Marso 25–31: “Magabangon Sia … nga may Pagpaayo sa Iya mga Pakpak.” Paskwa sang Pagkabanhaw
“Marso 25–31: ‘Magabangon Sia … nga may Pagpaayo sa Iya mga Pakpak.’ Easter,” Dali, Magsunod sa Akon—Para sa Puluy-an kag Simbahan: Libro ni Mormon 2024 (2023)
“Marso 25–31. Easter,” Dali, Magsunod sa Akon—Para sa Puluy-an kag Simbahan: 2024 (2023)
Litrato
ang nabanhaw nga Cristo upod ang Iya mga Apostoles
Christ and the Apostles [Si Cristo kag ang mga Apostoles], ni Del Parson
Marso 25–31: “Magabangon Sia … nga may Pagpaayo sa Iya mga Pakpak”
Paskwa sang Pagkabanhaw
Ang dumaan nga mga Apostoles maisog sa ila mga testimonya parte kay Jesucristo kag sa Iya Pagkabanhaw (tan-awa sa Mga Binuhatan 4:33). Minilyon ka mga tawo ang nagapati kay Jesucristo kag nagatinguha nga sundon Sia tungod sang ila mga pulong nga nasulat sa Biblia. Pero may mga tawo nga magapamangkot: Kon si Jesucristo amo ang Manluluwas sang bilog nga kalibutan, ngaa ang Iya mga saksi limitado sa pila lamang ka mga tawo sa isa ka gamay nga rehiyon?
Ang Libro ni Mormon nagatindog bilang dugang, makakumbinsi nga saksi nga si Jesucristo amo ang Manluluwas sang kalibutan, “nga nagapahayag sang iya kaugalingon sa tanan nga kapungsuran” (tig-ulo nga pahina sang Libro ni Mormon) kag nagatanyag sang kaluwasan sa tanan nga magakari sa Iya. Dugang pa, ining ika-duha nga saksi nagaathag man kon ano ang kahulugan sang kaluwasan. Amo ini kon ngaa si Nefi, Jacob, Mormon, kag ang tanan nga mga propeta nagpangabudlay “sing maukod sa pagkurit sining mga pulong sa mga lamina”—agud ideklarar sa palaabuton nga mga henerasyon nga sila man “nakahibalo nahanungod kay Cristo, kag … nakaangkon sang paglaum sa iya himaya” (Jacob 4:3–4 Sa sining panahon sang Paskwa sang Pagkabanhaw, binagbinaga ang mga testimonya sa Libro ni Mormon nga ang gahum sang Manluluwas pareho nga pangkabilogan kag personal—nagatubos sang bilog nga kalibutan kag nagatubos sa imo.
Mga Ideya sa Pagtuon sa Puluy-an kag sa Simbahan
Litrato
seminary icon
Tungod kay Jesucristo, mabanhaw ako.
Kinaandan sa Paskwa sang Pagkabanhaw nga binagbinagon ang Pagkabanhaw ni Jesucristo, pero ano gid bala ang kahulugan sang mabanhaw? Ano nga mga ideya ang ginatanyag sang Libro ni Mormon parte sa pagkabanhaw? Basi sining panahon sang Paskwa sang Pagkabanhaw pwede mo ilista ang mga kamatuoran parte sa pagkabanhaw nga imo makita sa 2 Nefi 9:6–15, 22; Alma 11:42–45; 40:21–25; ukon 3 Nefi 26:4–5.
Pwede mo man isulat kon paano ginaimpluwensyahan sining mga kamatuoran parte sa pagkabanhaw ang imo mga aksyon kag ang pamaagi sang imo pagpangabuhi. Halimbawa, pamensara kon paano mo kompletuhon ining mga dinalan: Kon wala ko mahibal-i ining mga butang … kag Tungod nahibal-an ko ining mga butang …
Gindala ni Jesucristo sa Iya Kaugalingon ang akon mga sala, mga kasakit, kag mga kahuyang.
Ang Biblia maathag nga nagatudlo nga si Jesucristo nagbayad para sa aton mga sala. Ang Libro ni Mormon nagapasangkad sang aton pag-intiendi sang sakripisyo kag pag-antos ni Cristo sa importante nga mga paagi. Makita mo ang pila sining mga pinanudlo sa Mosias 3:7; 15:5–9; Alma 7:11–13. Pagkatapos mo nga basahon ining mga dinalan, pamensara nga isulat ang kon ano nga imo madiskubrehan pareho sini:
Ano ang gin-antos sang Manluluwas?
Ngaa nag-antos Sia?
Ano ang kahulugan sini sa akon?
Ari pa ang isa ka paagi para tun-an ining nga dinalan: Magpangita sang mga himno nga pamatyag mo bagay sa mga mensahe nga ginatudlo sini. Ano nga mga dinalan sa sining mga himno kag balaan nga mga kasulatan ang nagabulig sa imo nga mas maapresyar ang sakripisyo sang Manluluwas?
Si Jesucristo makatinlo sa akon kag makabulig sa akon nga mangin perpekto.
Makabig nga ang Libro ni Mormon isa ka kasaysayan sang mga tawo nga nagbag-o bangud sa Pagbayad-Sala ni Jesucristo. Mabasa mo ang iban sining mga eksperiyensya sa Mosias 5:1–2; 27:8–28; Alma 15:3–12; 24:7–19. Pwede ka man magpamensar sang iban nga mga halimbawa para tun-an. Ano ang imo natalupangdan nga komon sa sining mga eksperiyensya? Ano nga mga kinalain ang imo natalupangdan? Ano ang ginatudlo sining mga eksperiyensya sa imo parte sa kon paano ka bag-ohon sang Manluluwas?
Ang pagbisita sang Nabanhaw nga Manluluwas sa kadutaan sang Amerika isa ka mabaskog nga saksi sang Iya Pagkabanhaw. Pamensara nga iistorya ini sa imo kabataan, gamit ang 3 Nefi 11; 17. Paisoga ang imo kabataan nga pamensaron kon daw ano ayhan ang maghikap sang mga pilas ni Jesus (tan-awa sa 3 Nefi 11:14–15) ukon mangin isa sa mga bata nga Iya ginbendisyunan (tan-awa sa 3 Nefi 17:21). Iistorya sa isa kag isa ang inyo mga nabatyagan parte kay Jesucristo kag sa Iya Pagkabanhaw.
Para buligan ang imo kabataan nga madiskubrehan kon ano ang ginatudlo sang Libro ni Mormon parte sa pagkabanhaw, pwede mo sila hagaron nga magpakuno-kuno nga wala ka may nahibal-an parte sini kag pangabayon sila nga ipaathag ini sa imo. Buligi sila nga pangitaon sa 2 Nefi 9:10–15; Alma 11:41–45; kag Alma 40:21–23 ang mga sabat sa mga pamangkot nga pareho sini: Ano ang buot silingon sang mabanhaw? Sin-o ang mabanhaw? Hagara man sila nga magpaambit sang testimonya parte sa Pagkabanhaw sang Manluluwas bilang bahin sang ila sabat.
Nakahibalo si Jesucristo kon paano ako paumpawan.
Ang Mosias 3:7 kag Alma 7:11 nagalaragway sang pila sa mga gin-agyan sang Manluluwas bilang bahin sang Iya Pagbayad-Sala. Pwede mo basahon ang isa sining mga bersikulo sa imo kabataan kag pangabayon sila nga pamatian ang mga tinaga nga nagahambal sa ila kon ano ang gin-antos ni Jesus para sa aton. Dayon pwede ninyo basahon ang Alma 7:12 para mahibal-an kon ngaa gin-antos Niya ini. Magpamatuod nga nabatyagan ni Jesucristo ang tanan naton nga kasakit kag mga balatian para mapaumpawan Niya kita.
May paborito bala nga himno ukon kanta ang imo kabataan parte kay Jesucristo kag sa Iya Pagbayad-Sala? Pwede ninyo ini kantahon nga ululupod—ukon magtuon sang bag-o. Hambali ang mga tinaga ukon dinalan sa kanta nga nagatudlo sa inyo parte sa kaumpawan kag kalinong nga ginatanyag sang Manluluwas sa aton.
Si Jesucristo sarang magtinlo kag magbulig sa akon nga magbag-o.
Ang Libro ni Mormon nagahatag sang madamo nga mga halimbawa sang mga tawo nga nagbag-o bangud sang Pagbayad-Sala ni Jesucristo. Basi pwede ang imo kabataan magpili sang isa para tun-an, pareho kay Enos (tan-awa sa Enos 1:2–8), Alma nga Lamharon (tan-awa sa Mosias 27:8–24), ukon sa mga Anti-Nefi-Lehi (tan-awa sa Alma 24:7–19). Paano nagbag-o ining tawo ukon grupo bangod sang Pagbayad-Sala ni Jesucristo? Paano naton sundon ang ila mga ehemplo?
Pwede ninyo ikumparar sang imo kabataan ang butang nga limpyo kag butang nga mahigko kag hambalan kon paano ginalimpyohan ang mahigko nga mga butang. Basaha sing ululupod ang Alma 13:11–13. Ano ang ginhimo ni Jesus para matinloan kita sa aton mga sala? Ano ang ginapabatyag sini sa aton parte sa sala? Ano ang ginapabatyag sini sa aton parte sa Manluluwas?
Para sa dugang nga mga ideya, tan-awa sa isyu sang Abyan nga magasin sini nga bulan.
Magpangabuhi nga kaangay-angay sa giya sang Espiritu. Ang Espiritu amo ang matuod nga manunudlo. Samtang ginapangayo mo ang Iya giya kag nagapangabuhi nga nagakaangay, hatagan ka Niya sang mga panghunahuna kag mga ideya kon paano masabat ang mga panginahanglan sang mga tawo nga imo ginatudloan.
