ica 12:27; Moronai 10:32–33.
Me ikuri ni vakasama, raica na ilavelave ni vula oqo ni Liaona kei na Me iSakisaki ni iTabagone ena kena mekasini.
Vakasama ni Nodra Tuberi na Gonelalai
Baleta ni sa vakaturicake tale o Jisu, au na vakaturicake talega.
-
Sa rawa mo vakayagataka na “Chapter 53: Jesus Is Crucified” kei na “Chapter 54: Jesus Is Risen” (ena New Testament Stories, 136–38, 139–44) me tukuni vei ira na luvemu me baleta na Tucake tale i Jisu Karisito. Se me ra talanoataka vei iko na luvemu na italanoa, ka vakayagataka na iyaloyalo ena veiwase oqori.
-
Na veisiko ni iVakabula sa tucaketale ki Amerika sa ivakadinadina kaukauwa ni Nona Tucaketale. Sa rawa mo tukuna vei ira na luvemu na veika oqori, ena kena vakayagataki na 3 Nifai 11; 17; na sere “Easter Hosanna”; se na iotioti ni tikina ni “Book of Mormon Stories” (Nodra Sere na Lalai, 68–69, 118–19). Vakayaloqaqataki ira na luvemu me ra raitayalotaka ena vakacava tu beka me da tara na we ni vako i Jisu (raica na 3 Nifai 11:14–15) se me dua vei ira na gone e vakalougatataka o Koya (raica na 3 Nifai 17:21 Veiwaseitaka vakai kemuni na nomuni nanuma baleti Jisu Karisito kei na Nona Tucake tale.
-
Me vukei ira na luvemu me ra kila na veika e vakavuvulitaka na iVola i Momani me baleta na tucake tale, sa rawa mo sureti ira me ra dramataka ni o sega ni kila e dua na ka me baleta na ka oqori ka kerei ira me ra vakamacalataka vei iko. Vukei ira mera raica na 2 Nifai 9:10–15; Alama 11:41–45; kei na Alama 40:21–23 me baleta na isau ni taro vakaoqo: Na cava na ibalebale ni tucaketale? O cei beka ena tucake tale? Sureti ira talega me ra wasea nodra ivakadinadina ena nona Tucake tale na iVakabula me tiki ni nodra isau ni taro.
E kila o Jisu Karisito na ivakarau me vakacegui au kina.
-
Mosaia 3:7 kei na Alama 7:11 e vakamacalataka eso na ka a lako curuma na iVakabula me tiki ni Nona Veisorovaki. E rawa ni o wilika e dua vei ira na veitikina oqori vei ira na luvemu ka kerei ira me ra vakarogoca na vosa e tukuna vei ira na ka a vakararawataki kina o Jisu ena vukuda. Oti mo qai wilika na Alama 7:12 mo kila kina na vuna a vakararawataki kina o Koya. Vakadinadinataka ni a vakila o Jisu Karisito na noda mosi kei na tauvimate me rawa ni vakacegui keda kina.
-
E tiko beka na nodra serenilotu taleitaki na luvemu me baleti Jisu Karisito kei na Nona Veisorovaki? Sa rawa mo ni lagata vata—se vulica e dua na ka vou. Veivosakitaka na vosa se malanivosa ena qaqani sere e vakavulici iko me baleta na veivakacegui kei na vakacegu e solia vei keda na iVakabula.
Kecisemani, mai vei Michael T. Malm
Sa rawa vei Jisu Karisito me vakasavasavataki au ka vukea meu na veisau.
-
Na iVola i Momani e solia e levu na ivakaraitaki ni tamata era a veisautaki ena vuku ni Veisorovaki ni iVakabula. Sa rawa vei ira na luvemu mera digitaka e dua me ra na vulica, me vakataki Inosi (raica na Inosi 1:2–8), Alama Lailai (raica na Mosaia 27:8–24), se o ira na Anitai Nifai Liai (raica na Alama 24:7–19). A veisau vakacava na tamata se ilawalawa oqo ena vuku ni Veisorovaki i Jisu Karisito? Eda na muria vakacava na nodra ivakaraitaki?
-
O iko kei ira na luvemu e rawa talega ni o vakatauvatana e dua na ka savasava kei na dua na ka duka ka veivosakitaka na kena vakasavasavataki na veika duka mera savasava. Wilika vata na Alama 13:11–13. Na cava e cakava o Jisu me rawa ni da vakasavasavataki mai na noda ivalavala ca? Na cava na noda nanuma baleta na ivalavala ca ni sa mai yaco na ka oqo? Na cava eda vakila me baleta na iVakabula?
Me baleta na vakasama tale eso, raica na ilavelave ni vula oqo ena iTokani ena kena mekasini.
Mo bula kilikili ki na veidusimaki ni Yalotabu. Na Yalotabu sai koya na qasenivuli dina. Ni ko vakasaqara na Nona veidusimaki, ena soli vakasama kei na vakanananu vei iko o Koya ena sala mo sotava kina na nodra gagadre o vakavulica.
Na iYaloyalo i Karisito kei ira na Nifaiti mai vei Ben Sowards